آئی ایم ایف تون برجاتُو معاہدہ مننگ نا گمان پک ءِ، وزیر اعظم

اسلام آباد : وزیراعظم محمد شہباز شریف پارینے کہ آئی ایم ایف تون برجاتُو معاہدہ مننگ نا گمان ءِ، مچ آ دنیا ٹی داوخت آ کبینی تینا ترندی آٹی ءِ، مسکوہی حکومت زرگزران نا جنازہ ءِ کشاسس، کبینی نا بے کچ بھاریم نا کیرغ لس بندغ ءِ ریلیف تننگ حکومت نا زمواری ءِ، کشاری بشخ اٹی شونہالی نا بے کچ وارخواہی ساڑی ءِ، زرگزران نا شونداری سیاسی سوگوی تون وابستہ ءِ۔ داخیال آتا درشانی ءِ او بنجائی کابینہ نا دیوان آن تران کرسا کرے۔ وزیراعظم محمد شہباز شریف بنجائی کابینہ نا دیوان اٹی باسک آتے بخیر اٹ پارے۔ او سلاہکار وزیراعظم نا وڑ تعیناتی آ شیخ روحیل اصغر ءِ مبارکبادی ترسا دا اومیت نا درشانی ءِ کرے کہ او خواری و تندہی اٹ تینا زمواری ءِ پورو کیک۔ وزیراعظم کابینہ ءِ پارے کہ وزیرخزانہ اسحاق ڈار تدوک آ دے زرگزران نا حالیت آتیا پریس کانفرنس اٹیگپ وتران کرینے۔ دا ہیت ڈکھوک اف کہ 14 تُو مست ہراتم نن زمواری ءِ سنبھالان تو ننا مون آ بھلا زرگزرانی چیلنج ئسک، تدوک آ حکومت آئی ایم ایف تون ہرا معاہدہ ءِ کریسس اوفتے لتاڑاسس و تینٹ اونا خلاف ورزی ءِ کرے۔ نن بھلو مشکل اسے اٹ آئی ایم ایف تون باندات آتے طے کرین۔ وزیراعظم پارے کہ تدوک آ سال چاگڑدی کچٹی نا سوب آن بھسکار نوکاپ تون مون تروئی تما ہرا زرگزران ءِ بے کچ نسخان تس، اوکان پد ہم نوکاپ زہمی تا بحالی و ریلیف کن کابینہ نا تعلقدار باسک آک و بنجائی و صوبائی حکومت آک پورو تندہی اٹ دے و نن ءِ اسٹ کریر، جہانی ادارہ غاتیان ہم کمک ہلنگا و بنجا و صوبہ غاک تینا وسیلہ غاتے اٹ ارب آ روپئی خڑچ کریر، بنجا نوکاپ زہمی تیکن 100 ارب روپئی خڑچ کرے، سنگت ملک آک ننتون تفیر۔ اوپارے کہ نوکاپ آن اوفتا زرگزران ءِ 30 ارب ڈالر نا نسخان مس۔ وزیراعظم پارے کہ یوکرین اٹی ودی مروک آ حالیت آتیان جہانی منڈی تیٹی المی آ گڑاتا نہاد آک ودار، دنیا ٹی کساد بازاری نا کچ ئس ہرانا پاکستان کون آ پدتموک ملک ءِ ارب آ ڈالر زیات ادا کننگ نا دروشم اٹ نسخان مس خواہ او تیل انا نہاد آتا باندات مرے یا کھد، خولم یا کرپاس نا، ہر رداٹ ننے ا بھاریم اٹ ودکی مس۔ وزیراعظم پارے کہ آئی ایم ایف تون توسن و آئی ایم ایف نا غٹ شڑت آتے من و عن نئے بیرہ امنا کرین بلکن نن دا چرجوئی ٹی پورو وڑاٹ بنائی گام گیج ہم کرین۔ وزیراعظم پارے کہ آئی ایم ایف تون سٹاف لیول ایگریمنٹ آ داسکان دستخط کننگ تنے اوکان پد بورڈ اٹی دا باندات ءِ ہنوئی ءِ۔

(اے پی پی)