وزیراعلیٰ سندھ و پوریاگر تا مذاکرات سرسہب، اینو آن مارکیٹ آک ملنگرہ

کراچی (آن لائن/ مانیٹرنگ ڈیسک) وزیر اعلیٰ سندھ مراد علی شاہ اینو آن دکان تے ملنگ نا پڑو کرینے۔ سندھ اسمبلی ٹی وزیراعلیٰ سندھ مراد علی شاہ و پوریاگر تا اوڑدہی اس مس۔ ہراٹی واپار ءِ ملنگ و ضابطہ کار اس پک کننگا۔ وزیراعلیٰ سندھ نا رد اٹ دوشنبے نا دے سہب انا 6 بجہ غان بیگہ نا 5 بجہ اسکان دکانک ملوک مریرہ۔ و دکاندارک بیگہ نا چار بجہ غان دکان تے بند کننگ نا بناءِ کیرہ۔ ترجمان پارے کہ دو شنبے آن جمعہ اسکان سہب انا 6 آن بیگہ نا 5 بجہ اسکان پوریا جا تے ملنگ نا موکل تننگانے، وخت اس کہ مسکوہی فیصلہ نا رد اٹ شنبے و یک شنبے آ گڈل لاک ڈاﺅن مریک۔ ترجمان پارے کہ شاپنگ مال، سنیما، پارک، شادی ہال و تعلیمی ادارہ غاک ملنگپسہ۔ وخت اس کہ مذہبی و راجی مچی و گوازی نا گوک ہم مفسہ۔ وزیراعلیٰ سندھ مراد علی شاہ پارینے کہ نن کوشست کینہ کہ چنکا پوریاگر تے وام ترفن، و اسہ آرڈیننس اس راہی کریسن کہ پوریاگر تے ہم ریلیف رسینگے، ولے گورنر آرڈیننس ءِ پدی راہی کرینے۔ میئر کراچی وسیم اختر پارے کہ پک کروک ضابطہ کار آ عملدرآمد کرفنگ پوریاگر تا زمواری ءِ۔ وخت اس کہ پوریاگر راہشون جمیل پراچہ نا پانگن ءِ کہ واپار نا وخت آ راجی مُری نا خیال ءِ تخوئی تمک۔