لٹ خانہ                   54

ہراتم یوسف عزیزمگسی نا سزا پورو مس، او زندان آن آجو مس تو داڑے بلوچستان اٹی تینا سنگت آتتون اوار باقاعدہ سیاسی تحریک اسے نا بناءِ کرے۔

لگک ہندن کہ نظامانی صاحب سندھ اٹ تینا سیاسی کاریم تتون اختہ مرسا ہم دا خواجہ غاتتون رابطہ ٹی مسنے کہ او داڑے بلوچستان اٹی ہم سیاسی شعور اتسا کاریم نا خواستگار مسنے۔ اونا اولیکو رابطہ کار سیاسی سروک یوسف عزیز مگسی و محمد حسین عنقا اسک مسنو۔ عنقا صاحب و نسیم تلوی صاحب کراچی آن اخبار اسے نا شینکاری کن بھلو جہد اس کریر۔ اودے تیٹ بلوچستان آن اخبار اسے نا شینکاری تو تینا جاگہ غا داڑے اخبار نا خواننگ ہم ڈوہ اس ئس۔ اخبار خواننگ ہم ایف سی آر نا ضابطہ نا تہٹی ڈوہ اس ئس ہراڑکن سزا تننگاکہ۔

عنقا صاحب اخبار نا شینکاری کن کراچی ٹی کوشست کرے۔ شورش صاحب تون ہمو پروفائل ئس ہرادے نن جامعہِ بلوچستان نا مرکز مطالعہِ پاکستان کن خواجہ کرار حسین صاحب نا کمک اٹی بہاٹی ہلکوسُن تاکہ پولکار آک داڑان فائدہ ہرفر۔

دا پروفائل اٹی گڑاس اخبار نا منہ تاک ئسُر۔ پاش ئُ ہیت اسے او وخت آ تیوی اخبارک ہفت روزہ یا پانزدہ دے ئی مسرہ۔ البلوچ، بلوچستان، اتحادِ بلوچاں، ینگ بلوچ وگڑاس پین۔

ہندادے تیٹ عنقاصاحب ہم نظامانی آن اثر ہلسا ”بائیں بازو“ نا سیاست آن زہمی مس۔

اسہ وڑاسے ٹی او کیمونسٹ پارٹی ٹی اوار مس۔ دادے تیٹ سندھ، صوبہ بمبئی تون اوار ئس۔ سندھ کیمونسٹ پارٹی ہندا صوبہ نا پارٹی ئس۔ ولدا دانا پڑشابیت مرسا نظامانی وعنقانا کارکڑد نا سوب آن بلوچستان اسکان سرمس۔ اسلم اچکزئی صاحب ہم ہنداپارٹی ٹی اوارمس اوجیکب آباد اٹی رہینگاکہ۔

مڑوئی داغٹ ہیت آتے ای اندازہ سے تون لکھنگ اُٹ داپڑ آ پٹ وپول نا گرج ارے۔

ہراڑسکان کنا خیال ءِ بلوچستان اٹی ”بائیں بازو“ نا سیاست ءِ تالان کننگ اٹ قادربخش نظامانی نا بھلو دو اس مسنے۔ سوویت یونین آن بلوچستان نا مخلوق اثرپذیری ٹی اوفتا کارکڑد آن نمن مننگ کپک۔ دُن توداکان مہالو بنا ٹی مصری خان کھیتران واونا سنگت آک ہم دارداٹ داڑے کاریم کریسُر۔ ترکمانستان نا بلوچ اس کریم خان وسفرخان ہم اوفتا ہمراداری ٹی 1920ءانا دے ٹکی مسلمان تا راجی کانفرنس ہراکہ باکُوٹی مسوسس داٹی اوار ئسُر۔ پدا تحریکِ خلافت وبلوچستان آن اوغانستان و ولدا سوویت یونین کن ہجرت کننگ نا ارادہ ٹی داکان اوغانستان کن مخلوق نا لَڈّنگ۔ داکل واقعہ وویل آک بلوچستان نا مخلوق ءِ سوویت یونین و بالشویک انقلاب نا شیدائی کریر۔ نن توچنکی ٹی بالشویک آتتون اوار امان اللہ خان و مصطفی کمال نا سفت آتے بنگنہ۔ و تینا مخلوق اٹی ہجرت نا سال نا حوال ءِ ہم بنگن۔ مخلوق بھاز آ واقعہ غاتا حوالکاری وخت آ پاریکہ ”مہاجرانی سالا“ یعنی مہاجر تا سال نا حوالہ ءِ ترسا واقعہ نا وخت ءِ پک کریرہ۔ ننا کہول و ننا خلق آن ہم گڑاس بندغ ہمینگ امپسا ہجرت کریسُر۔

وخت وخت اس نظامانی صاحب نا ہیت آتیان معلومداری مسکہ کہ اونا کہول نظامانی، سندھ تالپور آتا دورِ حکمرانی ٹی سلہہ بند لشکر اٹی اولیکو دستہ نا کاریم ءِ کرینے۔ ہراتم سندھ اٹی تالپور تا حکمرانی چُٹّا تو اوفتے ہم داڑان پد بھلو خواری و زحمت ہرفوئی تما۔ قادربخش نا پیر انگاک ہندا بندغ آتیان ئسُر۔

ٹنڈو قیصر اوفتا خلق ءِ۔ شایدقیصر خان اونا بُن پیرہ مسنے۔ بلوچی دود آتارداٹ اونا اسہ نواسہ اسے نا پن ہم قیصرخان ءِ۔ غلام محمد نظامانی نا مارک داسہ لندن اٹی رہینگرہ۔

قادربخش نظامانی وخت اس کتابچہ اس ”جنگِ میانی“ نا پن اٹی لکھا۔ میانی ہمو گڈیکو ”رزم گاہ“ (جنگ انا پڑ) ءِ ہرا حیدرآباد اٹی ءِ۔ اوڑے تالپور ونظامانی تے انگریز آک شکست تسُر۔ دا کتابچہ ءِ خوانسا بلوچی زبان نا پنی آ شاعر مرادساحر ”میانی“ نا پن اٹی اسہ مرغن ئُ نظم اس لکھا۔ ہراکہ اونا اولیکو شعری مجموعہ ”پاہار“ اٹی مرو۔

میر پورخاص نا میرک گیشتری نظامانی تتون سانگ بندی کیرہ۔ عبدالرسول نظامانی اوفتا سیال اسے۔

قادربخش آن سما تماکہ اونا باوہ بھاز دیندار ئُ عالم اس مسنے۔ او مولاناعبیداللہ سندھی وہمو عالم آتا تحریک تروک موالات و خلافت آن بھاز متاثر ئس۔ عبیداللہ سندھی اوغانستان اٹی امان اللہ خان نا زمانہ ٹی مہاجر آتا راہشون آتیان ئس، او مولانا کفایت اللہ اس تا سنگت آتیان ئس۔ پاریکہ او ہم سوویت آ ہناسس وہمو وخت آ لینن وایلو ہندوستانی راہشون تتون مِلّاسس۔ دا توکل ءِ خبر ءِ کہ مولاناعبیداللہ سندھی اسہ روشن خیال و ترقی پسند ئُ عالم اس ئس، ہندا سوب آن عبیداللہ سندھی صاحب سوشلزم نا شیدائی تیان ئس۔

مننگ کیک کہ ہندا چاگڑد قادربخش ءِ چنکی آن دا پارہ نا نظریہ نا کنڈ آ چکا۔ پدا او ہمو قافلہ تون اوار تما ہرا بالشویک تحریک و سوویت یونین بلاک نا مخ تف ئسُر۔ ہرافک مخلوق ءِ مارکسزم کن رُغامارہ۔ ہرافتے ٹی یوسف علی خان تینٹ ہم اوار ئس۔ دا حوالہ ”الحنیف“ نا خصوصی ئُ نمبر اسے ٹی شینک مروک اونا چٹھی اسے آن دوئی کننگانے، ہراٹی او محمد امین کھوسہ ءِ ہندا پارت کریسس۔

قادربخش نظامانی ورنا ئس۔ اسہ پارہ غان سندھ اٹ تالپور ونظامانی تا برطانیہ نا استعمار وکوزہ گیری نا خلاف جنگ اودے راجی جوزہ تس۔ او بھاز سوبر ئُ راجی سوچ اسے نا خواجہ ئس۔ ایلو پارہ غان ’بائیں بازو‘ نا سیاست ہرا مولانا عبیداللہ سندھی وسندھ بلوچستان اٹی تینا اثر ءِ تالان کرسا روتہ خلنگ ئس، اودے سوشلزم نا پارہ غا چِکّا۔ ہندا سوب آن او یوسف علی خان مگسی و اونا سنگت آتا پارہ غا برسا لَٹ خانہ و راجی تحریک تون اوارمس۔

ماہتاک ”سنگت“کوئٹہ ‘مارچ1999ء