صوفی رنگ …….. کشمیری بزرگ صوفی شاعر شیخ نور الدین رشی

حسین بخش ساجد

0

Get real time updates directly on you device, subscribe now.

 

زیبا غا کشمیر نا پیدائشی آ ولی و بزرگ آ شاعر شیخ نور الدین رِشی، متکن آ ریاست کشتواڑ آن امپ و لڈ کرسا کشمیر آ بروک آ خاہوت نا بندغ ”سلرسنز“ نا اُراٹی 757ھ ٹی ودی مس۔ کہ پدا شیخ نور الدین دا جاگہ نا پنی آ بزرگ شیخ سالار الدین سید حسین سمنانی نا دُو آ بیعت کرسا اسلام ءِ قبول کرے۔ 13 سال نا وئی اٹی باوہ غان چوری مس۔ تو اونا لمہ جیجا اونا برام ءِ اسہ نیک سیرت آ نیاڑی ”زون دِو“ تون کرے۔ کشمیری زبان اٹی زون تُوبے و دِو ایڑھ ءِ پارہ۔

دے اس شیخ نور الدین رشی 19 سال نا وئی اٹی بس تو اُرا ءِ اِلسا غار اسے ٹی عبادت اٹی مشغول مس۔ اسہ روایت اسے ٹی دادے کہ او دا غار اٹی 12 سال چلہ کشی کرے۔

شیخ رشی کشمیر نا پنی ءُ نیاڑی بزرگ و درویش نیاڑی شاعر للا عارفہ غان رشد و ہدایت، انسان دوستی و دین داری نا سبخ ءِ ہیل کرے۔

تصوف نا چار انگا سلسلہ (1)قادری، (2)چشتی، (3)سہروردی و (4) نقشبندی آنبار ”رشی“ ہم کشمیر اٹی تصوف نا اسہ سلسلہ اس ئسکہ۔ نور الدین رشی نا کلام اٹی اسلامی تصوف نا رنگ نمہ دار ءِ۔ اونا کلام اٹی کشمیری زبان نا سُچا غا لوز و متل وساہت آک ہم ننے دو بریرہ۔

رشی نا کلام ءِ کشمیر نا لس مخلوق و شوان و بگجت، بزغر، و پاٹ چمولہ کروک آ نیاڑیک و ایلو کشمیریک بھاز گُٹ و سوز اٹ پارہ کہ اوفتا توار آن مش و پٹ و بیبان تیٹی اسہ چس و زیبائی اس ودی مریک۔

شیخ نور الدین رشی قرآن پاک نا تعلیم آتے تینا شاعری ٹی اوار کرسا لس کشمیری مخلوق اسکان سر کرے۔ و او تینا کلام اٹ دین نا تبلیغ ءِ کرے۔ اونا کلام ءِ ہم ”اشلوک“ پاننگک۔

کشمیر نا دا پنی آ بزرگ شاعر 63 سال نا وئی اٹی 846ھ ٹی دا ناپائیدار آ کوڑی آن موکل کرے۔ اونا کزیت نا وخت آ کشمیر اٹی سلطان زین الدین بڈھ شاہ نا حکومت ئس۔ کہ او رشی نا بھاز قدر کروک اس ئسکہ۔ و او رشی نا نماز جنازہ ءِ ہم تینٹ خوانا۔ یعنی وخت انا حاکم دا بزرگ نا جنازہ ءِ خوانا۔

کشمیری کلام: شیخ نور الدین رشی

…………1…………

گلشن تون انت اونا سیالی، واسطہ انت باغ آتتون

شاخ آن جتا کہ او مس وخت اس، تہو انا گواچی مسک

انت اوڑکن ءِ دے انا گرمی، انت اوڑکن روشنائی

او بیوس کہ کسر اٹ موت انا گواچی مس ہنا

…………2…………

ہِرس و شہوت و تکبر دا مُسٹ

رہزن آک ءُ ہر بشر نا گام گام

زیر کس دافتے کرے تو او پدا

خدمتِ خلق او کرو ءِ شوق اٹی

رب انا طالب ارے او برملا

پہہ مرے دنیا ءِ کس منہ دے انا

…………3…………

است ہمو مچھی ءِ بے دیر آن اسُل زندہ مفک

ذکر و فکر نا دیر اودے نی ترک ہڑدے مدام

نا کہ دا رُو ءِ ارے لعل بدخشان پہہ مرک

رُوح نا گر پاک ءِ تو نے اللہ رسینگو گام گام

…………4…………

بدن ءِ پاک کریس تینا نی سلاس مدام

ولے پاک ہچ متو، است نا ولدا ہم

نا دا تسبیح و عصاء، نا دا لویس پاک انگا

کتوس پورو اسل نا مسخت ءِ ہچ ہم

ہفتئی تلار
تاک: 38
15-09 اکتوبر 2021ء
پنہ: 07

Get real time updates directly on you device, subscribe now.

Leave A Reply

Your email address will not be published.