سی پیک نا مشترکہ رابطہ کمیٹی نا 12 می دیوان اینو بیجنگ اٹی اڈ ہلیک

اسلام آباد: چین پاکستان اقتصادی راہداری نا مشترکہ رابطہ کمیٹی جے سی سی نا 12 می یات گاری دیوان اینو سے شنبے نادے آ بیجنگ اٹی اڈ ہلیک۔ پلاننگ کمیشن نا کمامدارآتا رداٹ بنجائی ڈٹ بندی و شونداری احسن اقبال دیوان اٹی پاکستانی ڈل انا کماشی ءِ کیک۔ دیوان اٹی ہڑتوم آ ملک آک کمکاری نا پوسکن ءُ کسر پٹرہ و سی پیک نا رداٹ مون آ بروک آ بشخ آتیٹی آخبت نا لائحہ عمل اس پک کیرہ۔ دا تاریخی ڈٹ ءِ 5 جولائی 2013آ ہمووخت آ رسمی درشم اس تننگا ہراتم پاکستان نا ہمووخت انا وزیراعظم نواز شریف پاکستان و چین نا نیام اٹ مفاہمت نا اسہ یات داشت اسے آ دستخط کننگ کن چین نا دورہ ءِ کرے ہراڑان دا ڈٹ باضابطہ بناکرے۔ سی پیک اسہ ہندن ءُ راہداری اسے ہرا سویلی دیکی پاکستان اٹ گوادر نا بندرگاہ ءِ قطب دیکی چین نا صوبہ سنکیانگ نا شار کاشغر تون گنڈک، دا راہداری ڈٹ اٹی توانائی، ٹرانسپورٹ و صنعتی کمکاری اوار ءِ۔ مشترکہ رابطہ کمیٹی (جے سی سی) نا دیوان بھاز اہمیت تخک انتئے کہ دا نئے بیرہ اسہ دہائی نا نتیجہ خیز کمکاری نا ڈیک بللکن دا ڈٹ انا مون نا ریسہ غاتا احاطہ ءِ ہم کننگ ءِ۔ دیوان نا مسخت ہڑتوم آملک آتا سوگو تعلقداری ءِ استوار کننگ و کمکاری نا پوسکن آ وارخواہی پٹنگ ءِ۔

(اے پی پی)