عمران خان ءِ پارٹی چیئرمین شپ آن اینک کننگ نا درخواست آتا قابل سماعت مننگ آ فیصلہ ڈک

لاہور: لاہور ہائی کورٹ عمران خان ءِ توشہ خانہ کیس اٹی نابودی آ تحریک انصاف نا چیئرمین شپ آن اینک کننگ کن درخواست آتا قابل سماعت مننگ آ فیصلہ ءِ ڈک کرینے۔ لاہور ہائی کورٹ نا جسٹس عابد حسین چٹھہ آفاق احمد نا وساطت اٹ اسہ ہی وڑنا اِرا جتا درخواست آتیا سماعت کرے۔ وکیل خواست کرے کہ درخواست آتے پین بنچ اسے آ گدریفنگے۔ عدالت اَرفے کہ گدریفنگ آن انت مراد ءِ، انت دافتے سنگل بنچ یا فل بنچ آ گدریفنگے۔ وکیل خواست کرے کہ اودے چیف جسٹس لاہور ہائی کورٹ آ گدریفنگے۔ عدالت نا روبرو درخواست گزار محمد آفاق ایڈووکیٹ موقف اختیار کرے کہ توشہ خانہ کیس اٹی الیکشن کمیشن عمران خان ءِ نابود گوندانے، آئین نا رداٹ نابود بندغ سرکاری، حکومتی عہدہ یا سیاسی جماعت اسینا کماشی ءِ کننگ کپک۔ نابودی آن پد عمران خان تحریک انصاف نا چیئرمین شپ انا عہدہ غا سلنگ نا ہچ ءُ کانودی جواز اس تخپک۔ خواست ءِ کہ عدالت عمران خان ءِ چیئرمین تحریک انصاف نا عہدہ غان اینک کے۔ مستی خواست ءِ کہ عدالت تحریک انصاف ءِ پوسکن آ چیئرمین مقرر کننگ نا ہم پرمان کے۔

(اے پی پی)