وزیر اعظم نا بروک آ تو حکومت ءِ نگران سیٹ اپ نا دوٹی تننگ نا پڑو

اسلام آباد :  وزیراعظم محمد شہباز شریف پارینے کہ اگست 2023 آ مقدس امانت ءِ نگران حکومت ءِ ایتنہ‘ بیرہ پانزدہ تُو اٹ چارسال انا بربادی تے سفا کرین‘ وونٹ بینک انا جاگہ غا اسٹیٹ بینک اٹ ودکی نا کوشست کرین‘ سازش آتا مون آ کم ہمت متون‘ داسہ کچکول ءِ پرغسا تینا نت یا سلنگ ناوخت بسنے‘ وام انا زند ءِ امنا کپنہ‘ ببو بدبیسئی تے چٹفن‘ مہر تالان کین‘ اسہ قوم اس مرسا ملک انا خذمت ءِ کین‘ نن چنکو وخت اسے نا حکومت اٹ ریاست ءِ بچفنگ کن سیاست ءِ قربان کرین‘ ننے مے مولدی نا زنجیر تے پرغسا تینا نت تیا سلوئی مریک‘ سنگت و ایلم ملک آک است انا ہُب اٹ نن تون کمک کریر‘ سفارتی کہول آ وزیر خارجہ بلاول بھٹو، وزیر خزانہ اسحاق ڈار، سپہ سالار جنرل عاصم منیر نا کوشست آتیان آئی ایم ایف تون اسٹاف لیول معاہدہ کننگ اٹ سرسہب مسر‘ دا حکومت کل زرگزرانی چیلنج آتیان پد ہم شونداری ناسفر نابناءِ کرے‘ مسکوہی حکومت نا کنڈآن کھڈ کروک بارودی سرنگ آتیان پد ہم دے ونن خواری کرسا ملک ءِ ڈیفالٹ مننگ آن بچفین‘‘ سوا سال انا دا مُد نااومیتی نا تارمئی تیان روشنائی ناکنڈآ اسہ پرعزم ءُ سفر اس ئس‘ کل گڑاتا گوائفنگ آن منہ گڑاس دوئی کننگ نابنا ئس‘ تخریب، بے چیٹی‘ پھسات نا کسر آن گچینی ناکنڈآ بننگ نا سفر ئس۔ پنچ شنبے نا بیگہ نا قوم آن تران اٹ وزیراعظم پارے کہ اپریل 2022 آ نم کنے ہرا زمواری ءِ وزیراعظم نا وڑ تسرے‘ ملک انا جوانی و نما خیرخواہی و خذمت نا دا مقدس آ امانت ءِ اگست 2023 اٹ نن نگران حکومت ءِ ایتنہ‘ وزیراعظم پارے کہ بیرہ پانزدہ تُو اٹ نن چار سال انا بربادی تے سفا کرین‘ پاکستان نافائدہ ناکسر اٹ کھڈ کروک بارودی سرنگ آتے سَفا کرین‘ زرگزران‘ خارجہ تعلقداری‘ توانائی‘ امن وایمنی تون اوار ایلو بشخ آتے ٹی بدانتظامی‘ کرپشن‘ نابودی و سازش آتا لگوک خاخر ءِ کسفین۔داکان بیدس وزیراعظم محمد شہباز شریف پارینے کہ ورناک ننا آخبت ءُ و ملک انا شونداری وشونہالی نا کنجی اوفتا دوٹی ءِ۔ مستین نا ردینک آتیان سبخ اس ہلسا مون آ ہنوئی مریک، بروک آ حکومت ملاتو اسہ لکھ آخا، 50 لکھ لیپ ٹاپ بشخیوہ، مسکوہی حکومت بھلا صنعت کار آتیٹی 3 ارب ڈالر بشخا، دا زر تعلیم آ خڑچ مسکہ تو اینو پاکستان ءِ آئی ایم ایف آ ہنوئی تمتوکہ، دے و نن خواری اٹ وام ہلوک آ آخا، تروک آ قوم جوڑ مرینہ۔ داخیال آتا درشانی ءِ او پنچ شنبے نادے آ بہاؤالدین زکریا یونیورسٹی ٹی سویلی پنجاب آن تعلق تخوک آ لائخ ورناتیٹی وزیراعظم یوتھ لون سکیم نا رداٹ چیک و لیپ ٹاپ بشخنگ نا دود آن تران کرساکرے۔ داوخت آ بنجائی وزیر حوالکاری و شینکاری مریم اورنگزیب، گورنر پنجاب انجینئر بلیغ الرحمان، نگران وزیراعلیٰ پنجاب محسن نقوی ووزیراعظم نا خصوصی کمکار امور نوجوانان شزہ فاطمہ، وزیراعظم نا خصوصی کمکار عطاتارڑ آن بیدس استاد و طالب علم آتا بھلو کچ اسے ٹی ساڑی ئسر۔ وزیراعظم پارے کہ ہندا یونیورسٹی ٹی او میرٹ آ مہالو ہم طالب علم آتے لیپ ٹاپ تسوسس و اینو دُوارہ اودے دا موقع ملا نے کہ او داجاگہ نا ہُشار طالب علم آتیٹی لیپ ٹاپ بشخے۔ وزیراعظم طالب علم آتیا زور شاغا کہ او خواری و لگن اٹ تعلیم دوئی کیر تو سفارش و رشوت اسے نا ضرورت اف۔ اینو دا دود اٹی اسہ باوہ سے نا شفقت آن محروم چناسے نا کِسہ ءِ بنسا اودے بھاز خوشی مس ہرا بیرہ خواری نا زی آ سرسہبی دوئی کرے۔

(آن لائن)