بھٹو پاہو ہنا، نرّتو، نواز شریف اٹ دن ءُ وڑ اف، شیخ رشید

اسلام آباد: بنجائی وزیر داخلہ شیخ رشید احمد پارینے کہ مسکوہی وزیر اعظم نواز شریف نا پاسپورٹ نا وخت چٹانے، او بایدے ملک آ پدی برے، پیشن ملک اٹ رہینگ مگہ زند اسے، ذوالفقار علی بھٹو پاہو کُنگ، ولے ملک ءِ الیتو، نرّتو، دافک بھٹو نا کچ ءُ لیڈر افس، پک پاننگ کیوہ کہ اودے سیاسی پناہ ملک، جیل سیاست دان آتے کن جوڑ ءِ، نن ہفت ہفت سال بند مسن۔ پریس کانفرنس کرسا بنجائی وزیر داخلہ پارے کہ چین و پاکستان نا سنگتی ہمالیہ غان ہم بڑز ءِ، و سی پیک نا کسر اٹ ہچ ءُ وڑ اسے نا اڑاند اس سگپنہ۔ داڑکن مچ آ قوم یک زبان ءِ۔ ہرا وڑ کشمیر نا آجوئی نا جہد اتون سلوک اُن۔ ہندن سی پیک آ ہم اوار سلوک اُن، ہرا بندغ آک ملک اٹ تاڑ واڑ تالان کننگ نا بے سہب کوشست کننگ خوارہ، اوفک مسن تمرہ۔ داسو ڈیم انا بابت وزیرخارجہ شاہ محمود قریشی پاننگ کیک۔ وزارت داخلہ تینا جاست پاست ءِ پورو کرینے، ولے دانا پڑو ءِ وزارت خارجہ کیک۔ شیخ رشید احمد پارے کہ اوغان سفیر نا مسڑ نا بابت انت اس کہ ریکارڈ ئسکہ، نن اوفتے تسن، و دا رد اٹ اوغان سفیر یا اوغان حکومت جوان حوال تننگ کیک۔ اسہ سوج اسے نا ورندی ٹی او پارے کہ نوازشریف نا پاسپورٹ شانزدہ فروری آن منسوخ مسنے، و داسہ اوڑتون پاسپورٹ اف، اودے ملک آ پدی بروئی تمک، لیڈر ہمو مریک کہ ہرا ملک اٹ زند و مرک کے۔ دا ملک انا بد بختی ءِ کہ اقتدار اٹی مر تو بھلو بھلو یلہ کر، و ہراتم اقتدار کاہے تو پیشن نرہ ہن۔ ملک انا جیل آک ہم سیاستدان آتے کن ءُ۔ و اگہ لیڈر ءِ جیل آ ہنوئی تمے تو قیامت اس بفک۔ نن دروغ نا کیس آتیٹی ہفت ہفت سال بند مسن۔ نوازشریف تون اِرا کسر ءُ، او تینا اپیل ءِ کے و ایلو آپشن دادے کہ او ہموڑے سیاہ پناہ ہلے۔ شہباز شریف نا دزگیری نا بابت سوج انا ورندی ٹی او پارے کہ دا ملک اٹی بھٹو پاہو کنگ، شہباز شریف اوڑان بھلو لیڈڑ اس اف۔ شہبازشریف ای سی ایل آن پن ءِ کشنگ کن درخواست تتنے۔ اسہ پین سوج اسے نا ورندی ٹی او پارے کہ دا ملک اٹی انت اس کہ مننگ اٹی ءِ، اونا پد اٹ بھارتی اودیم ایجنسی تا و اسرائیل نا دو ارے۔ ولے ان شا اللہ نن عمران خان نا کماشی ٹی دا ویل آن ہم پیش تمنہ۔ محرم نا بنا مننگ اٹی ءِ، کل صوبہ غاتا کمامدار آتتون سیکیورٹی نا بابت ہیت کرینن، انڈیا، اسرائیل و این ڈی ایس پاکستان نا امن ایمنی ءِ خراب کننگ خوارہ۔ کورونا نا سوب بآن لال حویلی ٹی آتش بازی و جشن ءِ منسوخ کرینٹ۔ اسہ سوج اسے نا ورندی ٹی او پارے سائینو ویک ءِ اسلامی ملک آتیٹی منپننگ ءُ، ہندن ءُ سرٹیفیکیٹ جوڑ کینہ، ہرانا رد اٹ کس پین ویکسین اس خلنگ کیک۔ ای الیون نالہ غا کوزہ کروک آتا برخلاف کارروائی کینہ۔ اسلام آباد پولیس نا کچ و وسیلہ غاتے ودفنگ اٹی اُن۔ اسلام آباد اٹی سیلاب بس 1122 نا نظام کاٹم آن اَلوکہ، داسہ ریسکیو 1122 اتنگ اٹی اُن۔