ترکیہ و شام اٹی زمی جمب،زوال مروک آتا کچ 41 ہزار مس

انقرہ: ترکیہ و شام اٹی زمی جمب نا سوب آن زوال مروک آتا کچ 41 ہزار آن گدرینگانے۔ وخت اس کہ اسہ ہفتہ غان پد بھس مروک ماڑی تا کیرغ آن 9 بندغ ءِ زندہ کشنگانے۔ سعودی میڈیا نا رداٹ ترک صدر رجب طیب اردگان زمی جمب آن پد امنا کریسس کہ بناٹی دمدستی حکومتی ردعمل اٹی گڑاس ویل ئسر ولے داسہ حالیت آک دُو آن پیشن افس، اوانقرہ ٹی اسہ ٹیلی ویژن تران اسے ٹی پارے کہ نن نئے بیرہ تینا ملک بلکن انسانیت نا تاریخ نا غٹ آن بھلا قدرتی آفت تون مون تننگ اٹی اُن۔ تدوک آ دے زندہ ریسکیو کروک آتیٹی 17 و 21 سال انا اِرا ایلم ہم اریر ہرافتے کہرامنماراس صوبہ ٹی اپارٹمنٹ آتا کیرغ آن کشنگا۔ انطاکیہ ٹی شامی بندغ و زالبول اس دوسد آن زیات گھنٹہ اسکان دمب انا کیرغ آن ئسر، ریسکیو کننگار۔ اسہ کمکی کارندہ اسے نا پاننگ ئس کہ داسکان پین بندغ زندہ بچنگ کیرہ، اقوام متحدہ نا کمامدارآک پاریر کہ ریسکیو نا ریسہ بند مسنے و داسہ چکار ہنکین، خور و اسکولنگ آٹی ءِ۔ یورپ کن جہانی ادارہ جان جوڑی نا ڈائریکٹر ہانس ہنری پی کلوج نا رداٹ ضرورت آک بھاز زیات ءُ و گھنٹہ نا حساب اٹ ودنگ ءُ۔ ہڑتوم آ ملک آتیٹی کم و ود اِرا کروڑ 60 بندغ ءِ انسانی کمک نا گرج ءِ۔ اقوام متحدہ پارینے کہ شام اٹی کم و ود 90 لکھ بندغ زمی جمب آن زہمی مسنو و او 40 کروڑ ڈالر فنڈنگ نا خواست کرینے۔

(اے پی پی)