قبائلی راہشون آ جلہو حالیت آتے خراب کننگ ناسازش اسے‘سردارحیربیارڈومکی

بختیارآباد : قبائلی راہشون نا قافلہ غا جلہو بلوچستان نا حالیت آتے خراب کننگ نا سازش اسے۔ صوبائی حکومت کچھی ٹی مروک آ دھماکہ نا دوبہ دار آتے زوت اس دزگیر کیر۔ شرپسند آ بندغ آک تینا مسخت آتیٹی سرسہب مفسہ۔ سردارزادہ میرحیر بیارخان ڈومکی پارینے۔ حوال نا رداٹ پنی آ قباہلی راہشون سردارزادہ میرحیربیارخان ڈومکی کچھی نا علاقہ سنی نا ماس آ سردارزادہ میر سردار خان رند نا قافلہ غا دھماکہ نا مذمت ءِ کرسا پارینے کہ بلوچستان اسہ قبائلی ءُ صوبہ اسے۔ دا جاگہ نا تینا قبائلی ءُ وڑ و ڈول ءُ۔ بلوچستان نا پرامن چاگڑد اٹ داوڑ نا خراب انگا واقعہ غاتا مننگ صوبہ نا امن ءِ بھس کننگ نا سازش اسے۔ ہرانا ایسری المی ءِ۔ دھماکہ ٹی اختہ انگا بندغ آک صوبہ نا امن ایمنی ءِ خراب کننگ نا کوشست کننگ اٹی ءُ۔ ولے اوفک تینا مسخت اٹ سرسہب مفسہ۔ او پارینے کہ سردارزادہ میر سردار خان رند نا قافلہ غا دھماکہ نا اخس کہ مذمت ءِ کننگے ولدا ہم کم ءِ۔ صوبائی حکومت امن ایمنی ءِ اسہ وڑ تخنگ اٹ بے سہب خننگ انگ ءُ۔ قبائلی راہشون آ جلہو سوچی سمجھی سازش اسے نا وڑاٹی ءِ۔ شرپسند آ بندغ آک بلوچستان نا پرامن آ چاگڑد ءِ خراب کننگ نا کوشست اسے ٹی اختہ ءُ۔

(آن لائن)