پاکستان تحریک انصاف مشکل نا دا ساہت اٹ الس ءِ تنیا الیپک‘ قاسم سوری
Get real time updates directly on you device, subscribe now.
کوئٹہ: پاکستان تحریک انصاف نا راہشون و ڈپٹی اسپیکر قومی اسمبلی قاسم سوری پارینے کہ ملکی تاریخ اٹ اولیکو وار غریب آتے ٹی احساس پروگرام نا رد اٹ پیسہ بشخنگ نا چرجوئی برجاءِ‘ پاکستان تحریک انصاف مشکل نا دا ساہت اٹ الس ءِ تنیا الیپک‘ صوبائی حکومت ءِ ہچ خطرہ اف‘ اختلاف تخنگ جمہوریت نازیبائی ءِ‘ وزیراعلیٰ بلوچستان جام کمال ناکماشی ٹی صوبائی حکومت کورونا ءِ توننگ کن پبی گام گیج کننگ اٹی ءِ۔ دا خیال آتا درشانی ءِ او تدوک آدے کلی دیبہ ٹی غریب آتے ٹی راشن بشخنگ آن پد میڈیا نا نمائندہ غاتتون ہیت وگپ کرسا کرے۔ قاسم سوری پارے کہ پاکستان نا تاریخ اٹ اولیکو وار احساس پروگرام نا رد اٹ غریب آتے ٹی پیسہ بشخنگ انگ ءِ‘ صوبائی و بنجائی حکومت لاک ڈاﺅن آن زہمی بندغ آتا کمک کننگ نا کوشست کننگ اٹی ءُ‘ شار انا کیہی ہند آتیا جوڑ احساس پروگرام نا رد اٹ ہر خاہوت ءِ 12ہزار روپئی تننگ نا چرجوئی برجاءِ‘ غنی بندغ آتیان خواست کیوہ کہ مشکل حالیت اٹ غریب آتا کمک ءِ کیر‘ اوپارے کہ بلوچستان اٹ کورونا نا حالیت خراب اف‘ کورونا نا بابت صوبہ ٹی حالیت آک است جمی ناسوب ءُ‘بلوچستان اٹ کورونا نا اسہ ناجوڑ اس ہم وینٹی لیٹر آ اف‘ اوپارے کہ وزیراعلی جام کمال ناکماشی ٹی حکومت کورونا تون مون تننگ کن جوان گام گیج کننگ اٹی ءِ‘ اختلاف کننگ جمہوریت نا زیبائی ءِ‘ جام کمال نا حکومت ءِ ہچ خطرہ اف‘ راشن تے ڈپٹی کمشنر آتا کمک اٹ بشخنگ انگ ءِ‘ قومی وصوبائی اسمبلی ناباسک آک تینا وڑ اٹ بندغ آتون کمک کننگ اٹی ءُ۔
(آن لائن)