پاک فوج، ایف سی و پولیس نا اواری اٹ ”آپریشن شعبان“ برجا

پاک فوج، ایف سی بلوچستان و پولیس نا اواری اٹ ”آپریشن شعبان“ برجاءِ۔ داسہ نا کارروائی تیٹی پین 5 خارجی تا خلنگ انگ آن پد آپریشن شعبان اٹی دوزخی مروک دہشت گرد آتا جم کچ 76 مسنے۔ سیکورٹی حوالی نا رداٹ سیکورٹی فورس آتا فتنہ الخوارج نا برخلاف علاقہ ٹی گچین کارروائی تا رد و ریسہ برجاءِ، سیکورٹی فورس آتا کنڈآن خارجی تے فضائی و ڈغاری کارروائی تیٹی شست کننگ انگ ءِ۔ داسہ نا کارروائی تیٹی پین 5 خارجی تے دوزخی کننگا۔ آپریشن شعبان اٹی دوزخی مروک دہشت گرد آتا جم کچ 76 مسنے، پنچ جولائی آن دا وخت اسکان آپریشن شعبان و ایلو انٹیلی جنس بیسڈ آپریشن تیٹی جم وڑ اٹ 114 خارجی دہشت گرد دوزخی مسنو۔ سیکورٹی حوالی پارینے کہ گڈیکو دہشت گرد نا چٹفنگ اسکان بلوچستان اٹی آپریشن شعبان برجا سلک۔ بنجائی وزیرداخلہ محسن نقوی بلوچستان اٹ فتنۃ الہندوستان نا دہشت گرد آتا برخلاف سرسہب”آپریشن شعبان“ آ سیکورٹی فورس آتے خراجِ تحسین پیش کرینے، او پاک فوج، ایف سی بلوچستان و پولیس نا اواری اٹ آپریشن اٹ پین 5 خوارجی تا خلنگ آ فورس آتا بہادری ءِ سلام پیش کرے۔ اسہ بیان اسے ٹی محسن نقوی دہشت گرد آتا برخلاف گچین ڈغاری و فضائی کارروائی تیا سیکورٹی فورس آتا کسبی لائخی تا ستاءِ کرسا پارینے کہ وطن عزیز آن فتنہ الہندوستان نا دہشت گرد آتا پورو چٹفنگ اسکان جنگ برجا سلک۔ او پارے کہ بلوچستان نا امن ءِ بھس کروک آک داسہ عبرت نا نشان مننگ ءُ، بلوچستان نا ڈغار آ کودک بندغ آتا دِتر ءِ وہیفوک آک ہچ ءُ رعایت اسے نا حقدار افس۔ محسن نقوی پارے کہ ”آپریشن شعبان“ و ایلو انٹیلی جنس بیسڈ آپریشن تیٹی داتم اسکان 114 خوارجی دہشت گرد آتا خلنگ دا ہیت انا پیدوار شاہدی ءِ کہ ننا فورس آک بھاز متحرک، پروفیشنل و الرٹ ءُ۔ او دا عزم انا درشانی ءِ کرے کہ مچ آ قوم دہشت گردی نا برخلاف دا جنگ اٹ تینا سیکورٹی فورس آتتون ہم کوپہ سلوک ءِ۔