پاکستان اٹی دہشت گرد کارروائی تیٹی اوغان ڈغار ءِ کاریم اٹ اتنگ است ہسونی نا سوب ءِ، شاہ محمود قریشی

اسلام آباد: وزیر خارجہ مخدوم شاہ محمود قریشی پارینے کہ پاکستان اٹی دہشت گرد کارروائی تیٹی اوغان ڈغار ءِ کاریم اٹ اتنگ است ہسونی نا سوب ءِ۔ جمعہ نادے آ وزارت خارجہ ٹی سلابتی کونسل امور خارجہ دیوان نا کماشی ءِ کرسا وزیر خارجہ پارے کہ پاکستان، اوغانستان اٹی امن کن تینا خیرخواہی کوشست آتے برجاتخنگ کن سنبرینگوک ءِ۔ دیوان اٹی بنجائی وزیر ڈٹ بندی اسد عمر، بنجائی وزیر خزانہ شوکت ترین، سلاہکار واپار رزاق داؤد، وزیراعظم نا نمائندہ خصوصی اوغانستان ایمبیسیڈر محمد صادق، سیکرٹری خارجہ سہیل محمود، اسپیشل سیکرٹری رضابشر تارڑ، ماہرین امور خارجہ، مسکوہی خارجہ سیکرٹریک و سفیر آک و ایلو کونسل نا باسک آک بشخ ہلکر۔ دیوان اٹی اوغانستان نا ترندی اٹ بگڑینگوک آ حالیت آتون اوار اہم سفارتی امور آ سلابت کننگا وپاکستان اٹی کورونا دین انا ساڑی آ حالیت، دین انا زرگزرانی ویل و اوفتتون مون تننگ کن کروک آ گام گیج آتا بابت ہم سرجم گپ وتران مس۔

(اے پی پی)