آئی ایم ایف آن 1.2 ارب ڈالر نا اولیکوقسط اسٹیٹ بینک ءِ رسینگا

اسلام آباد: بنجائی وزیر خزانہ و محصولات سینیٹر محمد اسحاق ڈار پارینے کہ انتظامی بورڈ انا منظوری آن پد جہانی مالیاتی فنڈ انا کنڈآن اسٹیٹ بینک ءِ 1.2 ارب ڈالر نا اولیکو قسط دوئی مسنے، پاکستان ترندی اٹ شونداری نا کنڈا ہنانے، و داعمل ءِ نن دادے پین سوگو کینہ۔ پنچ شنبے نادے آ داڑے میڈیا تون گپ وتران کرسا وزیرخزانہ پارے کہ استو آئی ایم ایف نا انتظامی بورڈ پاکستان کن سٹینڈ بائی پروگرام نا منظوری ءِ تسنے، دا پروگرام نا سرجم آتیان نن الس ءِ مہالو آن معلومدار کرینن۔ سٹینڈ بائی پروگرام 9 تُو آ تالان ءِ و دانا رداٹ پاکستان ءِ 3ارب ڈالر نا کمک ملک، اولیکوقسط 1.2 ارب ڈالر نا مریک و ایلو قسط آتے اِرا جاچ آن پد نومبر وفروری ٹی ملک۔ وزیرخزانہ پارے کہ آئی ایم ایف نا کنڈآن کمکاری نا 1.2 ارب ڈالر نا اولیکو قسط اسٹیٹ بینک ءِ دوئی مسنے ہراڑان زرمبادلہ نا کوڑی تیٹی پین گچینی بریک، اسٹیٹ بینک انا حساب وکتاب اٹ دانا عکاسی مریک۔ اوپارے کہ تدوک آ اسہ ہفتہ ٹی پاکستان ءِ جم وڑاٹ 4.2 ارب ڈالر نا کمک ملانے ہراڑان زرمبادلہ نا کوڑی تیٹی ودکی مسنے، اوپارے کہ پاکستان غٹ پیشن نا زر آتے وخت آ تننگ ءِ و داہفتہ نا ایسر آ ننازرمبادلہ ناکوڑی 14 ار ب ڈالر نا خڑک مریک۔ وزیرخزانہ پارے کہ او وزیراعظم محمد شہباز شریف نا است انا حب اٹ منت واری ءِ ہرفک ہرا دا مچ آ عمل خاص وڑاٹ تدوک آ مسہ ہفتہ ٹی تینٹ بشخ ہلک۔

(اے پی پی)