پروفیسر خدا داد گل (برج جوزا)

پروفیسر خدا داد گل (ودی دے 8 جون 1956ء) نا برج ”جوزا“ (Gemni)، حاکم استار ”عطارد“ (Mercury)، نشانی ”جاڑ انگا چُناک“، کلید وجود ”دماغ“، تَب ”بادی (ہوائی)،“ پیشن نا ہزوہ ”کوپہ“، تہہ انا ہزوہ ”پف“، ودی دے مُد (برج) ”22 مئی آن 21جون“، ہم تب برج آک ”میزان، دلو“، جتا تَب برج آک ”سنبلہ، قوس، حوت“، بے کنڈ ہلوک برج آک ”عقرب، جدی“، ہجی نا حرف آک ”ق، ک“، مرکب عدد ”39“۔ لائف پاتھ عدد ”9“ ءِ۔

برج ”جوزا“ نا خواجہ بھاز ذہین مریک، اختراعی ذہن تخک، ہر کاریم ءِ جوان آن جوان وڑ اٹی کروک مریک۔ راجی کاریم تے ٹی ہم بشخ ہلوک مریک۔ ہر وڑ انا کاریم تے ٹی تینا کاری گری ءِ نشان ایتک۔ ہندا کاریم تے ٹی بشخ ہلوک آ ایلوفتے ہم جوان اِنگا نظر اٹ ہُرِک۔ ولے ایلوفتا پابندی ءِ قبول کپک۔ مزل آ سر مننگ کن مدام کوشست کروک، تینا خواہنداری ءِ ایسر کننگ کن جہد و کوشست کیک۔ تینے مدام مصروف و مشغول تخوک مریک، وخت ءِ زیان کننگ ءِ گناہ سرپند مریک۔ دا برج والا بھروسہ نا وڑ اٹ مریک،ایلوفتا کمک کننگ اٹی خوشی محسوس کیک۔ سیل و سواد نا شوقی مریک۔ جوان ءُ ڈرامہ نگار اس، جوان ءُ سفر نگار اس، جوان ءُ آرٹسٹ اس، جوان ءُ صحافی اس مننگ کیک۔ ہرا وخت لکھنگ آ برے تو جوان اِنگا جوان اِنگا سرحال آتیا لکھک، لکھنگ کیک۔ تینا خیال آتا پاشی ٹی آجو مریک۔ ہر کاریم نا روشن اِنگا پالو تیا نظر تخوک مریک۔ مثبت سوچک۔ ولے ہرا وخت منفی سوچا تومالی مشکل آتا گواچی ہم مریک۔ مالی ویل آتے ٹی اختہ مرسا فریشانی ٹی گم گار مریک۔

برج ”جوزا“ والا محبت اٹی وفا و خلوص نا قدر کروک مریک۔ محبت کرے دیانت داری ءِ تینا کمامداری سرپند مریک۔ ولے جنسی معاملہ غاتے ٹی پابندی قبول کپک۔ اوٹی دا نزوری ہم مریک کہ اسٹ آن زیات تون دوستی تخک۔ دوستی ٹی عشق انا کچ اِسکان سر مریک۔ دا برج والا تنیا پسند مریک، بے کار انگا سنگت آن بوریت محسوس کیک۔ زو چڑک، خار اٹی سفا وحشی جوڑ مریک، ولے ہچ ءُ وڑ اسے ٹی تینا ذہنی توازن ءِ گوہپک۔ واہم خار انا دو آن تینا ذہنی لائخی تے زنگ خلفک۔

فلکی علم انا چاہوک آتا رد اٹ برج ”جوزا“ نا خواجہ کن برج ”میزان، دلو“ ناخواجہ بندغ آک جوان ءُ دوست مننگ کیرہ۔ ”سنبلہ، قوس، حوت“ برج والا بندغ آک اوڑکن قابل اعتبار دوست مننگ کپسہ۔

پروفیسر خدا داد گلؔ نا لائف پاتھ عدد ”9“ ءِ۔ دا لائف پاتھ عدد انسان دوست عدد اسے۔ داڑکن پنت و شون ہمدردی ہیل کننگ ءِ۔ دا عدد والا تخلیق کاری ٹی سرسہبی دوئی کننگ کیک۔ دانا کلیدی لوز آک ہمدردی، انسان دوست، رومانٹک، ڈرامائی، تخلیق کار، مقناطیسی کشش ءِ۔ دا عدد والا تے کن ہر وڑ انا گیگ آک ساڑی ءُ۔ دا سوب آن کہ عدد ”9“ مچ آ عدد آتے تیناتہٹی ڈکوک تخوک ءِ۔ دا زندگانی ءِ ہر انسان کن آسان جوڑ کیک۔دا عدد نا منفی پالو دادے کہ بے صبر مریک۔ کڑدار آتا چاہنگ اٹی نزور ءِ ہندا سوب آن مخلوق اودے تینا مسخت کن کاریم اٹ اتنگ کیک۔ عدد نا چاہوک آتا پاننگ ءِ کہ اردو نا پنی آ شاعر فیض احمد فیض، پنی آ شئیر پاروک نصرت فتح علی خان نا لائف پاتھ عددہم ”9“ ئس۔

پروفیسر خداداد گل نا مرکب عدد ارے تو ”39“ ءِ۔

(Khuda Dad Gul 2+5+6+4+1+4+1+4=27– 3+6+3=12– 27+12=39)

ولے دا عدد نا مطلب و عدد 12 نا اسٹ ءُ۔ بدقسمتی اٹ علم الاعداد نا چاہوک آک پارہ کہ دا (12) جوان ءُ عدد اس اف، دا اسہ بدقسمتی نا عدد اسے۔ ایلو بندغ آک دادے تینا مفاد کن کاریم اٹ اتیرہ۔ دا تینا زندگانی ٹی ایلوفتا فریشانی و مشکل آتا باریم ءِ تینا کوپہ غاتیا ہرفک چرّینگک۔

پروفیسر خداداد گل نا برج ”جوزا“ ءِ۔ براہوئی زبان نا ایلو شاعر ادیب آتے ٹی خلیفہ گل محمد نوشکوی (10 جون 1990ء)، شاہین بارانزئی (19 جون 1974ء)، وحید زہیر (3 جون 1961ء)، عبدالجبار یارؔ (3جون 1949ء) و حاجی شاہ بیگ شیدا (3 جون 1953ء) اس تا برج ہم ”جوزا“ ءِ۔

ہفتئی تلار
تاک: 34
17-11 ستمبر 2021ء
پنہ: 05