زندان نا ڈائری، سال 1973ء……دزگیری نا پس منظر……(34)

لندن پلان نا غوغا:

پاکستان پیپلزپارٹی و مسلم لیگ (قیوم) نا مخلوط حکومت ایرانی شہنشاہ محمد رضا شاہ پہلوی نا است خواہی آ نیپ انا بلوچستان و سرحد اٹی جمعیت تون مخلوط حکومت نا برخلاف پڑ اس ملا۔ خاص وڑ اٹ بلوچستان نا ایرانی سیم اتون ایران اٹی ودوک آ بلوچ قوم پرستی نا گڑتی ءِ مون آ تخسا نیپ انا برخلاف محلاتی سازش تیٹی اختہ ئس کہ ہندا دے تیٹی بنگلہ دیش نا وزیراعظم شیخ مجیب الرحمن درمان کن لندن آ ہنا۔ نواب محمد اکبر بگٹی تون اوار پاکستان نا منہ پنی ءُ سیاستدان و شخصیت ہمو دے تیٹی لندن اٹی ئسرہ۔

پاکستان برّی فوج انا اسہ ریٹائرڈ افسر اس، ملک غلام جیلانی ہرا کہ مردان نا باتی اس ئسکہ، و نیپ انا سروک خان عبدالولی خان نا خڑک انا سنگت اس ئسکہ، او 26جولائی آ درمان کن لندن آ ہنا۔

دیکی پاکستان نا مسکوہی عوامی لیگ نا راہشون قاضی فیض محمد 16اگست آ، خان عبدالولی خان 24 اگست آ تینا خن تا درمان کن کابل آن لندن آ ہنا۔ محمد ہارون، یوسف ہارون، عوامی لیگ نا حامد سرفراز، نیپ بلوچستان نا وزیراعلیٰ سردار عطاء اللہ مینگل، نواب محمد اکبر بگٹی نا ایلم بلوچستان صوبائی کابینہ نا وزیر احمد نواز مہالو آن لندن اٹ ئسرہ، ہرا کہ ناراض بلوچ راہشون نواب محمد اکبر بگٹی ءِ خوش کننگ کن ہناسر۔

شیخ مجیب الرحمن نا لندن اٹ اڈ کننگ نا دے تیٹی پاکستان نا چندی راہشون و شخصیت آک اوڑتون متکنی آ تعلقداری تے مون آ تخسا اوڑدہی کریر۔

روزنامہ جنگ انا رپورٹر نا رد اٹ شیخ مجیب الرحمن تون 17 اگست1972ء نا دے اوڑدہی کرے۔ اِرا دے آن پد 19 اگست آ روزنامہ ڈان آن تعلقدار محمد ہارون، یونس ہارون، قاضی فیض محمد وحامد سرفراز اس تا اوڑدہی نا خبر ءِ شینک کرے۔

7ستمبر نا دے بلوچستان مسلم لیگ (قیوم) نا صدر میر نبی بخش زہری شیخ مجیب الرحمن تون ملا۔

ہندا اوڑدہی تے مون آ تخسا ستمبر 1972ء نا دے نیشنل پریس ٹرسٹ ہرا کہ حکومت پاکستان نا کنٹرول اٹی ئسکہ، تینا اسہ رپورٹ اسے ٹی لندن اٹی پاکستان نا سلامتی نا برخلاف اسہ سازش اسے نا پت پاشی نا حوال تس، ہرادے ”لندن پلان“ نا پن تننگا۔ نیشنل پریس ٹرسٹ تینا دا حوال اٹی پارے کہ اسہ وار پاکستان نا اپوزیشن جماعت آتیان تعلقدار راہشون تا تین پہ تینی اسہ دیوان اس مس، ہراٹی اوکان پد اوفک شیخ مجیب الرحمن تون مِلار۔

نیشنل پریس ٹرسٹ آف پاکستان نا رپورٹ نا رد اٹ حوال اٹ دا دوبہ خلنگا کہ دا پلان نا رد اٹ حکومت پاکستان ءِ نزور کرسا اودے وتواجہ ریاست آتیٹی بشخنگک۔ رپورٹ نا شینک مننگ تون بنجائی حکومت دادے پاکستان نا سوگوی نا برخلاف سازش اس گوندسا تینا کل وسیلہ غاتے کاریم اٹ اتسا میڈیا نا کمک اٹ ”لندن پلان“ نا جوان غوغا ءِ کرے۔

12 ستمبر 1972ء نا دے گورنر بلوچستان میر غوث بخش بزنجو ”مساوات“ کراچی ءِ تروک اسہ انٹرویو سے ٹی نیشنل پریس ٹرسٹ نا کنڈ آن ”لندن پلان“ نا رد اٹ خلوک دوبہ غاتے سٹی گوندسا دادے بد بیسئی رویہ اسے تون گنڈا۔

ہفتئی تلار
تاک: 15
21-17 اپریل 2021ء
پنہ:2