لاک ڈاﺅن اٹ پوریاگر برادری ءِ بھاز نسخان مسنے‘ انجمن تاجران بلوچستان

کوئٹہ (آن لائن) مرکزی انجمن تاجران بلوچستان نا صدر عبدالرحیم کاکڑ پارینے کہ لاک ڈاﺅن اٹ پوریاگر برادری ءِ بھاز نسخان مسنے‘ حکومت لاک ڈاﺅن آن زہمی دکاندار‘ بلوچستان ناالس نا اِرا تُو انا گیس بجلی و ٹیل فون نا بل آتے بشخنگ ناپڑو کرے۔ حکومت بلوچستان 14اپریل اسکان لاک ڈاﺅن اٹ نرمی کرسا پوریاگر برادری کن بے سود وام تا پڑو کے و دکان تے ٹی کاریم کروک مزور تے ہم تنخواہ تننگے۔ دا خیال آتا درشانی ءِ او مرکزی انجمن تاجران بلوچستان رجسٹرڈ نا جنرل سیکرٹری سید عبدالقیوم آغا، سینئر نائب صدر حضرت علی اچکزئی، سید تاج آغا، میر یاسین مینگل، حاجی خدائے دوست، سعداللہ اچکزئی، حاجی ظفر کاکڑ، حاجی حسام الدین اچکزئی، حمداللہ ترین، قاری عبیداللہ، عبدالخالق آغا و سیف الدین نثار وایلوفتتون اوار پریس کانفرنس کرسا کرے‘ او پارے کہ مچ آ ملک آنبار بلوچستان اٹ ہم جہانی دَین کورونا نا سوب آن پورو لاک ڈاﺅن ءِ‘ لاک ڈاﺅن اٹ پوریاگر آتا نسخان تیا بنجائی و صوبائی حکومت آن خواست کینہ کہ حکومت بلوچستان لاک ڈاﺅن آن زہمی دکاندار و بلوچستان ناالس نا 2 تُو انا گیس، بجلی و ٹیل فون نا بل آتے بشخنگ نا پڑو کے۔ حکومت بلوچستان 14 اپریل اسکان سہب انا 10 بجہ غان بیگہ نا 6 بجہ اسکان لاک ڈاﺅن اٹ نرمی و 14 اپریل آن پد لاک ڈاﺅن ءِ پورو چٹفے اگہ حکومت لاک ڈاﺅن ءِ چٹفتو تو مرکزی انجمن تاجران بلوچستان رجسٹرڈ 15اپریل آن لاک ڈاﺅن ءِ تینٹ چٹفک و بلوچستان نا غٹ ضلع غاتا واپاری ہندجاٹ‘ دکان و شاپنگ سینٹر آتے ملک۔