آخبت نا بوتار تا لٹ کٹائی
نجیب یاسین
دنیا نا تہٹی چندی خاہوت و مخلوق رہینگرہ۔ و کیہی وڑ اٹ تینا زند ءِ آسودہ کننگ کن نت و دو خلیرہ۔ داڑان اُلس نا خذمت ہم مریک و بیروزگار آتا روزگار ہم مریک۔ دا چندی بشخ آتیٹی طب (Health) ہم اسہ جوان ءُ بشخ اسے۔ ہراڑا بھلو مخلوق اس سیبو کننگ ءِ۔ اینو پگہ طب ہم بھاز مون مُستی گام خلکُنے۔ سائنس و ٹیکنالوجی نا سوب آن طب اینو بھاز بھلو پن اس کٹانے۔ ننا مخلوق ہم دا بشخ ءِ بھلو قدر اس ایتنگ ءِ۔ طب دنیا نا اسہ بھاز گچین ءُ بشخ اسے ہَرا ٹی نن تینا مخلوق نا کُمک ءِ ہر جاگہ ہر وڑ اٹ کننگ کینہ۔ کس اس ٹھپی مرے، یا کہ ناجوڑ مرے تو ماہر طب اودے وڑ انا وڑ اسے ٹی دوا دارو کیک کہ زرس آسرات مرے، یا او دا ناجوڑی آن پیش تمے۔ ننا طالب علم آک ہم بھلو ڈکھ و ویل آتیٹی خید و خواری کرسا کوشست کننگ ءُ کہ نن ہم طب اٹ اسہ جوان ءُ پن اس یا کسب اس دوئی کین تاکہ تینا مخلوق نا درمان ءِ کین۔ ولے اُست ہسونی نا ہیت دا مریک کہ دا ورنا تے ہم توننگ نا کوشست کننگک۔
منہ دے مُست ننا طب اَنا بیوس آ طالب علم آک سڑک آ پیش تمار کہ پاکستان میڈیکل کمیشن (PMC) تینا آن لائن ٹیسٹ اَنا پَڑو ءِ رد کے، انتئے کہ اونا بابت اوفتے بھلو گڑتی اس مون تروک ئسکہ۔ ولے اوفتا دا پُرامن آ برانز آ پولیس جلہو کرے و دا طالب علم آتے بھاز بے دادی اٹ لٹ تس۔ چندی مارکو و زالبول ٹھپی دتر چُر مسُّر۔ سرکار کیہی طالب علم آتے جیل اٹ بندی کرے۔ بندی کننگوک طالب علم آتے ٹی مارکو تا کچ بیست و پنچ 25 آن زیات ئس۔
سوج دا ودی مریک کہ برانز الس نا کانودی حق ءِ۔ داڑان دنیا ٹی کس اسے ہم توننگ مفک۔ گڑا سرکار امر کانود ءِ پرغک و دا الس نا رکھ و سنبھال کروک آتا دو آن ننا چناتے لٹ ترفک، اوفتا دتر تے سڑک آتیا وہفک؟ گڑا داڑان دا ہم پاش مریک کہ ننا تعلیم نا دشمن ننا تینا ادارہ غاک ءُ۔ دافتا دوک ننا طالب علم، ملازم و استاد آتا دتر اٹ لپی ءُ۔
قائد اعظم پاہک کہ طالب علم آک ننا بروک آ وخت اَنا بوتار و چراغ آک ءُ۔ ولے حیرانی نا ہیت دا مریک کہ کس تینا تارمہ نا چراغ آتے امر کسفک یا بے غرَز کیک بٹک؟ قائد اعظم تینا ملک پاکستان نا طالب علم آتے بروک آ دے تا بوتار، خواجہ، شاعر، دانشور، طبیب یا سیاستدان تکاکہ ولے اینو ہمو قائد نا ملک اٹ اونا تُغ تیا مش شارہ ہمو کودک، بیوس آ طالب علم آتے لٹ ایترہ و جیل آتیٹی بند کیرہ۔ سما اف کہ دا جنگل نا کانود ءِ یا سرکار تینا نابودی ءِ ڈکنگ کن نزوری آن کاریم ہلنگ ءِ۔ یا ننا سرکار اٹ تولوک آتا ملی کاریم ءِ اِلانے۔ او قائداعظم محمد علی جناح نا مُلک اَنا کانود ءِ اُست آن درینو۔
سرکار آن دا خواست یا اومیت مریک کہ او الس نا کُل کاریم تے جوانی اٹ سر ایتے۔ طالب علم آتے کُل ءِ آسراتی تے ایتے کہ او تینا تعلیم ءِ حقی وڑ اٹ مُستی درسا کیر و سرسہب مریر۔ سفارش، کنڈ ہلنگ و تینا بندغ آتے، تینائی تے مونی اتنگ نا جاگہ غا انصاف آن کاریم ہلنگے۔ حکومت آ دا ہم حق مریک کہ او الس نا خذمت اٹ جِک سلوک مرے، اوفتا کاریم تیٹ کمتی بف۔ دا سرکار آ ہچ حق مفک کہ او الس نا پرامن آ برانز آ جلہو کے، لٹ ایتے و جیل اٹ دے بندی کے۔ سرکار نا دا ہم زمواری مریک کہ او طالب علم آتے لٹ تروک آ بندغ آتے عدالت آن کانودی حساب اٹ سزا ترفنگ کن گام گیج کے۔
ہفتئی تلار
تاک: 34
17-11 ستمبر 2021ء
پنہ: 05