بیلہ شار………سیل و چکر………(3)

دا مچ آ معلومداری تیان پد ہم نن پاڷ والا چا کُنگن۔ ننا سفر نا سنگت خواجہ حاجی محمد امین و خواجہ عابد حسین دا سفر و قیام طعام آن خوش ئسر۔ چا کُننگ آن پد نن وضو کرسا ہموڑے اسہ چنکو مسیت اسیٹی دیگر نا نماز ءِ جماعت تون خوانان۔ فارسی ٹی اسہ متل اسے۔ ”صحبت صالح ترا صالح کند“ اسُل ہندن کنا ہم سفر ارا حاجی تون نیک عمل نا کسر ءِ ملا۔ دا ہڑتوم آ خواجہ غاک بھلو وخت اسے آن تینا ہر پنچ آ نماز آتے جماعت تون خوانرہ۔ کنے ہم اوفتتون سفرنا وخت آ دا فائدہ مس کہ کنا دا سفر اٹی کنا کُل نماز آک جماعت تون خواننگار۔

خیر نن نماز خواننگ آن پد تینا مزل بیلہ شار آن مچٹ مُر ئسن۔ و دا سفر کم و وَد گھنٹہ اسیٹی مس۔

بیلہ شار:۔

ہراتم کوئٹہ کراچی قومی سڑک آ سڑک نا ہڑتوم آ پارہ غا چنکا بھلامشک خننگر تو چاس کہ بیلہ شار یا ضلع لسبیلہ اٹی سر مسنرے۔ شار اٹی سر مننگ آن مُست قومی سڑک آ منہ چنکو بھلو پول تیان گدرینگوئی مریک۔ دا پول آک پِر کننگ نا وخت آ دیر انا تُرند گدرینگنگ کن جوڑ کننگانو۔ کل آن پنی و بھلا پول ”پرالی پول“ ءِ۔ او بیلہ شار آن خڑک انگا پول ءِ۔ ارٹمیکو نشانی بیلہ شار انا دادے کہ سڑک نا ہڑتوم آ پارہ غا غیر آباد ڈغارک خننگرہ۔

داڑے ڈغار نا دیر 40 یا 50 فٹ شیف ءِ۔ و کشاری مسخت کن دیر ءِ 150، 200 فٹ شیف خُتنگے تو ہَد و اویل اٹی جوان ءُ آبادی اس مننگ کیک۔ ولے ولدا ہم داڑے بھاز آ ڈغارک غیر آباد ءُ، دادے نن پہہ متون۔

پرالی پول انا بارو اٹ تو ای نمے وختی پاریٹ۔ دا پول کم و وَد اسہ کلو میٹر اس مُرغن ءِ۔ داڑان اندازہ خلنگ مریک کہ پھر تا مُد اٹی دا پول انا شیف آن اخس ءُ بھلو دیر اس گدرینگو ءِ۔ جئی آ سنگت آتا پاننگ ءِ کہ داڑے نوکاپ نا دیر داخس بھلن مریک کہ گمان مریک کہ دیر پول انا زی آن گدرینگو ءِ۔ یا کہ پول ءِ درو۔

دا پول آن گدرینگ انگ آن پد مچٹ ءُ سفر اسے آن پد سڑک نا چپیکو پارہ غا ”بیلہ کراس“ ءِ، ہراکان شار اٹی ہِننگ کن چندی وڑ انا سواریک اریر، اوفتیٹی رکشہ، چنگچی، سوزوکی اوار ءُ۔ دا سواری تیٹی بھاز آ مسافر آک اسہ جاگہ غا سفر کیرہ۔ یعنی جتا جتا جاگہ غاتیان بروک آ مسافرک شار آ ہِننگ کن دا سواری تیٹی سفر کیرہ۔ او مچٹ ءُ کرا سیٹی 4 کلومیٹر (بازار اسکان) نا سفر ءِ کننگ کیرہ۔ ہندا بیلہ کراس آ دے و نن پاٹ انا کَٹ آک تخوک خننگرہ۔ ہرا مسافر آتا آرام یا تولنگ کن مریرہ۔ بیلہ کراس نا راستیکو پارہ غا سنگل سڑک اس شار آ کاہک۔ ہنداکان بیلہ شار انا آبادی بنا مریک۔ بیلہ کراس آن شار اکن ہنوک آ قومی سڑک جاگہ جاگہ غا پنانے۔ و دا چندی سال آتیان ہندن ءِ۔ ولے دا وا ر اسہ جوان ءُ بدلی اس خننگا کہ داسہ نا وزیراعلیٰ جام کمال خان عالیانی نا خیالداری شار انا پارہ غا ہم ارے۔ و شار اٹی سڑک و شار آن پیشن بائی پاس جوڑ مروک خننگا۔ ہراڑان جام کمال خان ءِ مبارک بادی ایتنہ۔ ای نمے اسہ لس وڑ انا خیال اسینا پاوکہ نی اخس کہ لائخ و کاریم کروک اوس و ایماندار اس مریس ہر جاگہ غا شونداری ڈٹ آتے بنا کیس ولے اگہ نا جند انا حلقہ ٹی کاریم متو ہراکان کہ نی کٹانُس و اسمبلی ٹی سر مسنس تو نا بارو اٹ مخلوق جوان ءُ خیال تخپرو۔

بیلہ شار اٹی پترینگ انگ تون مشکل اٹ ارا مسہ کلومیٹر نا مُری آراستیکو پارہ غا جماعت اسلامی بیلہ نا اسہ گچین ءُ مہمان خانہ، مسیت و اسکول اسے۔ ای ہر وخت نن ءِ ہنداڑے گدریفوہ۔ دا وار ہم ننا مہماندار خواجہ عبدالستار رونجہ ہنداڑے نن کن بست و بند کریسس۔ شام انا نماز آن زرہ اس مُست نن مہمان خانہ ءِ سر مسن۔ مہماندار آک ننا انتظاری ئسر۔ اِرا کَٹ و اوفتا مون آ اسہ پنکھہ اس تخوک ئس۔ اوڑے سر مننگ آ ننے جوان وڑ اٹ بیا بخیر کننگا۔ کٹ آتیا توسُن تو ننے دیر تننگا۔ اوکان گڈ اسہ جوان ءُ چا اسے نا دور چلینگا۔ ہنداڑتون شام انا نماز کن آذان مس۔ و نن کل نماز کن مسیت آ ہنان۔ تینا مالک نا منت ءِ ہرفین و پدی بسن کٹ آتیا توسُن۔

دادے تیٹی بیلہ نا موسم باسُن مریک۔ حویلی ٹی کٹ آتے تخنگ نا مطلب ہم ہندادے کہ کمرہ غاتیٹی باسُنی ءِ۔ ہراڑے نئے تولنگ مریک و نئے لیٹنگ۔ باسنی تا شامک زیبدار مریرہ۔ و اگہ جاگہ اس خلقی چاگڑد اس ملے تو نی باور کیس خوش بخت آتتون اوار اُس۔ خلق آتیٹی نیاڑی نرینہ تینا جتا جتا ٹولی جوڑ کیرہ و باسنی نا شام و نن تے تین پہ تین تون اوار تولسا ہیت و گپ اٹی گدریفرہ۔ و اسٹ ایلو نا ویل و مشکل آتے معلوم کیرہ۔ چاگڑد بھاز جوان مریک۔ ہندا کٹ آتیا و اوفتیا تنک ءُ چادر اس شاغوک و مون آن چلینگوک آ پنکھہ دا خلق آتیٹی خننگرہ۔

خفتن نا نماز آن گڈ ننے نن نا اِرغ کن قومی سڑک آ جوڑ منہ پوسکن جوڑ مروک ءُ ہوٹل آتیا دریر۔ اوڑے مزئی ءُ اِرغ اس کننگ آن پد چا کُنگن و ننکان 12بجہ غا خاچنگ کن مہمان خانہ غا بسن۔ کنا ایلو سنگت آک حویلی ٹی تخوک آ کٹ آتیا خاچار ولے ای کمرہ ٹی خاچاٹ۔

امن و ایمنی نا حالیت:۔

داڑے دا ہیت ءِ نمے ضرور پاو کہ دن ءُ پین شار اس مفرو ہراڑے دن ءُ ایمنی اس مرے۔ ہرا بیلہ شار اٹی ءِ۔ ای سال آتیان داڑے بننگ اٹی اُٹ۔ ولے اسہ ویل اسے آن بیدس پین ہچ ءُ بے ایمنی سینا خبر متو۔ نم تینے داڑے بھاز رکھوک و خوندی خنرے۔ بیلہ شار انا خڑک اٹی ہر پارہ غا خلق آک ءُ، و اوخلق آتیٹی چار دیوالی نا خیال ہم اف۔ مخلوق خرن آ آسمان نا کیرغ آن آرام اٹ رہینگک۔ ہر اُرا غا چار دیوالی و بھلا درگہ لگوک ءِ، ولے اوفتا مجال ءِ کہ تہہ آن چٹکنی خلوک مرے۔ دُزی و پین بے ایمنی نا خیال ہم اف۔ کنے تینٹ مُست انا دور ہ نا وخت آ اسہ آزموندہ اس مس۔ دیر انا بالٹین اس ہرفنگ کن خواجہ حاجی کرامت اللہ خان تون اسہ درگہ اسے آ وار وار آ ٹکیفنگ آن پد ہم کس پیشن بتو توخواجہ کرامت اللہ خان کنے تہٹی ہِننگ نا پارے۔ کنے بھاز خلیس ہرفے ولے ہراتم ای حویلی ٹی پیہاٹ تو تہٹی کمرہ غاتا درگہ غاک ملوک ئسر و کس اس اوڑے الو۔ پک ءِ کہ دا وڑ انا ایمنی پاکستان اٹی پین جاگہ اس مشکل ءِ خننگے۔

سہب اتون ننے 5 بجہ غانماز کن بش مروئی ئس۔ ولے دم درینگ انگ و ننکان ہُرے اسکان سوشل میڈیا تون گٹ مننگ و ہُرے آ خاچنگ نا سوب آن ای ہُرے آبش مسٹ موبائل آ خلوک آ 7 بجہ نا الارم آ کنا خنک ملنگار تو کھڑکی آن بروک آ دے انا روشنائی آن اندازہ مس کہ کنا سہب انا نماز قضا مسنے۔

9بجہ غا کنے خواجہ عبدالستار رونجہ نا حکم آ اسکول آ سر مروئی ئس۔ ہراڑے ”قرطبہ اسکول“ اٹی پرنسپل کن مچ آ شار آن بروک آ اومیتدار آتا انٹرویو کروئی ئس۔ حویلی ٹی خاچوک آ سنگت آتے کنے بش کروئی ئس (کنے دا خبر الو کہ اوفک سہب انا نماز ءِ خوانانو خاچانو یا استو نا ءِ خاچوک ءُ) خواجہ عبدالستار رونجہ 8 بجہ اسکان ننے نہاری کرفے۔ نن کُل اسہ مزہ نا نہاری اس کرین۔ اسکول آ سر مننگ آن مُست مہمان خانہ نا خڑک آ آبادی ٹی خواجہ انجینئر عبدالقادر رونجہ نا پارہ غا ہنان۔ اودے ننے تینا باغ ءِ نشان تروئی ئس۔ ”کاکا گارڈن“ بیلہ شار انا اسہ چنکو خلق اس ”احمد آباد“ ءِ زیبا کرینے۔ دُن تو خواجہ انجینئر عبدالقادر رونجہ و اونا مار لس وڑ انا بندغ لگرہ ولے اونا فطرت نا زیبائی و تینا بے حساب آ محنت و خواری اٹ دا باغیچہ ءِ جوڑ کرینے۔

ایکڑ آن مچے کم ڈغار آ دا باغ انا پیشن نا ہَد و اویل اٹی بئے بوچ و پاٹ خننگرہ۔ ولے باغ انا بھلا درگہ غان تہٹی پیہنگ تون اسہ خوشبو دار ءُ تہو اس لگک و باغ اٹی اسہ پارہ غا ”جاگنگ ٹریک“ (پیدل چرینگ کن کسر) اسے۔ ہراڑٹ چرینگسا تینا جان دراخی ءِ برجا تخنگ مریک۔ خواجہ انجینئر عبدالقادر رونجہ نا پاننگ ءِ کہ دا باغ اٹی ہمو ہر شش آ میوہ غاتا درخت آک لگوک ءُ، ہرافتا ذکر قرآن شریف اٹی بسنے۔ دا باغ اٹی انجیر، امرود، جامن، زیتون، اِلار، انار، کیلا، فالسہ، پستہ، چیکو و املی اوار ئسر۔ وخت اس کہ پُھل آتیٹی گل گلاب، چمبیلی، موتیا، دن کا راجا و رات کی رانی پنی ءُ۔

نن ہراتم باغ اٹی سر مسن تو انجینئر عبدالقادر رونجہ نا دوٹی چا انا کوپ اس ئس۔ و نن کن ہم چا و مائیچہ ایسر۔ اوڑے جوڑ اسہ جُگ اس کہ او انجینئر صاحب نا کمال اٹ جوڑ کننگاسس ہموڑے توسُن چا و مائیچہ غاتے نوشی جان کرین۔ باغ اٹی جاگہ جاگہ اقوال زریں و پنت و شون آک نوشتہ ئسر۔ دافتیان بیدس کنے ہرا گڑا وڑا او دا باغ اٹی پبلک لائبریری ئس۔ داڑے بروک آتے کن قہوہ خانہ اس ہم جوڑ ءِ۔ لائبریری ٹی کتاب آک ہم ئسر ہندا سوب آن ای کتاب دوست آ سنگت آتیان خواست کیوہ کہ اوفک اگہ داڑے کار تودا لائبریری کن تین تون کتاب ضرور دیر۔

”کاکا گارڈن“ نا زیبداری ءِ سیل کننگ آن پد نن قرطبہ اسکول آف ایکسیلنس نا پارہ غا راہی مسن۔ ہراڑے انٹرویو کن بروک آ اومیتدار آک ننا انتظاری ئسر۔

ہفتئی تلار
تاک: 34
17-11 ستمبر 2021ء
پنہ: 04