حکومت نا کرونا وائرس نا باندات قومی سلامتی کونسل نا دیوان بٹنگ انگ نا فیصلہ

اسلام آباد/واشنگٹن /ریاض(آن لائن/ مانیٹرنگ ڈیسک) وزیراعظم عمران خان قومی سلامتی کمیٹی نا دیوان ئِ اینو بٹگا۔ نیشنل ہیلتھ سروس آتا خواست آ کورونا وائرس نا بابت ملک اٹ ایمرجنسی نافذ کننگ نا فیصلہ کننگک۔ سلہہ بند فوج آتا سروک، وزیر خارجہ، دفاع، کانود و ہر چار آ صوبہ غاتا وزیر اعلیٰ دیوان اٹ بشخ ہلیرہ۔داکان مست پارلیمانی پارٹی دیوان آن تران کرسا وزیراعظم پارینے کہ کورونا وائرس کنٹرول اٹی ارے، توننگ کن ہرفوک آ حکومت نا گام گیج آک ستا کڑزرہ۔ وزیراعظم عمران خان پارینے کہ کورونا وائرس آن بچفنگ اٹ اڑاند اتنگ ئِ ہچ ئُ حالیت اسے ٹی سگپنہ۔ داڑان بیدس اپوزیشن لیڈر شہباز شریف کورونا وائرس نا سوب آن مچ آ ملک اٹ ہیلتھ ایمرجنسی نافذ کننگ نا خواست کرینے۔ پنجاب حکومت ہم مچ آ صوبہ ٹی میڈیکل ایمرجنسی نافذ کرینے۔ داسکان کن اوڑے ہچ ئُ کورونا وائرس نا کیس اس مون آ بتنے۔ یات سلے کہ اینو گلگت بلتستان اٹ کورونا وائرس نا اسہ پین ناجوڑ اس مون آ بسنے۔ اوکان پد ملک اٹ زہمی آ ناجوڑ آتا کچ 21 مسنے۔ ہرافتے آن سندھ اٹ 15، 14 کراچی اسٹ اس حیدرآباد)،گلگت بلتستان اٹ 3، اسلام آباد اٹ 2 وخت اس کہ کوئٹہ ٹی اسہ کیس اس مون آ بسنے۔ داکان بیدس کرونا وائرس نا سوب آن امریکی صدرڈونلڈ ٹرمپ برطانیہ آن بیدس کل یورپی ملک آتا امریکہ ٹی پترینگ انگ پابندی خلکنے۔ درملکی خبررساں ادارہ نا رداٹ امریکی صدرڈونلڈ ٹرمپ کرونا وائرس نا بابت قوم آن تران کرسا برطانیہ آن بیدس ایلو کل یورپی ملک آتا امریکہ ٹی پترینگ انگ 30 دے اسکان پابندی خلکنے۔ صدرٹرمپ پارینے کہ یورپ آن امریکہ کن سفری پابندی تا اطلاق جمعہ نا نن آن مریک۔ امریکی صدر پارینے کہ یورپی یونین انسداد کرونا کن زوت اس گام ہرفتو، امریکہ غا بروک آ بندغ آک کرونا ئِ تالان کننگ نا سببئُ، سفری پابندی تا ایسری نا وخت ئِ حالیت آتا جاچ ئِ ہلنگ آن پد فیصلہ کننگک۔ پیر انگا امریکیک بیدس ضرورت آن سفر کپس، نہ اوفک اجتماع تے ٹی کار، امریکی اُلس نا رکھ اکن ہروڑ نا گام ہرفنگ نا پڑو، صدرٹرمپ بھاز آ ادارہ غاتا ٹیکس تننگ ئِ 3 تو اسکان کینسل کننگ نا پڑو کرسا پارینے کہ کرونا وائرس نا زہمی آ بندغ آتے و ملازم آتے زوت اس ریلیف تننگ نا پڑو کیوہ۔ برطانوی نشریاتی ادارہ نا رداٹ یورپی ملک آتے ٹی کرونا وائرس نا ناجوڑ آتا کچ 16 ہزار آن گدرینگا۔ ہرافتے ٹی 10 ہزاراٹلی ٹی ئُ، ہراڑے وائرس آن 631 بندغ نا کہنگ نا ہیت ہم پک مسنے۔ یات سلے کہ جہانی ادارہ برائے جانجوڑی (ڈبلیو ایچ او) کرونا وائرس آن تالان مروک آ ناجوڑی ئِ ’جہانی دَین ‘ (پینڈیمک) نا درجہ تسنے۔ داکان بیدس سعودی عرب کرونا وائرس نا کیس آتا کچ اٹ ودکی آن پد پاکستان تون اوار کیہی ملک آتون فلائٹ آپریشن ئِ معطل کرے۔ در ملکی خبر رساں ادارہ نا رداٹ سعودی عرب اٹ کرونا وائرس نا کیس آتا کچ 45 مسنے۔ ہرانا سوب آن مچ آ ملک انا تعلیمی ادارہ غاک بند ئُ، سعودی حکومت وائرس نا توننگ کن پوسکن ئُ گام ہرفینے، ہرانا رداٹ شاری تا سفر آ عارضی پابندی خلکنے۔ وخت اس کہ کیہی ملک آتون فلائٹ آپریشن ئِ ہم معطل کرینے۔ سعودی حکومت یورپی یونین، سوئٹزرلینڈ، بھارت، پاکستان، سری لنکا، فلپائن، سوڈان، ایتھوپیا، سویلی سوڈان، ایریٹیریا، کینیا، جبوتی و صومالیہ تون فلائٹ آپریشن ئِ معطل کرینے۔ ولدا ہم کمرشل و کارگو ٹریفک نا موکل تینا جاگہ غا سلوک ئِ۔ سعودی حکومت ہندا ملک آتے آن بروک آ شاری تا ہم تینا ملک اٹ پترینگ انگ آ پابندی خلکے۔ وخت اس کہ دا فیصلہ غا عمل ملک اٹ ساڑی فلپائنی و بھارتی ہیلتھ ورکر آک کپس۔ وخت اس کہ اوفتے ملک آن کشنگ نا ہم موکل مریک۔ وائرس نا توننگ کن سعودی عرب اردن تون ملوک آ ڈغاری آ کسر تے آن کل پسنجر ٹریفک ئِ ہم معطل کرینے۔ داڑان بیدس سعودی عرب اٹ شپنگ و پوریاگر تا ہننگ بننگ نا ہم نظر شاغانو۔ یات سلے کہ سعودی حکومت کرونا وائرس نا سوب آن تدوک آ ہفتہ غان عمرہ زائرین تا ہم ملک اٹ پترینگ انگ آ رکھ خلکنے۔