اومیت ءِ پیپلز پارٹی نن تون (ن) لیگ آنبار کپک، نواب ثناء زہری

کوئٹہ: مسکوہی وزیراعلیٰ بلوچستان نواب ثناء اللہ زہری و جنرل(ر) عبدالقادر بلوچ پاکستان پیپلز پارٹی ٹی ہننگ نا پڑو کریر۔ نواب زہری پارے کہ بلوچستان نا مخلوق عزت کن ملاس ءِ، اومیت ءِ نوازشریف انت اس کہ نن تون کرے، پیپلز پارٹی ہمون کپک۔ نوازشریف 22 باسک ءِ منہ اسمبلی باسک اسے کن ندر کرسا حکومت ءِ قوم پرست آتا دوٹی تس۔ اینو ای دوارہ تینا باوہ نا متکن آ پارٹی ٹی ہننگ اٹی اُٹ۔ سریاب ہرا غزہ نا پٹی نا پن اٹ پنی ئس، مخلوق ہن بر کتوکہ، اینو داڑے تولسا جلسہ کننگ اٹی اُن۔ دشمن آتا دُو تیان شہید مروک آک اینو آن بلاول بھٹو زرداری و نواب ثناء اللہ زہری نا وارث ءُ۔ بلوچستان ءِ پیپلستان جوڑ کرسا صوبہ نا کنج کنج اٹ جئے بھٹو نا نعرہ خلفنہ۔ پاکستان پیپلزپارٹی ٹی اواری کن اڈ تروک آ جلسہ ٹی پاکستان پیپلزپارٹی نا صوبائی جنرل سیکرٹری روزی خان کاکڑ، بنجائی راہشون حاجی میر علی مدد جتک، حوالکاری سیکرٹری سردارسربلند جوگیزئی، سحر گل خان خلجی، شریف خان خلجی و ایلوفک ہم ساڑی ئسر۔ دا وخت آ چیف آف جھالاوان مسکوہی وزیر اعلیٰ بلوچستان نواب ثنااللہ زہری، مسکوہی گورنر بلوچستان مسکوہی بنجائی وزیرجنرل ریٹائرڈ عبدالقادر بلوچ، تون اوار مسکوہی صوبائی وزیر کرنل ریٹائرڈ یونس چنگیزی، مسکوہی صوبائی وزیر نواب محمد خان شاہوانی، مسکوہی صوبائی وزیر آغا عرفان کریم احمد زئی، مسکوہی سلاہکار وزیراعلیٰ بلوچستان کشور احمد جتک، مسکوہی ضلعی ناظم نصیرآباد سردار چنگیز ساسولی، سردار عمران بنگلزئی، میر عبدالرحمان زہری مسکوہی چیئرمین خضدار، نواب شیرباز نوشیروانی، میر عرفان کرد، میر غازی خان پندرانی، سید عباس شاہ تون اوار کیہی اہم انگا قبائلی وسیاسی راہشونک پیپلزپارٹی ٹی ہننگ نا پڑو کریر۔ جلسہ غان تران کرسا نواب ثناء اللہ زہری بلاول بھٹو زرداری ءِ کوئٹہ غا بننگ آ بیا بخیر کرسا پارے کہ نن مہالو ہم پارینن و اینو ہم پانہ کہ نن مسلم لیگ(ن) ءِ انتئے اِلان، جنرل عبدالقادر بلوچ تولوک ءِ، ہرا نوازشریف ءِ ننا اُرا غا ایس۔ نن نواز شریف ءِ پارین کہ ڈکٹیٹر نن تون بیدادی کرے، پاہو تس، ولے ننے لاش تے تتو۔ نن منت وار اُن ہمو بلوچ و سندھی تا خاص وڑ اٹ ذوالفقار علی بھٹو نا ہرا کنا ماما و تینائی تا لاش تے شرفمندی اٹ ننے پدی تس۔ نن پنجاب آن ہچ اس خواپنہ، بیرہ عزت خوانہ۔ نواز شریف پارے کہ نن ان شاء اللہ نمے عزت ایتنہ، ولے نن خنان کہ کنا مار تا خونی تا پاننگ آ نوازشریف ننے بے شرف کرے، نن پاہو نا چٹ ءِ بک ہلکن، انگریز آتا دور آن تینا شرف اکن کاٹم تسن۔ ولے عزت نا سودا ءِ کتون۔ او پارے کہ اگہ نواز شریف نا وس مروسس تو او مری معاہدہ غا عملدرآمد کن ہم الیتوکہ۔ ولے نن اودے دن کننگ کن الیتون۔

(آن لائن)