زیارت ہر شہید پولیس کارندہ نا خاہوت کن اسہ کروڑ یانزدہ لکھ روپئی نا پڑو

وزیراعلیٰ بلوچستان نا حوالکاری و سیاسی باندات کمکار شاہد رند پارینے کہ وزیراعلیٰ بلوچستان میر سرفراز بگٹی نا خاص پارت آ زیارت اٹی شہید مروک پولیس کارندہ غاتا خاہوت آتا ہربندغ ءِ اسہ کروڑ یانزدہ لکھ روپئی تننگ نا ریلیز آرڈر جاری کننگانے۔ شاہد رند پارے کہ وزیراعلیٰ بلوچستان نا پارت نا رِد اٹ غٹ شہید آتا خاہوت آتے اوفتا درگہ غا زر آتا رسیفنگ ءِ پک کننگ انگ ءِ تانکہ زہمی خاہوت آتے دمدستی و شرفدار وڑ اٹی ریلیف فراوان کننگ مرے۔ او پارے کہ دا مسخت نا پوروی کن کل انتظامی و زرگزرانی کارروائی تے بھاز ترندی اٹ پورو کننگا تانکہ ہچ ءُ ریسہ اسے ٹی ہُرے مف۔ او پارے کہ حکومت بلوچستان شہید آتا قربانی تے اسُل گیرام دپک۔ شہید آتا خاہوت آتا ولفنگ‘ آسودہی و اوفتا چناتا تعلیمی خڑچ آتے حکومت تینا زمواری سرپند مرسا تینٹ پورو کیک‘ تانکہ زہمی خاہوت آتے آخبت اٹی ہچ ءُ خواری اسے تون مون تروئی مف۔ کمکار وزیر اعلیٰ پارے کہ زر تننگ ہچ ءُ وڑ اسے ٹی انسانی جان تا بدل مننگ کپک، ولے حکومت بلوچستان دا ڈکھ و ارمان نا ساہت اٹی شہید آتا خاہوت اتٓتون اوار سلیسنے‘ و اوفتے ہر وڑ انا کمک فراوان کننگ کن تینا غٹ وسیلہ غاتے کاریم اٹ اتنگ اٹی ءِ۔ شاہد رند پارے کہ وزیراعلیٰ میر سرفراز بگٹی پیدوار پارت کرینے کہ شہید آتا خاہوت آتا ہر وڑ اٹ کاٹم خواجہی و کمک ءِ پک کننگے، انتئے کہ راج نا امن و رکھ اکن تینا جان تے ندر کروک پولیس کارندہ غاک ننا حقی ہیروک ءُ و اوفتا قربانی تے مدام یات تخنگک۔