گرین بس سروس آن شاری تے سفر نا و گچین آسراتی دُوبریک، منور مگسی

کوئٹہ:  ڈپٹی سیکرٹری ٹرانسپورٹ منور حسین مگسی پارینے کہ تاریخ اٹی اولیکو وار کوئٹہ ٹی گرین بس سروس نا بناءِ کننگ انگ ءِ ہراڑان شاری تے سفر نا آرام دہ و گچین آسراتی دُوبریک بس سروس نا باقاعدہ بناء 17 جولائی آن مریک۔ داہیت ءِ او چارشنبے نادے آ ”اے پی پی“ تون خصوصی گپ وتران کرسا پارے۔ اوپارے کہ کوئٹہ شار اٹی اولیکو وار گرین بس سروس نا بنامننگ ءِ ہراڑکن غٹ تیاری تے پورو کننگانے، 8 بھلا و چنکا بس آتیا تالان گرین بس سروس نا روٹ سریاب روڈ، جامعہ بلوچساتن آن بناکرسا زرغون روڈ، انسکمب روڈ، کولاپھاٹک و ایئرپورٹ آن مرسا بیوٹمز یونیورسٹی آ ایسر مریک، اوپارے کہ پائلٹ ڈٹ انا رداٹ گرین بس آک غٹ تر آسراتی تیان شُپ ءُ و اوفتا مناسب ءُ کِرااس مقرر کننگانے، ڈپٹی سیکرٹری ٹرانسپورٹ منور حسین مگسی پارے کہ گرین بس آتیٹی زالبول و معذور بندغ آتیکن آسراتی ساڑی ءِ اوپارے کہ اولیکو ریسہ ٹی بلوچستان یونیورسٹی آن بیوٹمز یونیورسٹی اسکان بس آتے چلیفنگک سریاب روڈ ودکی نا کاریم پورو مننگ آن پد میاں غنڈی اسکان دا سروس ءِ ودفنگک، وزیراعلیٰ بلوچستان نا پارت آ 17 جولائی آن باقاعدہ گرین بس سروس بناکیک دا سروس نا بناءِ وی وی آئی پی اسے آن آخا بلکن بس اٹ سفر کروک آ عام ءُ مسافر اسے آن کننگک۔