ہر خراب انگا گڑا مون مفک‘مائیکل ہولڈنگ

ساؤتھ ہیمپٹن (مانیٹرنگ ڈیسک) ویسٹ انڈیز نا لیجنڈری کرکٹر مائیکل ہولڈنگ دنیا ٹی برجا انگا نسل پرستی نا برخلاف و شیدی شاری تا مخ تفی ءِ کرسا پارینے کہ ہر خراب انگا گڑا مون اس مفک۔ اسہ ٹی وی رپورٹ اسے نا رداٹ انگلینڈ و ویسٹ انڈیز نا ٹیم تا نیام اٹ تدوک آ دے بنا مروک آ میچ نا بنا شیدی شاری تا چلینگوک آ مہم (بلیک لائیو میٹر) آن مس۔ ہڑتوم آ ٹیم تا گوازی گر و امپائرل گولڈ خلکر و امریکی پولیس نا سم کاری آن تپاخت کروک آ شیدی شاری جارج فلائیڈ ءِ خراج عقیدت پیش کرے۔ ویسٹ انڈیز نا ٹیم نا لیجنڈری کرکٹر مائیکل ہولڈنگ دا میچ اٹ کمپیئرنگ نا فرض آتے ادا کریکہ۔ او میچ انا بنا مننگ آن مست بلیک لائیو میٹر مہم آ بے باک تبصرہ کرسا پارینے کہ انگلینڈ و ویسٹ انڈیز نا ٹیم تا نیام اٹ ٹیسٹ میچ نا بنا تعصب نا برخلاف برجا انگا مہم آن مس۔ او پارینے کہ گوازی گرک اسٹیڈیم اٹ گولڈ خلکر و جارج فلائیڈ ءِ خراج عقیدت پیش کریر و پاریر کہ ہر خراب انگا گڑا مون مفک۔ لیجنڈری گوازی گر پارینے کہ مون و پیہن انگا بندغ آتے پین تعلیم تننگ نا گرج ءِ تانکہ اوفتا نیام اٹ مروک آ غلط فہمیک ایسر مریر وخت اس کہ اوفک اسہ ایلو ءِ سگنگ کیر۔