چائلڈ لیبر نا توننگ کن کانود آ عمل درآمد کروئی تمک‘ منظور بلوچ ِ
کوئٹہ: آل پاکستان لیبر فیڈریشن نا بنجائی سیکرٹری شینکاری و ایگریکلچر ایمپلائز یونین بلوچستان نا جنرل سیکریٹری منظور احمد بلوچ پارینے کہ چائلڈ لیبر راج انا ناسور ءِ، غریبی تون اوار ایلو کیہی سوب آتیان پانزدہ سال آن کم وہی انا لکھ آ چنا، اُرا، فیکٹری، ورکشاپ و مائنز اٹ مزوری کننگ آ مجبور ءُ۔ کانود آ جوان وڑاٹ عملدرآمد کننگ آن چائلڈ لیبر آ کنٹرول کننگ کینہ۔ دا خیال آتا درشانی ءِ او چائلڈ لیبر نا ایسری نا جہانی دے آ تینا اسہ کلہو اٹ کرے۔ منظور احمد بلوچ نا پاننگ ئس کہ آئین پاکستان نا آرٹیکل 25(A) ریاست ءِ پابند کیک کہ او 6 سال آن 15 سال انا وہی انا چناتے مفت و لازمی تعلیم فراوان کے وخت اس کہ آرٹیکل 27 و28 اٹ چائلڈ لیبر نا توننگ نا بابت اٹ گام گیج کننگ نا ہیت کرینے۔ 18 میکو ترمیم آن پد صوبائی حکومت آک آئین نا دا شق آتا روشنائی ٹی چائلڈ لیبر نا بابت اٹ کانود سازی کرے، چناتا حق آتا جہانی کنونشن نا ردات چائلڈ لیبر ءِ توننگ کن ریاست ءِ کڑد ادا کروئی تمک۔ آئی ایل او کنونشن 182 چناتا ملازمت نا پاوہ۔ و پانزدہ سال آن کم وہی انا چناتے جبری مشقت کرفنگ کانود نا سنگین خلاف ورزی پن کیک۔
(آن لائن)