جعفرآباد الس ءِ آب اٹنگا طبی آسراتی تا فراوانی ءِ اولیت ایتنہ، خالد خان

ڈپٹی کمشنر جعفرآباد خالد خان پارینے کہ الس ءِ آب اٹ و وخت آ طبی آسراتی تا فراوانی ڈاکٹر و پیرا میڈیکل اسٹاف نا اولیکو زمواری ءِ، ہندا سوب آن کل سرکاری طبی ہند آتیٹی ڈاکٹر و پیرا میڈیکل کارندہ غاتا حاضری ءِ امر کہ مرے پک کننگے۔ او پیدوار کرے کہ سرکاری ہسپتال و بنداوی جانجوڑی ہند آتیٹی دارو تا تنکی اسُل سگنگ مفک و مر انگا علاقہ غاتیان درمان کن بروک آ ناجوڑ آتے وس انا کچ آ طبی آسراتی فراوان کننگے تانکہ او اومیت مرسا پدی ہننگ آمجبور مفس۔ دا خیال آتا درشانی ءِ او ڈسٹرکٹ ہیلتھ کمیٹی نا دیوان نا کماشی ءِ کرسا کرے۔ دیوان اٹی محکمہ جانجوڑی تون اوار ایلو تعلقدار محکمہ غاتا افسر آک بشخ ہلکر و مچ آ ضلع ٹی الس ءِ فراوان کروک طبی آسراتی، طبی ہند آتا کارکڑد، دارو تا ساڑی گری، ڈاکٹر و کارندہ غاتا حاضری و مون تروک ویل آتا بابت خوڑتی اٹ بریفنگ تسر۔