گلگت بلتستان نا شونداری و شونہالی حکومت نا اولیت آتیٹی اوار ءِ، وزیراعظم محمد شہباز شریف

نجر‘ مواصلات، توانائی، تعلیم، جان جوڑی، سیل و سوات و روزگار نا وارخواہی تے ودفنگ آ خاص چکار کننگ انگ ءِ، اوڑے قدرتی وسیلہ، سیل و سواتی ہند و معدنی کوڑی تے کاریم اٹ اتسا ہندی زرگزران ءِ پین سوگو کننگک، گلگت بلتستان ءِ شونداری، شونہالی و مدامگی سوگوی نا پوسکن آ مزل تیا سرکینہ۔ جمعہ نادے آ پی ایم آفس نا میڈیا ونگ آن جاری بیان نا رداٹ او دا خیال آتا درشانی ءِ مسلم لیگ ن آن تعلقدارگلگت بلتستان اسمبلی نا باسک آتتون ہیت وگپ کرسا کرے ہرا وزیراعظم تون اوڑدہی کریر۔ اوڑدہی ٹی نائب وزیراعظم و وزیر خارجہ محمد اسحاق ڈار، بنجائی وزیر حوالکاری و شینکاری عطاء اللہ تارڑ، بنجائی وزیر باندات کشمیر و گلگت بلتستان انجینئر امیر مقام و وزیراعظم نا سلاہکارسیاسی و السی باندات رانا ثناء اللہ اسک ہم ساڑی ئسر۔ وزیراعظم پارے کہ گلگت بلتستان نا الس ہر وخت پاکستان تون تینا مہر، وفا داری و قومی یکجہتی نا عملی شاہدی ءِ تسنے، نم الس نا گچین مروک نمائندہ غاک ارے، نماکمک اٹ الس نا اومیت، ویل و اولیت آتتون دراست معلومداری دوئی مریک، ننا تعلقداری ہرا کہ سیاسی جماعت تون مرے ننا مسخت بیرہ الس نا خذمت و اوفتا زند اٹ آسانی ودی کننگ ءِ۔ او پارے کہ گلگت بلتستان نا شونداری و شونہالی بنجائی حکومت نا اولیت آتیٹی اوار ءِ، علاقہ ٹی بنداوی پنجر، مواصلات، توانائی، تعلیم، جان جوڑی، سیل و سوات و روزگار نا وارخواہی تے ودفنگ آ خاص چکار کننگ انگ ءِ، علاقہ نا قدرتی وسیلہ، سیل و سواتی ہند و معدنی کوڑی تے کاریم اٹ اتسا ہندی زرگزران ءِ پین سوگو کننگک، ورناتے آب اٹنگا تعلیم، پوسکن فنی ہیلکاری و عزت نا روزگار نا فراوانی حکومت نا اہم اولیت آتیٹی اوار ءِ تانکہ او قومی شونداری ٹی پبی کڑد ادا کننگ کیر۔ وزیراعظم پارے کہ گلگت بلتستان اٹ چار دانش سکول جوڑ کننگ آخریکو ریسہ غاتیٹی ءُ و بروک آ سال آن اوفتے ٹی کلاس آک بنا کیرہ‘ داڑان بیدس شمسی توانائی آن 100 میگا واٹ بجلی ودی کننگ نا پروجیکٹ آ کاریم ترندی اٹ برجا ءِ۔ او پارے کہ بنجائی حکومت گلگت بلتستان اٹ برجا شونداری پروجیکٹ آتا وخت آ پورو کننگ کن غٹ ساڑی وسیلہ غاتے کاریم اٹ اتنگ ءِ، گلگت بلتستان اٹ موسمی بدلی نا بابت پیشگی حوال نا نظام ہم نصب کننگانے تانکہ ہندی الس ءِ وخت آ معلومداری تننگ مرے و موسمی حالیت آتا مون ء توننگ مرے۔ وزیراعظم پارے کہ الس ءِ مون تروک ویل آتا ایسر، گچین حکمرانی و شفافیت نا مونی دننگ کن بنجائی و ہندی سروک آتا نیام اٹ گچین رابطہ المی ءِ۔ او باسک آتے پارے کہ نما سلاہ و سوج آک ننکن اہم ءُ، گلگت بلتستان نا الس نا راجی آسودہی کن نن اوار کاریم کینہ، غٹ اسمبلی باسک آک گچین کڑد ادا کیر۔