نیوزی لینڈ کرکٹ سوفی ڈیوائن ءِ پُوسکن آ کیپٹن پن کرے

آکلینڈ (مانیٹرنگ ڈیسک) نیوزی لینڈ کرکٹ سوفی ڈیوائن ءِ قومی نیاڑی کرکٹ ٹیم نا پک انگا کیپٹن پن کننگانے۔ ڈیوائن ایمی سٹرتھویٹ نا جاگہ غا دا گام ءِ ہمو وخت آ ہرفیسُس ہراتم ایمی سٹرتھویٹ 2019ء نا نیام اٹ چُنا خننگ نا چٹھی آ ہننگ نا فیصلہ کریسُس۔ 30 سال نا ڈیوین ءِ اینخو جنوری ٹی ویمنز ٹی 20 ورلڈ کپ اٹ ہم نیاڑی ٹیم نا کیپٹن پن کننگاسُس۔ ہراڑے کیویز نیاڑی ٹیم پوسکن آ گروپ لینڈ مرحلہ آن پیش تماسُس۔ سٹرتھویٹ داسہ ڈیوائن نا نائب نا وڑاٹ پدی بسنے۔ سوفی ڈیوائن قومی نیاڑی ٹیم نا کماشی ءِ تننگ آ نیوزی لینڈ کرکٹ نا منتواری ءِ ہرفے۔ سوفی ڈیوائن پارینے کہ وائٹ فرنز نا جاگہ غا کیپٹنی تننگ کنکن بھلو اعزاز اسے۔ سوفی ڈیوائن ٹی 20 ورلڈ کپ نا میچ آتیٹی سویلی افریقہ نا کنڈآن72، 54 *، 61، 77 و 105 رنز جوڑ کرے، ہرا ٹی ٹونٹی کرکٹ اٹ پدریسہ 50 آن زیات زنز جوڑ کروک آ اولیکو گوازی گر ءِ۔ او سری لنکا نا برخلاف 75 رنز جوڑ کرسا اسہ جوان وڑ اسے ٹی تینا مہم نا بنا ءِ کریسُس۔ او تدوک آ سال ڈبلیو بی بی ایل اٹ جوان فارم اٹ مزہ ہلکوسُس۔ او 130.33 نا اوسط اٹ 769 رنز و باؤلنگ اٹ 19 وکٹ آتون سیزن نا جوان انگا گوازی گر پن کننگا۔