مچ آ ملک اٹی 24 گھنٹہ ٹی کورونا دین انا 22 کیس رپورٹ

اسلام آباد : قومی ادارہ جان جوڑی (این آئی ایچ) پارینے کہ مچ آملک اٹی 24 گھنٹہ ٹی کورونا دین انا 22 کیس رپورٹ مس و 12 ناجوڑ آتا حالیت نازرک ءِ۔ دوشنبے نادے آ این آئی ایچ نا کنڈ آن جاری حساب وکتاب نا رداٹ مچ آملک اٹی 24 گھنٹہ ٹی 4 ہزار 498 کورونا ٹیسٹ کننگا ہرافتیان 22 بندغ آتا ٹیسٹ مثبت بس، ہندا وڑ دا مد اٹی کورونا ٹیسٹ انا مثبت کچ 0.49درسد ئس۔ داکان بیدس داوخت آ کورونا دین آن اسہ ناجوڑ اس ہم زوال متنے وخت اس کہ 12 ناجوڑ آتا حالیت نازرک ءِ۔ مچ آ ملک انا چندی شارتیٹی 24 گھنٹہ ٹی کروک آ ٹیسٹ آتیان راولپنڈی ٹی 203 ٹیسٹ کننگا ہرافتیان اسہ ٹیسٹ اس مثبت بس و ہموڑے مثبت کیس آتا کچ 0.49 درسد ئس، ہندا وڑ پشاور اٹی 121 ٹیسٹ آتیان اسہ ٹیسٹ اس مثبت بس، ہموڑے کچ 0.83 درسد ئس وخت اس کہ لاہور اٹی 630 ٹیسٹ آتیان 10 ٹیسٹ مثبت بس و ہموڑے مثبت کیس آتا کچ 1.59 درسد ئس۔

(اے پی پی)