دشت جلب گندان نا مجلس

دشت انا زیبا غا مُد اٹ پدین آ چرک آتا گواڑخی زباد آتتون ”زلف انا خوشبو“ نا مون پاشی نا دود، عجب درخت آتا نیام اٹ خرن آ چاب آتیا اسہ زیبا ءُ مجلس اس ماسٹر نور احمد نور نا ارٹمیکو کتاب ”زلف انا خوشبو“ نا مون پاشی نا دود و تبصرہ خوانی نا زیبا غا کچاری تون اوار مشاعرہ نا زیبا غا مجلس، بابو عبدالرحمن کرد انا ہنکین آ 10 ستمبر جمعہ نا دے سیوت ادبی دیوان بلوچستان نا پارہ غان شبیر عاجز اس تا کمک اٹ اڈ ہلک۔ ہرانا کماشی ءِ ڈاکٹر سلیم کرد کرے۔ دود انا بنا تلاوت کلام پاک آن کننگا۔ ہرانا بختاوری ءِ سعید حسرت دوئی کرے و نعت خوانی نا ثواب گچین آ نعت خوان ناصر ندیم کن ہنا۔ دا مجلس نا شونکار سائر عزیز ئس۔

اولیکو بشخ کتاب نا مون پاشی ٹی ڈاکٹر سلیم کرد نا کماشی ٹی مس۔ گچین آ مہمان براہوئی ادبی سوسائٹی نا کماش عبدالقیوم بیدار ئس۔ ہندن اعزازی مہمان تیٹی آماچ ادبی دیوان مستونگ نا کماش حاجی شاہ بیگ شیدا، اکبر آزاد، اعظم مشتاق بنگلزئی، سرفراز بنگلزئی، ایماندار ماسٹر نور احمد نور نا ایلم ماسٹر میر احمد کرد اوار ئسر۔

منہ دے مہالو براہوئی ادبی سوسائٹی نا پارہ غان شینک کننگوک آ ایماندار نور احمد نور نا ارٹمیکو کتاب نا مون پاشی نا دود سر تننگ آن پد تبصرہ غاک مسر، تبصرہ کروک آتیٹی ظہور صدیقی، نور خان نواب محمد حسنی و سائر عزیز اوار ئسر۔

دا مجلس ءِ ”محفلِ نور“ نا پن تننگا۔ کہ ماسٹر نور احمد نور نا پن آ دا مجلس اڈ تننگاسس۔ داٹی ایماندار نا شاعری تیا و اونا زندگی نا زی آ پبی ءُ ہیت و گپ کننگا۔ داڑتون اوار جلب گندان نا تاریخ نا زی آ ہم روشنائی شاغنگا۔ ایماندار بابو عبدالرحمن کرد اناوتاخ سیاسی شخصیت آتا جاگہ مسنے۔ دا رد اٹ ہم بھلو بھلو شخصیت جلب گندان نا ڈغار ءِ شرف تسنو۔

ایماندار ماسٹر نور احمد نور نا ”زلف انا خوشبو“ نا رد اٹ مروک آ مجلس نا کماش و مہمانک و تبصرہ کروک آک گچین ءُ وڑ اسے ٹی زیبا غا ہیت آتے کریر۔

وطن نا شاعر بابو عبدالرحمن کرد نا مڷ ڈاکٹر سلیم کرد تینا تران اٹی بابو نا کارکڑد و جلب گندان نا تاریخ و ماسٹر نور احمد نور نا بارو اٹ بھا ززیبا ءُ ہیت و گپ کرے۔ اولیکو مجلس نا کماش نا رد اٹ او تینا بھلا چاہنداری تیان بھلو چاہنداری اس تس۔

ہندن عبدالقیوم بیدار اولیکو مجلس نا مہمان تیان تران اٹی پارے کہ ایماندار ماسٹر نور احمد نور تینا دور اٹی تینا کتاب ءِ ادبی سوسائٹی ءِ تس، بے بختی دا مس کہ اونا زند اٹی دا کتاب شینک مننگ کتو۔ ایماندار ماسٹر تینا کزیت آن مسہ دے مہالو ہم تینا کتاب نا بارو اٹ حال حوال کرے، ولے ای پیشن ئسٹہ۔ حاجی شاہ بیگ شیدا تینا تران اٹی پارے کہ ایماندار ماسٹر نور احمد نور تون اسہ جاگہ اس اوار تماٹ۔ درستی راستی مسٹ، اوکان پد تینا کتاب ءِ ہم کنے آ مون تس۔ شاعری نا اصلاح کن۔ ولے بے شینی دا کہ ای اونا ہمو وڑ راہشونی ءِ کننگ کتوٹ۔

اکبر آزاد تاریخی وڑ اٹ جلب گندان نا زی آ جوان ءُ ہیت کرے، ہندن ماسٹر میر احمد کرد ایماندار نا زند انا بابت گچین ءُ ہیت کرے۔ ظہور صدیقی تینا تبصرہ ٹی پارے کہ اگہ دا کتاب ایماندار نور احمد نور انا زند اٹی بروسس گڑا دانا مسخت پورو ئس۔ داسہ دا کتاب نا بننگ نا مسخت نا ہمو اہمیت سلتو۔ ہندن سائر عزیز تینا تبصرہ ٹی کتاب نا تہٹی مروک آ لاپرواہی تا ہیت ءِ کرے، وپارے کہ دا ادارہ نا غیر ذمہ داری نا شاہدی ءِ ایترہ۔ ہمو ردینک آتا زی آ و ماسٹر نور احمد نور نا شاعری نا بابت اٹ گچین ءُ ہیت و گپ کرے۔ دا مجلس یانزدہ بجہ غا بنا کننگا، و یک بجہ اسکان چکا۔ ہندن سَے بجہ غا مشاعرہ نا مجلس نا بنا کننگا۔ ہرانا کماشی ءِ بلوچستان ادبی کچاری نا کماش سید آغا غریب شاہ انجم کرے۔ مجلس نا گچین آ مہمان و دے ٹِک ادبی دیوان مستونگ نا کماش عبداللہ جوہر ئس۔ ایلو مہمان تیٹی مچھ بولان نا زیبا غا ڈغار آن ودی مروک آ صابر اسیر، مستونگ آن شاشان انجمن شعراء بلوچستان نا کماش بشیر احمد شاد، گوشہ براہوئی نا کماش ظہور احمد صدیقی، شال ادبی دیوان نا کماش اعجاز سنگت، شون ادبی دیوان نا مہربان نظام نذیری، دشتل ادبی دیوان نا کماش رحیم صیاد اسک ئسرہ۔

مشاعرہ ٹی ساڑی مروک آتا پنک دا وڑ ءُ:

ڈاکٹر سلیم کرد، عبدالقیوم بیدار، حاجی شاہ بیگ شیدا، بھاول نسیم، بابل نسیم، سلام صائم، سلام جانان، ظفر معراج، ماسٹر میر احمد کرد، خالدی بلوچ، حیدر حسرت، عبدالباسط صمیم، ناصر ندیم، نور خان نواب، کلیم ساگر، اے ڈی بلوچ، عطاء انجم، حجت ظہیر، سعید حسرت، عبدالرحیم تائب، اے جی بلوچ، طارق اسیر، کریم شہزاد، فہیم ساغر، بابل فراز، واحد فراز، سائر عزیز، اعجاز نسیم، شاہد آشوب، صابر شہزاد، شکور تبریز، نذر سنگت، ہدایت زیب زیبی، نظام اسیر، بلال عاجز، وحفیظ سائر (حوالکار)۔

دا مجلس شام انا بانگ اتون ایسر مس۔

ہفتئی تلار
تاک: 38
15-09 اکتوبر 2021ء
پنہ: 07