کوئٹہ ویڈیو اسکینڈل،ریاست تینا زمواری ءِ پورو کیک،میر قدوس بزنجو

کوئٹہ : وزیراعلیٰ بلوچستان میر عبدالقدوس بزنجو تون کوئٹہ شار اٹ زوت آتیٹ ویڈیوسکینڈل نا رد اٹ سول سوسائٹی نا ٹہیفوک قومی اصلاحی کمیٹی نا ڈل علامہ علی حسنین نا کماشی ٹی اوڑدہی کرے‘ ایچ ڈی پی نا جنرل سیکرٹری احمد کوہزاد ہزارہ ہم دا وخت آساڑی ئس‘ ڈل وزیراعلیٰ ءِ ویڈیوسکینڈل نا بابت الس اٹ ساڑی گڑتی تیان آگاہ کرسا سکینڈل نا دزگیر بنجائی دوبہ دار نا برخلاف سخت کاروائی کننگ ناخواست کرے‘ ڈل اتون ہیت وگپ کرسا وزیراعلیٰ باور کرفے کہ ویڈیو سکینڈل نازموار دوبہ دار ءِ امر کہ مرے اونا کروک نا سزا ترفنگک و دوبہ دار ءِ سزا ترفنگ کن ریاست تینا زمواری تے پورو کیک۔ وزیراعلیٰ پارے کہ ویڈیو سکینڈل بھاز است ہسون ءُ واقعہ اسے‘ ہرا راج ءِ سرفینے۔ اوپارے کہ ننا روایت آتے ٹی لمہ ایڑھ ومسن تے شرف واحترام نا بڑزکو ہنددوئی ءِ‘ ویڈیو سکینڈل ننا روایت آتے لتاڑانے‘ وزیراعلیٰ پارے کہ ہرا راج آتے ٹی انصاف مف ہموڑے ڈوہک زیات مریرہ‘ حکومت سول سوسائٹی تون اواری اٹ راج انا اصلاح کن تینا کڑد ءِ ادا کیک۔ وزیراعلیٰ دا وخت آ آئی جی پولیس تون ٹیل فون آرابطہ کرسا کیس انا پیش رفت آن آگاہی ہلک و آئی جی ءِ سہی وڑ اٹ کیس انا پرسجو ءِ تیز کننگ نا پارت کرے‘ او زور شاغا کہ پراسیکیوشن اٹ ہچ ءُ وڑ اسے نا کمتی النگپ تاکہ دوبہ دار ءِ ہچ ءُ فائدہ اس رسینگپ‘ پولیس دوبہ دار ءِ دزا ترفنگ کن ہر وڑ انا گام گیج کے تاکہ داکان پد کس ءِ کس انا عزت ءِ خراب کننگ نا جیرت مف۔ وزیراعلیٰ آئی جی پولیس ءِ زہمی خاہوت آتتون پورو کمک کننگ ناپارت ہم کرے۔ وزیراعلیٰ پارے کہ نااومیتی گناہ ءِ و ای ساہ وڑاسے نا حالیت آتے ٹی ہم نااومیت متنٹ‘ کنا پیرہ مزدور کسان پارٹی نا پلیٹ فارم آن الس نا حق آتیکن جہد کرسا کرینے‘ کنا باوہ بزرگوار ہم تینا مچ آزند ءِ الس ناخذمت اٹ گدریفے و داسہ ای تینا بزرگ آتا رند ءِ ہلسا الس ناخذمت نا عزم اتون حکومت اٹ بسونٹ۔ وزیراعلیٰ پارے کہ کنا خاہوت مدام ظلم و بے انصافی نابرخلاف توار چست کرینے‘ نئے وخت اس اصول آتیا سمجھوتہ کرینے و نئے ظلم انا مون آ کاٹم ءِ شیف کرینے‘ کنا ایمان ءِ کہ اگہ حالیت آتتون پبی مون تننگے تو سرسہبی دوئی مریک۔ وزیراعلیٰ پارے کہ او تینا سنگت آتتون اوار اسہ عظیم ءُ مسخت اس مون آتخسا حکومت ءِ بدل کننگ کن جہد کریٹ و الس نا دعا تے ٹی سرسہب مسٹ‘ مچ آ جہد اٹ ای وخت اس ہم نااومیت متوٹ۔ او پارے کہ نن صوبہ نا حق آتا بابت بنجا ءِ ہم پارین کہ ننے فار گرانٹڈ ہلنگپ بلکہ ننا موقف ءِ سرپند مننگے۔ وزیراعلیٰ ویڈیو اسکینڈل نارد اٹ پارے کہ راجی گندہ ئی تے چٹفنگ کن راج انا کل بندغ خاص وڑ اٹ باوہ لمہ غاتے ہم تینا کڑد ءِ ادا کروئی مریک‘ ڈل باندات نا بابت وزیراعلیٰ نادمدستی ردعمل آ است جمی نا درشانی ءِ کرسا اونا منت ءِ ہرفے۔

(آن لائن)