وزیر خارجہ شاہ محمود قریشی نا کرغزستان نا ہم منصب تون اوڑدہی

 اسلام آباد(آن لائن) وزیر خارجہ شاہ محمود قریشی شنگھائی تعاون تنظیم نا وزیر خارجہ غاتا کونسل نا دیوان نا وخت آ کرغزستان نا وزیر خارجہ چنگیز ایڈربیکوف تون اوڑدہی کرے۔ اوڑدہی ٹی ارا کنڈی تعلقداری، اہم علاقائی و جہانی ویل آتیا تینا خیال آتا درشانی ءِ کریر۔ او وخت آ شاہ محمود قریشی پارینے کہ پاکستان و کرغزستان نا نیام اٹ بھلو تاریخی ءُ رابطہ اریر۔ وزیر خارجہ پاکستان نا ایس سی او ممبرشپ کن کرغستان نا متحرک کڑد انا ستا ءِ کرسا کرغستان نا وزیر خارجہ نا منتواری ءِ ہرفے۔ ہڑتوم آ وزیر خارجہ غاک ارا کنڈی تعلقداری ءِ جوان کننگ و سیاسی، اقتصادی و اُلسی کہول آ رابطہ ءِ ودفنگ آ ہم امنائی کریر۔ اوڑدہی ٹی پاکستان و کرغزستان نا نیام اٹ ڈغاری و تہوئی رابطہ غاتے پین ودفنگ آ ہم سجفنگک۔ وزیر خارجہ کرغزستان اٹ رہنگوک آ پاکستانی کمیونٹی خاص کر تعلیم دوئی کروک آ طالبعلم آتا خاص خیال ءِ تخنگ آ تینا کرغستانی ہم منصب نا منتواری ءِ ہرفے۔ وزیر خارجہ کرونا جہانی دَینی چیلنج تون مون تننگ کن پاکستان نا کنڈآن ہرفوک آ جوان گام گیج آن ہم معلومدار کرے ہرانا سوب آن وائرس نا تالانی ٹی بھلو کچ اسسکان کمتی مسنے۔ ہڑتوم آ وزیرخارجہ غاتا نیام اٹ علاقائی امن و استحکام و اوغان امن عمل آ ہم ہیت وگپ مس۔ وزیر خارجہ بھارت نا کنڈآن مقبوضہ جموں و کشمیر اٹ برجا انگا انسانی حق آتا خلاف ورزی و بھارتی اسہ کنڈی گام گیج آتا سوب آن ڈیہہ انا امن ءِ دوئی مروک آ خلیس آتیان کرغزستان نا وزیر خارجہ ءِ معلومدار کرے۔ ہڑتوم آ وزیر خارجہ غاتا پاکستان و کرغزستان نا نیام اٹ جتا جتا اُست خواہی نا کثیر الجہتی بشخ آتیٹی ارا کنڈی کمک ءِ جوان کننگ آ امنائی کریر۔