گوادر پورٹ نا کمک اٹ ٹرانزٹ ٹریڈ ءِ ودفنگک

اسلام آباد : پاکستان، چین و اغانستان سلامتی نا چیلنج آتے علاقہ و جہانی سلامتی کن بھلو خطرہ اس گوندسا سکیورٹی‘ منظم ڈوہ‘ منشیات نا اسمگلنگ آ ہم آہنگی و کمک آ امنا کرینو وخت اس کہ اوغانستان نا تہہ انا باندات آتے ٹی نیام تمنگ ءِ بس کننگ و اوغان امن، سوگوی و شونداری ناگرج آتیا زورشاغنگاو جہانی برادری آن خواست کننگانے کہ او مہاجر آتے شرف اٹ اٹ پدی دننگ و دوارہ اوار کننگ کن ہمو ملک و اوغانستان تون گرج انا کچ آ کمک کے۔ حوال نا رد اٹ وزارت خارجہ چین، اوغانستان و پاکستان نا وزیرخارجہ غاتیا ساڑی سَے فریقی کمیشن دیوان نا اسیجائی اعلامیہ ءِ جاری کرینے‘ ہرانا رد اٹ شش مئی نا دیوان اٹ ہر مسٹ آک پڑک آک سلامتی نا چیلنج آتتون مون تننگ نا گرج آ زور شاغار‘ اسیجائی اعلامیہ ٹی پاننگانے کہ سلامتی نا چیلنج آک علاقہ و جہانی سلامتی کن بھلو گڑتی و خطرہ ءُ۔ سلامتی نا چیلنج آک مچ آنا ڈیہہ انا سوگوی و اقصادی شونہالی آ زہم شاغنگ اٹی ءُ‘ ہر مسٹ آ پڑک آک سیکورٹی، منظم ڈوہ‘ منشیات نا اسمگلنگ آ ہم آہنگی و کمک آ امنا کریر۔ ہر مسٹ آ پڑک آک جہانی برادری تون تین پہ تینی کمک ءِ سوگو کننگ و تعلقدار ملک آتے دا رد اٹ المی ازباب‘ گڑا و تکنیکی کمک فراوان کننگ آ امنا کریر‘ پڑک آک تحریک طالبان پاکستان، ایسٹرن ترکستان اسلامک موومنٹ تون اوار ہر وڑ انا بندغ‘ پڑک یا جماعت ءِ علاقائی سلامتی ءِ نسخان رسیفنگ و خطرہ نا باٹی تننگ کن تینا ڈغار ءِ کاریم اٹ اتنگ نا موکل تفننگ آ زور شاغار۔ پڑک آک اوغانستان نا تہہ انا باندات آتے ٹی نیام تمپننگ و اوغان امن، سوگوی وشونداری نا گرج آ زور شاغار‘پڑک آک اوغانستان اٹ اقتصادی سرجز ودی کننگ آ زور شاغار۔ چین، اوغانستان و پاکستان نا وزیر خارجہ غاک اوغان زرگزران نا بحالی کن حقی ءُ کسر پٹنگ نا اہمیت آ زور شاغار‘ دامسخت کن وزیرخارجہ غاک اوغانستان نا شونداری کن پین کمک کننگ و صنعت کاری و روزگار نا وارخواہی ودی کننگ کن سَے فریقی زرکاری نا وارخواہی تے پٹنگ نا بابت سجفنگ آ امنا کریر‘ اوغانستان نا الس تون یکجہتی نا درشانی کرسا ہر مسٹ آ پڑک آک اوغانستان نا مخلوق کن سوگو دمدستی انسانی کمک نا اہمیت آ زور شاغار۔ پڑک آک پاریر کہ اوغانستان اٹ انسانی بنداو آ کارروائی تیکن فنڈنگ نا خورکی ءِ پُرکننگ المی ءِ۔

(آن لائن)