آن گوئنگ اسکیم آتیکن 100 درسد فنڈ انا فراوانی ءِ پک کننگے، ملک غفار

آل بلوچستان گورنمنٹ کنٹریکٹرز ایسوسی ایشن نا دیوان ایسوسی ایشن نا چیئرمین ملک عبدالغفار مندوخیل نا کماشی ٹی اڈ ہلک۔ دیوان اٹی صدر میر عبدالسلام لانگو، جنرل سیکرٹری ملک مجیب مہترزئی، سینئر نائب صدر حاجی محمد ابراہیم اچکزئی و ایلوفک بشخ ہلکر۔ دیوان اٹی ٹھیکیدار برادری ءِ مون تروک ویل، حکومت نا کنڈآن صوبہ ٹی برجا آن گوئنگ اسکیم آتیکن کم فنڈ جتا کننگ و ایلو باندات آتیا گپ وتران کننگا۔ دیوان اٹی فیصلہ کننگا کہ حکومت نا کنڈآن صوبہ ٹی برجا آن گوئنگ اسکیم آتیکن ہرا زر ءِ جتا کننگانے او بھاز کم ءُ ہراڑان برجا اسکیم آتے وخت آ پورو کننگ ٹھیکیدار برادری نا وس انا ہیت اس اف ہراڑان ٹھیکیدار آتے نسخان مون تروئی تمنگ ءِ، بایدے حکومت او آن گوئنگ اسکیم آتیکن 100 درسد فنڈ انا فراوانی ءِ پک کے۔ دیوان اٹی فیصلہ کننگا کہ آن گوئنگ اسکیم آتیٹی کم زر جتا کننگ آ بلوچستان ہائیکورٹ اٹی اینو آل بلوچستان گورنمنٹ کنٹریکٹرز ایسوسی ایشن نا کنڈآن اسہ پٹیشن اس دائر کننگک ہراڑکن سینئر وکیل آتتون سلاہ پورو مسنے۔ دیوان اٹی فیصلہ کننگا کہ آل بلوچستان گورنمنٹ کنٹریکٹرز ایسوسی ایشن نا پوسکن گچین مروک عہدیدار آتا سوغندی دود ہنہ اوڑک و زیارت اٹی کودک شاری و پولیس کارندہ غاتا شہیدی نا سوب آن منسوخ کننگانے، سوغندی دودا نا پوسکن آ تاریخ نا پڑو ءِ ولدا سلاہ اٹ کننگک۔