زاہد براہوئی(برج اسد)

زاہد براہوئی نا (8 اگست 1976ء) برج ”اسد“، (Leo)، حاکم استار ”شمس“ (Sun)، منطقہ البروج ”5“، نشانی ”شیر“، کلید وجود ”چُنا“ تَب ”خاخری“ (آتشی)، پیشن نا ہزوہ ”کوپہ“، تہہ انا ہزوہ ”اُست“ ہجی حرف ”م“، برج انا ودشت ”23 جولائی آن 23 اگست“، تعلقدار برج آک ”حمل، قوص“، جتا تَب برج آک ”ثور، عقرب، دلو“، اسہ وڑ تَب برج آک ”جوزا، سرطان، سنبلہ، میزان“، بے تعلق برج آک ”جدی، دلو“، ودی دے ئی عدد ”8“، مرکب عدد ”35“، فطری گچین کاری ”جذباتی“ ءِ۔

برج ”اسد“ نا تب اکن فلکیات نا چاہندار آتا پاننگ دادے کہ داٹی قوت ارادی زیات مریک۔ دوستی نا معاملہ ٹی اُست کشادہ، دوستی ٹی سفا سچا، کردار و عمل نا معاملہ ٹی ہم سوگو، حق انا زی آ سخت سلوک، عقیدہ نا معاملہ ٹی بیرہ سوگو آخا بلکہ تینا عقیدہ کن جان تروک۔ ہر وڑ انا بندغ آتتون تعلقداری ءِ جوان ءُ وڑ اسے ٹی سرجم کروک۔ ہندا وڑ اٹ سیاسی کاریم تیٹی ہم زیات آن زیات است خواہی تخک۔ بلکہ دا کاریم ءِ تو چُنکی آن دوست تورک۔ مہمان نواز، بندغی ءِ اہمیت تروک مریک۔

فلکیات نا چاہندار آتا دا ہم پاننگ ارے کہ برج ”اسد“ نا خواجہ کس انا اثر اٹی (ماتحت) کاریم کننگ ءِ دوست توپک۔ نوکری ٹی بوریت محسوس کیک۔ تینا قائدانہ لائخی تے کاریم اٹ اتنگ کن بے قرار مریک۔

فلکیات نا چاہندار آتا رد اٹ برج ”اسد“ نا خواجہ نا نزوریک دادو کہ او بھاز وخت مادہ پرستی نا گواچی مریک۔ دولت مچ کننگ نا شوق تخک۔ واہم بھلا جوانی دا کہ اوتینا وقار آ ہچ ءُ کمپرومائز اس کپک۔ تینا کڑدار نا رد اٹ تلار آن سخت مریک۔

برج ”اسد“ کن ”جوزا، سنبلہ، میزان“ جوان ءُ سنگت مننگ کیرہ۔ سخت اِنگا ساہت اٹی اودے کاریم بننگ کیرہ۔ اسٹ ایلو نا فائدہ غاتا رکھ انا کوشست کیرہ۔ داڑکن ”جدی، حوت“ برج آک جوان ءُ یا باور کننگ نا وڑ اٹو سنگت مننگ کپسہ۔ بلکہ اونا ڈکھیائی ٹی خوشی محسوس کیرہ۔ وخت اس کہ ”ثور، عقرب، دلو“ برج آک اگہ فائدہ تفسہ تو نسخان ہم تفسہ۔ دوستی کپس تو دشمنی ہم کپسہ۔ اونا غم و خوشی تون ہچ ءُ است خواہی اس تخپسہ۔ برج ”اسد“ نا خواجہ کن یخ اِنگا گڑا مطلب کہ دیر و شربت آن مچٹ بھاز پاریز جوان مریک۔

براہوئی زبان نا ایلو عالم، ادیب و شاعر آتے ٹی پروفیسر گل بنگلزئی (2اگست 1935ء)، غلام نبی راہی (15 اگست 1939ء)، ڈاکٹر عنبرین مینگل (13 اگست 1973ء)، ڈاکٹر غلام سرور پرکانی (10 اگست 1957ء)، عبدالرازق ابابکی (4 اگست (1983ء)، نیلم مومل (14 اگست 1981ء) و شہزاد غنی (2 اگست1975ء) اس تا برج ”اسد“ ءِ۔ جہانی شخصیت آتے ٹی فیڈل کاسترو، مسولینی، جارج برنارڈشا، آرمسٹرانگ، طارق بن زیاد و صلاح الدین ایوبی اس تا برج ہم ”اسد“ ئس۔

زاہد براہوئی نا ودی دے ئی عدد (8 اگست 1976ء) ”8“ ءِ۔ ودی دے ئی عدد ”8“ انا خواجہ تنیائی محسوس کیک۔ دانا رد اٹ مخلوق غلط فہمی نا گواچی مننگ کیک۔ دے کی علم العلم الاعداد نا چاہندار آک ودی دے ئی عدد ”8“ ءِ جوان خیال کپسہ۔ علم الاعداد نا چاہندار آتا دا ہم پاننگ ارے کہ دا عدد نا بندغ (نرینہ مرے یا نیاڑی) حساس مریک، ہر گڑاءِ محسوس کیک۔ غلط فہمی تا ہم زو گواچی مننگ کیک۔ علم الاعداد نا چاہندار ”کیرو“ نا پاننگ نا رد اٹ ودی دے ئی نمبر ”8“ خوش بختی نا مون اٹی اڑانگ ہم ودی کیک۔ علامہ شبلی نعمانی، سر سید احمد خان، ہیلری کلنٹن اس تا ودی دے ئی عدد ہم ”8“ ئس۔

زاہدبراہوئی نا مرکب عدد ”35“ ء۔

(Zahid Brahui 7+1+5+1+4+=18- 2+2+1+5+6+1=17 +18=35)

دا عدد مالی و ادبی معاملہ غاتے ٹی نسخان نا باعث جوڑ مننگ کیک۔ نومرالوجی نا چاہندار آتا رد اٹ عدد ”35“ نا مطلب ہمودے ہرا کہ عدد ”26“ نا ءِ۔ عدد ”26“ اسہ غیر موافق ءُ عدد اسے۔ نومرالوجی نا چاہندار آک دا عدد تون تعلقدار بندغ آتتون کاروبار اٹی ہر وڑ انا شریکی آن پاریز کننگ نا پنت و شون کرینو۔ سرمایہ کاری کننگ اٹی عدد ”26“ نا بندغ آتے بھاز سجفوئی تمک۔ دا عدد تون تعلقدار بندغ آتے 4، 6 و 8 نمبر نا بندغ آتیان احتیاط کروئی تمک۔

زاہد براہوئی نا فطری اثر جذباتی ءِ۔ دُن کہ اونا پن نا لوز آک پاش کیرہ۔ جذباتی لوز آک ”Z,I,B,R,I“، ذہنی لوز آک ”A,H,A“، وجدانی لوز ”U“ و جسمانی لوز ”D“ ءِ۔ ہنداکان دا پک مریک کہ فطری گچین کاری ٹی جذباتی اثر زیات ءِ۔ جذباتی اثر نا خواجہ بندغ آک تینا خواہنداری ءِ مون آ تخسا تینا زندگانی نا فیصلہ غاتے کیرہ، جذباتی اثر نا فطری گچین کاری ٹی فنکارانہ آگہی ساڑی ءِ۔

ہفتئی تلار
تاک: 39
22-16 اکتوبر 2021ء
پنہ: 04