کوئٹہ پیکیج آن شار انا گچینی نابابت آن اومیت آک گنڈوک ئُ، جام کمال

کوئٹہ(اے پی پی) وزیراعلیٰ بلوچستان جام کمال خان کوئٹہ شونداری پیکیج اٹی اوار سڑک آتا جوڑ کننگ نا ڈٹ آتیا عملدرآمد اٹ تل ول آ ترندی نا درشانی ئِ کرسا پارینے کہ ڈٹ آتا بابت بے گرج تل و ول ، حکومت نا فنڈ ز و وخت انا زیان ئِ اسل سگپنہ کپنہ، داخیال آتا درشانی ئِ او کوئٹہ شونداری پیکیج نا پیش رفت نا جاچ دیوان اٹی کرے، ایڈیشنل چیف سیکرٹری ڈٹ بندی و شونداری عبدالرحمان بزدار، سیکرٹری خزانہ نور الحق بلوچ و ایلو تعلقدار کمامدار آک دیوان اٹی ساڑی ئسر وخت اس کہ ڈٹ انا پروجیکٹ ڈائریکٹر کمشنر کوئٹہ عثمان علی خان دیوان ئِ حوال تس، وزیراعلیٰ پارے کہ کوئٹہ نا الس ئِ بھلو کساس اسے نا کوئٹہ پیکیج آن شار انا گچینی نا بابت آن اومیت آک گنڈوک ئُ و دا ڈٹ شار انا زیبائی و شاری آسراتی تا فراوانی نا بابت اہمیت تخک، وزیراعلیٰ پارے کہ کوئٹہ شونداری پیکیج نا پروکیورمنٹ کمیٹی نا باسک آتا نیام اٹ عدم ہم گرنچی و بے سوب اعتراض آتا سوب ڈٹ پدتموک ئُ ہرانا سوب ڈٹ انا خڑچ اٹی ودکی ہم مننگ کیک ، ہنداخاطرآن کمیٹی غٹ باندات آتا اول سر آن جاچ ئِ ہلسا دمدستی وڑاٹ ٹینڈرنگ پراسس ئِ پورو کے، وزیراعلیٰ ڈٹ آتے ٹی کنسلٹنسی و کنٹیلیجنسی خڑچ آتے ہم غیر متناسب گوندسا پارینے کہ کنسلٹنسی فرم آتا کنڈآن تینا فائدہ ٹی ڈٹ آتا ڈیزائن اٹی بے گرج بدلی کرسا اوفتا کساس ئِ ودفنگک ہراڑآن کنسلٹنسی فیس اٹی ودکی مریک و ڈٹ آک ہم پد تمرہ ۔ اوپیدوار لوز آتے ٹی پارے کہ اسہ ادارہ اسے ہم الس نا وسیلہ غاتے پُلنگ نا موکل تفننگک۔ وزیراعلیٰ پارت کرے کہ کوئٹہ شونداری پیکیج آ عملدرآمد اٹ تاخیر نا سوب آتا دمدستی وڑاٹ چٹفسا ڈٹ آتیا عملدرآمد نا بنائِ کننگے۔ داکان بیدس وزیراعلیٰ بلوچستان جام کمال خان نا کماشی ٹی اڈ ہلوک آ دیوان اٹی بنجائی پی ایس ڈی پی ٹی اوار برجا ڈٹ آتا پیش رفت نا جاچ ئِ ہلنگا ہرافتے ٹی مواصلات ، دیر ، بجلی ، صنعت ، ہائر ایجوکیشن و ایلو سیکٹر آتا ڈٹ آک اوار ئُ و فیصلہ کننگاکہ بنجائی حکومت آن برجا ڈٹ آتا پوروی کن زیات آن زیات فنڈ جاری کننگ آ زور شاغنگک تانکہ دا ڈٹ آتا فائدہ غاتیان الس فائدہ ہرفنگ کے۔ دیوان اٹی دا ہیت آن امنا کننگاکہ بنجائی پی ایس ڈی پی ٹی بلوچستان نا ڈٹ آتے تو اوار کننگک ولے اوفتے کن کچ اٹ فنڈ جتا مریک ہرافتے آن نئے بیرہ ڈٹ آک پدتمرہ بلکن اوفتا خڑچ اٹی ہم ودکی مریک، دیوان اٹی دا ہیت آہم گڑتی ظاہر کننگاکہ ایکنک آن منظوری آن پد ہم چندی ڈٹ آک ہندن ئُ ہرافتیا کاریم نا بنائِ کننگتنے، وزیراعلیٰ پارت کرے کہ بنجائی ڈٹ آتا پیش رفت نا پورو سرجم تیار کننگے ہرافتے گچین وڑاٹ بنجائی حکومت تون چست کننگک، دیوان اٹی بھلا خڑچ انا ڈٹ آتے کن پروجیکٹ ڈائریکٹر نا تعیناتی نا وڑوڈول ئِ گچین کننگ و دا بابت آن ایڈیشنل چیف سیکرٹری ڈٹ بندی و شونداری نا کماشی ٹی ٹیکنیکل سلیکشن بورڈ انا جوڑ کننگ نا فیصلہ کننگا۔ دیوان اٹی صوبہ ٹی انفراسٹرکچر ڈویلپمنٹ بورڈ انا ٹہیفنگ نا ہم جاچ ئِ ہلنگا و پی اینڈ ڈی ئِ سلاہ و سوج پیش کننگ نا پارت کننگا، دیوان اٹی ڈٹ آتے ٹی کنٹیلیجنسی نا مد اٹ مروک آ خڑچ آتے کم آن کم کہول آ تخنگ نا حکمت عملی اس تینا کننگ نا فیصلہ ہم کننگا۔ ایڈیشنل چیف سیکرٹری ڈٹ بندی و شونداری عبدالرحمان بزدار، سیکرٹری خزانہ نور الحق بلوچ، و ایلو تعلقدار کمامدارآک دیوان اٹی ساڑی ئسر۔