بیلہ شار………………(سیل و چکر)…. (1)

انجینئر جمیل احمد کرد

0

Get real time updates directly on you device, subscribe now.

 

کوئٹہ غان 500 وخت اس کہ کراچی آن 200 کلو میٹر نا مُری آ تاریخی آ شار بیلہ ءِ۔ پاکستان نا آجوئی آن مُست و آجوئی 1947ء آن گڈ ہم منہ وخت اسکان ضلع لسبیلہ اسہ آجو ءُ ریاست اس ئس۔ والئی ریاست ہمو وخت آن ہلیس اینو اسکان ”جام“ پاننگرہ۔ بیلہ شار ریاست نا دارالخلافہ مسنے۔ دا شارآن پیشن آن بروک آ بادشاہ و جتا جتا کڑد آتا مہماندار مسنے۔ و ہندا شار آن مچ آ ریاست نا بست و بند و سیاسی و فوجی معاملہ غاتے سنبھالنگاکہ۔ دا ریاست 1742ء اٹی جوڑ مس۔ و جام غلام قادر (ایماندار) نا 1955ء اٹی ملک پاکستان تون الحاق (اوار مننگ) تون اوار دانا ریاستی حیثیت ایسر مس۔ دا شار انا پِنی آ بندغ آتیٹی جام غلام قادر، جام یوسف، و دا وخت آ جام کمال خان ءِ کہ او صوبہ بلوچستان نا وزیراعلیٰ نا منصب آ تولوک ءِ،ہندا شار آن تعلقداری تخک۔ و مون نا گدرینگوک آ ہڑتوم آ پنک ہم بلوچستان نا وزیر اعلیٰ مسنو۔ دا شار/ضلع نا سیم سر آک ضلع خضدار، ضلع آواران، ضلع گوادر و صوبہ سندھ انا شار کراچی تون ملرہ۔

ببو کہ داسہ ای نمے بیلہ شار انا تینا سفری حوال ءِ ایتو۔ تانکہ نُم ہم کَن تون اوار بیلہ شار انا سیل ءِ کننگ کیرے۔

ای دا سفری حوال ءِ بیان کننگ آن مُست دا ضرور پاننگ خواوہ کہ بیلہ شار اٹی کنا ہن بر کنا یونیورسٹی (2004-2007) نا وخت آن ارے۔ ہراتم ای اسلامی جمعیت طلبا قلات ڈویژن نا زمواری تے سنبھالاسُٹ۔ کنے ہَر تو خوانوک آتتون مِلنگ کن و وخت اس ہیل کاری دود کرفنگ کِن ہنوئی مسکہ۔

بیلہ شار اٹی 2015ء غان ای اسہ اسکول اس ”قرطبہ اسکولز آف ایکسیلینس“ نا پن اٹ ملاٹ۔ ہراڑے پنچ جماعت اسکان چناک جوان ءُ تعلیم اس دوئی کننگ کِن بریرہ۔ لس وڑ اٹ کنے دا شار آ بننگ نا وخت داڑے دا اسکول نا کتاب دائے، اسکول نا دیوان یا سالی نتیجہ غاتیا بروئی مریک۔ پروگرام و الخدمت فاؤنڈیشن نارد اٹ بنا مروک آ پروجیکٹ آتا بنائی یا گڈیکو دود آتا سوب آن بننگ مسنے۔

دا وار ہم عبدالستار رونجہ صاحب (ڈائریکٹر قرطبہ اسکولز آف ایکسیلینس بیلہ) نا دعوت آ بیلہ شار آ ہنوئی مس کہ ہراڑے کنے اوفتا اسکول کن جئی آ نیاڑی تیان انٹرویو آن گڈ پرنسپل اس گچین کروئی ئس۔ عبدالستار رونجہ صاحب کنے دا مسخت کن اسہ تُو اس مُست دعوت تسوسُس۔ و نن ہڑتوم آک ہمو دے او تاریخ ءِ تخاسُن۔ ای ہم تینا ہڑدے نا اختئی تیان وخت کشنگ کتوٹہ۔

اسکول نا پرنسپل نا انٹرویوک31 جولائی 2021ء (شنبے نا دے) قرطبہ اسکول اٹی سہب اتون 10 بجہ غا مروئی ئسُر۔ ولے ننے کوئٹہ غان بیلہ غا سر مننگ کن 500 کلو میٹر نا سفر ہم کروئی ئس۔ ہندا سوب آن ننے اسہ دے اس مُست دا سفرءِ بنا کروئی ئس۔ دا سفر اٹی ہرا اِرا (2) سنگت و بھلا ایلم تا سنگتی نصیب مس اوفتیٹی حاجی محمد امین صاحب ہراکہ پی ٹی سی ایل محکمہ غان ریٹائر مسنے۔ ایلو فاروق رئیسانی صاحب تون ننا گاڈی نا ڈیوری ءِ، او پدی بننگ اسکان جوانی اٹ زمواری ءِ سر تس۔ فاروق رئیسانی صاحب کنا ہمسائے ہم ارے داڑتون اوار او الخدمت فاؤنڈیشن اٹی ڈیور ءِ۔ اودے ای 30 جولائی (جمعہ نا دے) سہب اتون 8بجہ غا اُرا غا سر مننگ نا پاریسٹ۔ وخت اس کہ عابد حسین صاحب تینٹ کن تون خڑکی کرسا بیلہ شار انا پارہ غاسفر نا ارادہ نا باور کرفیسس۔

ایلو پارہ غا ای شب جمعہ (یعنی پنچ شنبے نا نن) تینا سفری بیگ ءِ تیار کریسٹ 30 جولائی آ سہب اتون فاروق رئیسانی صاحب اڈ تروک آ وخت آ اُرا نا مون آ سلوک ئس۔ داڑے ای و احمد کارزان صاحب (کنا 9 سال نا مار) اسُل تیار ئسن۔ کنا و احمد کارزان نا تیاری ٹی اسہ پرخ اس ئس کہ کنے مسہ دے اکن بیلہ شار آ ہنوئی ئس وخت اس کہ اودے تینا اسکول آ۔ احمد کارزان ءِ اسکول آ سر کرین و نن عابد حسین صاحب ءِ ہرفنگ کن اونا اُرانا پارہ غان راہی مسُن۔ ہراڑے او ہر وخت آنبار مُست آن تیار ننا انتظاری ئس۔ اودے گاڈی ٹی تولفین تو او گاڈی ٹی تولنگ تون حاجی محمد امین صاحب تون ہِننگ نا ارادہ ءِ کرے۔

حاجی محمد امین صاحب نا بنگُٹ تو کنا اُست خوش مس۔ نن اودے اونا اُرا غان ہرفنگ کن جَٹ و دم اسیٹی اونا اُراغا سر مسُن۔ ننے او اُرانا مون آ مچے انتظارکرفے، ہراڑا عابد حسین صاحب چندی وڑ اٹ خیال درشان کرے۔ ولے دا وخت آ ای بیرہ دا پاریٹ کہ حاجی محمد امین صاحب مہمانداری ٹی جوان ءِ۔ مرے مف کُنوئی ءُ گڑا تین تون اتو برو۔ او ہراتم اُرا غان پیش تما تو اُونا دوٹی اسہ پلاسٹک نا لوت اس ئس، ہراٹی گچین ءُ وڑ انا الار ئسر۔ نن ہر مُسٹ آ سنگت آک دا پاریسن کہ ہراتم محمد امین صاحب نن تون مس تو گاڈی نا مون انا سیٹ ”پیرانگا“ Senior citezen آتے کن مرو۔ دا وار ہم نن اونا بشخ ءِ برجا تخان و اودے مون انا سیٹ آ تولفین۔

(برجا ءِ)

ہفتئی تلار
تاک: 31
27-21اگست 2021ء
پنہ: 02

Get real time updates directly on you device, subscribe now.

Leave A Reply

Your email address will not be published.