ڈیرہ بگٹی وسوئی نا الس ءِ بنداوی آسراتی فراوان کننگک‘میرگہرام بگٹی

کوئٹہ : جمہوری وطن پارٹی نا بنجائی راہشون و صوبائی وزیر محنت و افرادی قوت نوابزادہ گہرام بگٹی پارینے کہ بلوچستان و تینا علاقہ نا شونداری ءِ پک کننگ کن گام گیج ہرفسا اُلس ءِ دوئی آ وسیلہ غاتے ایسر و سختی تیان خلاسی کن ڈیرہ بگٹی سوئی ٹی1 ارب 40 کروڑ روپئی نا خرچہ ٹی روڈ، گرلز کالج و ایلو ڈٹ آتیا کاریم برجا ءِ۔ دا ڈٹ آتا جوڑی 35 آن80 درسد پورو مسنے۔ اوفتا پوروی آن دا ڈٹ آتا بدلہ غان علاقہ نا اُلس فائدہ ہرفک۔ دا خیال آتا درشانی ءِ او ”آن لائن“ تون ہیت وگپ کرسا کرے۔ نوابزادہ گہرام بگٹی پارینے کہ بلوچستان پاکستان نا رقبہ نا بابت اٹ کل آن بھلا قدرتی وسیلہ غاتیان پُر ءُ صوبہ اسے۔ داڑے آبادی تالان مسنے۔ ای ایوان اٹ برسا ڈیرہ بگٹی و سوئی ٹی رہنگوک آ لکھ آ بندغ آتا سختی تے مر کننگ کن تینا شونداری فنڈ آتا کمک اٹ پھیلاوغ آن ڈیرہ بگٹی بروک آ بندغ آتے 12 گھنٹہ غاتا سفر ءِ پورو کرسا راجن پور‘ رحجان مزاری‘ کشمور پھر سوئی نا کسر تینا مزل آ سر مسوسر۔ 35 کلو میٹر سڑک انا جوڑی 35 کروڑ روپئی نا خرچہ ٹی 80 درسد پورو مسنے۔ ہراڑان 12 گھنٹہ غاتا فاصلہ کم مرسا یک ءُ گھنٹہ مریک۔ داڑان بیدس ڈیرہ بگٹی آن کمشور دو ءُ نیم گھنٹہ نا سفر ءِ پورو کننگ کن 90 کروڑ روپئی نا خرچہ ٹی 78 کلو میٹر روڈ نا جوڑی آ ترندی ٹی کاریم برجا ءِ۔ ہرانا پورو مننگ آن علاقہ نا فاصلہ کم مرسا 1 گھنٹہ اس مریک۔ علاقہ نا چناتے بڑزکو تعلیم آن معلومدار کرسا 13کروڑ روپئی نا خرچہ ٹی گرلز کالج نا جوڑی 35 درسد پورو مسنے۔ کنا کوشست ءِ کہ ای تینا وزارت نا دور اٹ ڈیرہ بگٹی، سوئی نا بندغ آتے زند انا بنداوی آ آسراتی تا فراوانی کن تینا کڑد ءِ ادا کرسا کل وسیلہ غاتیان کاریم ہلنگک۔ انتئے کہ سوئی گچین ءُ علاقہ اسے۔

(آن لائن)