آبنائے ہرمز ءِ تینا دوٹی ہلنگ اُن، ننے آبنائے ہرمز نا چاروکی نا زَرّ رسینگک،امریکی صدر ڈونلڈ ٹرمپ

امریکی صدر ڈونلڈ ٹرمپ میڈیا تون ہیت و گپ کرسا پارینے کہ نن آبنائے ہرمز ءِ تینا دوٹی ہلنگ اٹی اُن، نن آبنائے ہرمز نا بھلا جوڑ مرینہ و ننے آبنائے ہرمز نا چاروکی نا بدل اٹی زر رسینگک۔ امریکی صدر پارے کہ ننا ایران تون معاہدہ اس مسوسس ہرافتے اوفک پرغار، اوفک خراب انگا بندغ آتا اسہ ٹولی اسے نا وڑاٹی ءُ۔ نن تدوک آ نن ایران آ بھاز بھلا جلہو آتیٹی اوفتے شست کرینن، اینٹی ایئر کرافٹ گن تا کمک اٹ اوفتا گیشتری ازباب آتے بھس کرین۔ ہراتم ہم اوفک ڈرون جلہو کیرہ نن اوفتے پورو واک اٹ شست کینہ۔ صدر ٹرمپ پارے کہ اوفک مدام معاہدہ پرغرہ ہندا سوب آن داسہ نن اوفتے سخت شست کینہ، نن آبنائے ہرمز ءِ تینا دوٹی ہلینہ و شاید اودے نن چلیفن‘ ایلو کنڈ آ امریکی صدر ڈونلڈ ٹرمپ نا آبنائے ہرمز آ کنٹرول دوئی کننگ نا بیان آن پد ایرانی فوج انا ورندی مون آ بسنے۔ ایرانی فوج اسہ بیان اسے ٹی پیدوار کرے کہ او امریکہ ءِ ہچ ءُ وڑ اسے ٹی آبنائے ہرمز اٹی نیام تمنگ نا موکل تفک۔ ایران نا منشا غان بیدس آبنائے ہرمز اٹی ہر وڑ انا سرجز نا پبی و سخت ورندی تننگک۔ ایرانی فوج ڈیہہ انا ملک آتے کلہو تس کہ امریکہ نا مخ تفی و اونا کمک ءِ ایران نا برخلاف جنگ تکنگک۔ داڑتون اوار خبڑدار کرے کہ اگہ چک و تاڑ اٹی ودکی مس تو دا ڈیہہ انا ایلو ملک اسکان تالان مریک و دانا مچ آ زمواری امریکہ و اونا سیوتی تیا مریک۔ ہندا وڑ چینی وزارتِ خارجہ نا ترجمان پارینے کہ آبنائے ہرمز اٹی بحری ہن و بر نا باندات ءِ جوان ءُ وڑ اسے ٹی سر تننگے۔ ترجمان پارے کہ آبنائے ہرمز جہانی بحری ہن و بر نا اسہ اہم ءُ کسر اسے و داٹی آجو و رکھوک جہاز رانی نا بحالی کل ملک آتا فائدہ ٹی ءِ۔ حوال نا رِد اٹ آبنائے ہرمز اٹی بحری جہاز آتا ٹریفک پنچ ہفتہ نا کم انگا کہول آ بسنے۔ میرین ٹریفک ویب سائٹ نا رِد اٹ 24 گھنٹہ ٹی بیرہ 5 واپاری جہاز آبنائے ہرمز آن گدرینگار ہرافتے ٹی اِرا بھلا تیل بردار جہاز اوار ئسر۔ پاکستان ڈیہہ اٹی چک و تاڑ اٹی ودکی آ گڑتی نا درشانی ءِ کرسا ہڑتوم آ کنڈ آتیا زور شاغانے کہ اوفک سگ و صبر انا درشانی ءِ کیر و چک و تاڑ اٹی کمتی کن دمدستی گام گیج کیر۔ دفتر خارجہ پارینے کہ پاکستان ڈیہہ انا کل ایلم ملک آتا وتواجہی و علاقائی سلامتی نا پبی مخ تفی نا عزم کیک۔ بیان اٹی پاننگانے کہ کل فریق آک اسلام آباد مفاہمتی یادداشت نا رِد اٹ تینا قول تیا عملدرآمد کیر۔ پاکستان مذاکرات و سفارتکاری نا کمک اٹ ڈیہہ اٹی مدامگی امن و سوگوی کن ہر وڑ انا کمک کننگ کن نن تیار اُن۔