وزیراعلیٰ بلوچستان نا پولیو تور مہم نا سرسہبی کن نیک است خواہی

کوئٹہ: وزیراعلیٰ بلوچستان میر عبدالقدوس بزنجو بلوچستان نا 18 ضلع غاتا 393 یونین کونسل آتیٹی دوشنبے آن بناکروک آ 7 دے ئی انسداد پولیو مہم نا سرسہبی کن نیک است خواہی نا درشانی ءِ کرینے۔ وزیراعلیٰ ہاؤس آن دوشنبے نادے آ جاری کروک بیان اٹی وزیراعلیٰ داگمان نا درشانی ءِ کرینے کہ پولیو مہم اٹی 5 سال انا وئی آن کم غٹ چناتے پولیو نا رکھی پڑی کنفنگک ہراچناتے ٹی قوت مدافعت ءِ ودفنگ و اوفتے دا ناجوڑی ءِ مدامی کن شکست تننگ اٹ کمکار مریک وزیراعلیٰ پارے کہ دامہم نا سرسہبی کن المی ءِ کہ راج انا غٹ تپہ غاک داٹی تینا اہم کڑد ءِ ادا کیر، وزیراعلیٰ داہیت انا درشانی ءِ کرے کہ دا ناجوڑی نا برخلاف اجتماعی کوشست آتے ترند کننگ نا گرج ءِ ہراڑکن لمہ و باوہ، عالم دین، سول سوسائٹی و میڈیا ءِ تینا گچین کڑد ءِ ادا کروئی ءِ تانکہ داناجوڑی ءِ ماس کش کننگ اٹ سرسہبی ملنگ کے۔ وزیراعلیٰ بلوچستان میر عبدالقدوس بزنجو پارے کہ مہم اٹی غٹ عملہ ءِ فول پروف سیکورٹی تننگک ہراڑا بلوچستان لیویز، پولیس و ایف سی نا ورناک تعینات مریرہ۔ اوپارے کہ بلوچستان آن پولیو نا موذی مرض انا سد درسد چٹفنگ کن پین خواری و لگن اٹ کاریم کننگ نا گرج ءِ۔

(اے پی پی)