عمران خان بے پتی تحریک آئین نا رداٹ ئس،سپریم کورٹ ہم پک کرے، گیلانی

اسلام آباد : پاکستان پیپلزپارٹی نا سینیٹر و مسکوہی وزیراعظم سید یوسف رضا گیلانی پارینے کہ عمران خان نا برخلاف تحریک بے پتی آئین نا رداٹ ئس ہرادے سپریم کورٹ ہم پک کرے، پاکستان تحریک انصاف صوبہ پنجاب و خیبرپختونخواٹی صوبائی اسمبلی تے تینٹ تحلیل کرے، اوٹی پی ڈی ایم نا ہچ ءُ کڑد اس اف، دابارواٹی عدالت انت کہ فیصلہ اس کیک، اونا شرف ءِ کینہ۔ جمعہ نادے آ سینیٹ نا دیوان اٹی قائد حزب اختلاف سینیٹر ڈاکٹر وسیم شہزاد نا اعتراضی ٹک انا ورندی ءِ ترسا سینیٹر سید یوسف رضاگیلانی پارے کہ قومی اسمبلی ٹی تحریک بے پتی غیر آئینی اَلوکہ بلکن آئین نا رداٹ تحریک بے پتی ءِ اتنگاسس، ہمووخت انا اسپیکر و ڈپٹی اسپیکر نا رولنگ غیر آئینی ئس ہرافتے سپریم کورٹ غیرکانودی گونداسس، ہراوزیراعظم نا برخلاف تحریک بے پتی برے او صدر ءِ اسمبلی تحلیل کننگ نا سفارش کننگ کپک، عمران خان صدر ءِ قومی اسمبلی ءِ تحلیل کننگ نا سفارش کرے 20 منٹ اٹی قومی اسمبلی ءِ تحلیل کننگا، خیبر پختونخوا و پنجاب اسمبلی نا تحلیل اٹی ہم او تینٹ اوار ءِ، تینا گورنر و وزیراعلیٰ آن او استیفہ ہلک، اوٹی پی ڈی ایم نا ہچ ءُ کڑد اس اف، داسہ دا عدالتی ءُ باندات اسے، عدالتی فیصلہ نا شرف ءِ کینہ۔ داکان مست سینیٹ اٹی قائد حزب اختلاف سینیٹر ڈاکٹر شہزاد وسیم پارے کہ تنقید ءِ توہین تکپبو، 90 دے اٹی صوبائی اسمبلی تا گچین کاری تے کرفنگے۔

(اے پی پی)