براہوئی شاعری نا سفر(2)

حمید عزیزآبادی

0

Get real time updates directly on you device, subscribe now.

 

ڈاکٹر براہوئی پاہک کہ: ”اٹھارویں صدی عیسوی میں ایک مشہور شاعر شاہ کریم گزرا ہے یہ شاہ کریم نوشکے کے مینگل قبیلے سے وابستہ تھا۔ شاہ کریم کا آبائی پیشہ شاعری تھا اسکے وفات کے بعد اُسکے فرزند بشام مینگل قبیلہ کا قومی شاعر ہوا۔“ (براہوئی،2014ء،109)

داڑان داظاہر مریک کہ بشام ءِ شاعری نا نعمت میرات اٹی دُو بسنے۔ بشام نا شاعری نا دور ہم انگریز نا دور حکومت مسنے۔ دا دور اٹی انگریز نا ظلم و زوراکی نا بازار تیوی بلوچستان اٹ خاخر دسیکہ، انگیز آک مُلک انا زی آ مُلک فتح کننگ ئسُر۔ ہراتم انگریز سامراج بلوچستان اٹ تینا ناپاک آ گام تے تخا تو داجاگہ نا مخلوق ہم تینا وطن نا خاطر آن سلہہ ہرفسا انگریز آتتون مون تننگ کن پیش تما۔ ڈاکٹر عبدالرحمن براہوئی لکھک کہ:”مینگل قبیلہ لڑائی میں پیش پیش تھے۔ نومبر 1839ء میں انگریزوں سے جھڑپ میں اُس قبیلہ کا ایک سردار میر ولی محمد شہید ہوگئے۔“ (براہوئی،2014ء،109) بشام میر ولی محمد نا شہادت آ تینا قومی کڑد ءِ ادا کرسا تینا بلبل پنی آ رباب تون تینا جوزہ غاتا درشانی ءِ دا وڑ کرے:

”بلبل سرونز رباب ءِ

بشام نا اُست دریاب ءِ

شعر تے ایتک ملائک

شعر شہ حسن رُغامک

باران سخی نا مار ءِ

خوش رنگ زیب دار ءِ

پال/ سنجر نا اوار ءِ“

(گل،1993ء،101)

انگریز نا دور اٹ اخس کہ متکن آ شاعرآک تدینگسا کرینو اوفتیان بھاز بھلو بشخ اس تینا شاعری نا مرکزی سرحال ءِ مزاحمت تون گنڈانو، ہندا انگریز نا دوراٹی مُلا مزار نا پن ہم خننگک ”ہرا وخت آ 1912ء ٹی انگریز دا جاگہ نا سڑدار آتے لالچ و وڈی ترسا اوفتے تینا مُٹ اٹی کرے تاکہ او تینا سازش ءِ پین سوگو کننگ کن تینا کوزہ گری و حکمرانی ءِ برجا تخے، ہندا لالچ نا سوب آن سڑدارک تینا عزت و دستار ءِ بے بالار، ہراتم نگریز ایجنٹ ٹو گورنر جنرل سبی نا دربار اٹی سڑدار آتے پرمان کرے کہ کنا بگھی ءِ سبی اسٹیشن اسکان چکبو۔“ (عزیزآبادی،2018،25)

سڑدار آک انگریز نا دا مخوئی آ حکم ءِ تین کن غینمت تکسا بگی ءِ ایجنٹ و ایجنٹ نا میم اتون اوار سبی اسٹیشن اسکان چکار۔ سڑدار آتا دا میاری آ کاریم آ مُلا مزار نئے بیرہ براہوئی زبان اٹ دا کسب ءِ یا بگی ءِ چکنگ نا ہرا حالیت مسوسُس ہمو واقعہ ءِ بلوچی، سندھی و اردو زبان اٹ شاعری نا وڑ اٹ مخلوق نا مون آ تالان کرے۔ ہراتم د انظم ”لاٹ انا بگھی“ نا پن اٹ تیوی بلوچ راج اٹی پنی مس تو سڑدار آک لاٹ انا بگھی والا نظم ءِ تینا بے عزتی سرپند مسُر، تاریخ نا کتاب آک دا پارہ کہ ہراتم دا میاری آ واقعہ سڑدار آتا دُو آن مس تو بنگلزئی نا سڑدار وڈیرہ نورمحمد حج آ ہناسُس۔ تو سڑدار آک انگریز ءِ دا پاریر کہ نن نا پاننگ آ نا بگھی ءِ اسٹیشن اسکان چکان، ولے ملامزار ننے تیوی راج اٹی مخوئی کرے۔ انگریز پارے کہ نم سلبو کہ وڈیرہ نورمحمد حج آن برے تو ملا مزار کن اسہ سزا اس تجویز کروئی ءِ، ہراتم کہ وڈیرہ حج بیت اللہ غان پدی بس تو سڑدار و انگریز آک ملامزار نا غاو ءِ وڈیرہ نورمحمدتون کریر۔ اخیر ملامزار ءِ دا نظم انا پاننگ تون ریاست بدر کننگا۔لاٹ انا بگھی نا تیوی نظم:۔

”امیرغوث بخش رئیسانی نرمزار

شاہوانی رشیدخان امیر نامدار

براہوئی کرینو اینو جھٹ پٹ

ارین ای و نی تین پہ تین سیال مٹ

ہموکان ہُبّو تے کہ ایتن تے سٹ

نوا کہ شرف ءِ ننا کیر گٹ

ہمو دے عقل کُل انا مس چٹ

کہ چکار بگھی ءِ بیخ و بٹ

میاں خان بہرام خان اریر بے میار

سمندر تفے مُخ مس تیار

ہلمہ کیر ہر مُسٹ اسہ وار

کہ ہلبو بگھی ءِ ننا بس وار

سیاہ ریش ورناک عجب زیب دار

بگھی ءِ چکنگ اٹ کریر دُند وقار

بگھی ٹی ایجنٹ میم اتون ئس سوار

عجب سر مسُر ٹیشن آ بے توار

ہے ہے حیا امپے مُلک آن ہنا

بگھی ءِ چکار اوفتے خلقت خنا

کریر مون مون ءِ تینا قوم انا

ہمے دے کروسُر سلاہ جنگ انا

حیا اٹ کہوسُر مروسُر فنا

غزا غان ہلیک تا عجب رنج دڑد

غریب آتا پُلنگ کن اریر شیر مڑد

ہرادے حشر نا عدالت مرو

امیر آتے کُل ءِ خدا مُردرو

نصاریٰ تتون اوفتے سنگت کرو“

(بگٹی،1996، 95-96)

گمان ہندن ءِ کہ دا نظم بلوچی، براہوئی، اردو و سندھی زبان اٹ دا سوب آن تخلیق مسنے کہ ہرا سڑدار براہوئی زبان اٹ ہیت کرینے، یعنی اونا زبان براہوئی مسنے اوڑکن براہوئی زبان اٹ دا نظم پاننگانے، ہندن ہرا سڑدار بلوچی و سندھی زبان آن تعلق تخاکہ تو اوڑکن بلوچی و سندھی زبان اٹ پاننگانے۔ داکان بیدس اردو زبان اٹ ہم پاننگانے کہ ایلو مخلوق آک ہم دا نظم ءِ سرپند مریر۔ دانظم ءِ اولیکو وار میرعبداللہ جان جمالدینی پٹ و پول کرسا مخلوق نا مون آ پیداوار کرے، دا بارواٹ عزیزمحمد بگٹی نوشتہ کیک کہ ”اس نظم کو پہلی بار میر عبداللہ جان جمالدینی منظر عام پر لائے اور ملک محمد پناہ نے اسے اردو ترجمے کے ساتھ نوائے وطن میں شائع کرنے کا اہتمام کیا۔“ (بگٹی،1996ء،84) ہراتم آ کہ دا نظم ہر مُسہ زبان اٹ پاننگا تو سڑدار و انگریز آتا جرگہ نا فیصلہ نا رداٹ مُلا مزار ءِ سزا تننگ کن ریاست بدر کننگا، اینو ہم اونا ادیرہ سندھ و بلوچستان نا سیم آٹے۔ ولے اونا دا اسٹ انگا نظم (لاٹ انا بگھی) اودے براہوئی و بلوچی مزاحمتی ادب اٹی مدام زندہ تخا۔

(برجا ءِ)

ہفتئی تلار
تاک: 31
27-21اگست 2021ء
پنہ: 03

Get real time updates directly on you device, subscribe now.

Leave A Reply

Your email address will not be published.