موسمیاتی بدلی تا چیلنج آتے توننگ کن پٹ و پول نا گرج ءِ، وزیر اعظم

اسلام آباد : وزیراعظم محمد شہباز شریف پارینے کہ پاکستان آ موسمیاتی بدلی نا اثر، دیر، توانائی و غذائی رکھ کون آ چیلنج آتتون مون تننگ کن فصل آتا زیات پیدوار و خشک سالی نا برخلاف مزاحمت کروک آ فصل آتا وڑتیا پٹ وپول نا چرجوئی ٹی انٹرنیشنل اٹامک انرجی ایجنسی (آئی اے ای اے) تون زیات آن زیات کمک کننگ نا گرج ءِ، آئی اے ای اے نا ڈائریکٹر جنرل چاگڑدی ویل آتون مون تننگ کن جوہری ٹیکنالوجی نا کاریم اٹ اتنگ ءِ ودفنگ نا گرج آ امنا کرینے۔ چارشنبے نادے آ وزیراعظم آفس نا میڈیا ونگ آن جاری بیان نارداٹ وزیراعظم محمد شہباز شریف تون انٹرنیشنل اٹامک انرجی ایجنسی نا ڈائریکٹر جنرل رافیل ماریانوگروسی اوڑدہی کرے۔ داوخت آ وزیراعظم ڈائریکٹر جنرل ءِ بخیر کرسا آئی اے ای اے و پاکستان نا نیام اٹ جان جوڑی، کشت وکشار، صنعت، جوہری دوائی و بجلی نا پیدوار نا بشخ آتیٹی برجا کمکاری نا ستاءِ کرے۔ وزیراعظم ایجنسی نا چندی ڈٹ و پروگرام تیکن پاکستان نا پورو مخ تفی نا درشانی ءِ کرسا ایجنسی نا کاریم اٹی مہارت و تکنیکی کمکاری نا وصول کروک و فراوان کروک نا وڑاٹ کمکاری ءِ ودفنگ کن پاکستان نا است خواہی نا درشانی ءِ کرے۔ وزیراعظم ڈائریکٹر جنرل گروسی ءِ پاکستان اٹامک انرجی کمیشن (پی اے ای سی) نا بست وبند اٹی 19 کینسر ہسپتال آتا اہم کڑد انا بارواٹی حوال تس ہرا پاکستان اٹی کینسر نا درمان اٹی نمان کڑد ادا کننگ اٹی ءُ و لس مخلوق ءِ اڑزان درمان نا فراوانی ءِ پک کننگ ءُ۔ ڈائریکٹر جنرل چندی بشخ آتیٹی نیو کلیئر ایپلی کیشن تیٹی پاکستان نا مہارت نا اعتراف ءِ کرسا پارے کہ پاکستان ایجنسی نا کاریم اٹی کمکاری کن اہم کڑد اس ادا کننگ کیک ہراٹی کینسر نا درمان کن ”اومیت نا روشنائی“ نا گام ہم اوار ءِ۔ وزیراعظم پاکستان آ موسمیاتی بدلی تا اثر، دیر، توانائی و غذائی رکھ کون آ چیلنج آتون مون تننگ کن فصل آتا زیات پیدوار و خشک سالی نا برخلاف مزاحمت کروک آ فصل آتا وڑتیا پٹ وپول نا چرجوئی ٹی انٹرنیشنل اٹامک انرجی ایجنسی (آئی اے ای اے) تون زیات آن زیات کمکاری نا گرج آ زور شاغسا پارے کہ پاکستان نا انرجی مکس اٹی جوہری توانائی نا کڑد اڑزان و ساف توانائی نا ءِ۔ آئی اے ای اے نا ڈائریکٹر جنرل پاکستان کون آ ملک آتیٹی جوہری ٹیکنالوجی نا کاریم اٹ اتنگ ءِ ودفنگ نا گرج آ امنا کرے تانکہ چاگڑدی ویل آتا بابت غٹ چیلنج آتون مون تننگ مرے۔ اوپاکستان اٹی کشاری پٹ وپولی ادارہ بشمول این آئی اے بی ہراکہ آئی اے ای اے نا کمکاری ءِ کروک آ ہند آتیان اسٹ ءِ، نا ستاءِ کرے۔ یات سلے کہ آئی اے ای اے نا ڈائریکٹر جنرل پاکستان نا اِرادے ئی دورہ غاٹی ءِ۔ او پاکستان اٹی تینا اڈکننگ اٹی چندی جوہری آسراتی تا جاچ ءِ ہلنگ تون اوار اوار کینسر نا درمان نا ہند و کشاری پٹ وپولی ادارہ غاتا دورہ ءِ کیک ہرا پائیدار شونداری کن جوہری ٹیکنالوجی آن کاریم ہلنگ اٹی ءُ۔ اونا دا دورہ غان اودے پاکستان نا کنڈآن جوہری رکھ و سلامتی نا گچین آب انا مشاہدہ کننگ نا موقع ہم ملک۔

(اے پی پی)