زندان نا ڈائری (ڈسٹرکٹ جیل نا اسیر آک) 6
ڈاکٹر سلیم کرد
Get real time updates directly on you device, subscribe now.
ای اولیکو وار 26 فروری 1969ء نا دے ایوب خان نا بیداد و جور، ون یونٹ نا برخلاف کشوک آ طالب علم تنظیم نا اسیجائی جلوس اٹی علی احمد کرد انا جوزہ غان پر انگا تران ءِ بنگٹ۔ ہمو وخت آ ای پرائمری ءِ پاس کریسٹ۔ ظریف شہید نا واقعہ پیش بسوسس۔ کوئٹہ نا تعلیمی ادارہ غاک یخ انا چھٹی تا سوب آن بند ئسر۔ دا 26 فروری 1969ء نا دے ئس۔ دا دے تیٹی مچ آ ملک اٹی ایوبی آمریت و ون یونٹ نا برخلاف برانز تینا کچ آن آفتاسس۔ بھلو وخت اسے آن کم ووَد دہائی سے آن زیات وخت گدرینگ انگ آن پد مارشل لاء نا بیداد نا مون اٹ السی خار و بد بیسئی نا جوزہ غاک شمبلاخ نا دروشم اٹ جمجلائی کریر۔ دیکی و دے ٹِکی پاکستان نا کل شار تیٹی الس برانز کننگ ئس۔ ہر شار اٹ برانزی ریلی، جلسہ و جلوس اڈ تننگاکہ۔ دا برانز آتے پین ترند کننگ اٹ مچ آ ملک انا طالب علم تنظیم آک پوغ انا کاریم ءِ کریر۔ ملک انا ایلو شار تیانبار بلوچستان اٹی ہم چندی طالب علم تنظیم آک اسیجا مرسا انجمن متحدہ طلباء نا پن اٹ اسیجائی پلیٹ فارم اس ٹہیفیر۔ و مچ آ ملک انا السی برانز اٹی کل آن مونی ئس۔ دا دے تیٹی ملک انا گیشتری تعلیمی ادارہ غاتیٹی لیفٹسٹ بلوچ اسٹوڈنٹس آرگنائزیشن، نیشنل اسٹوڈنٹس فیڈریشن، پختون اسٹوڈنٹس فیڈریشن و رائٹسٹ اسلامی جمعیت طلباء واکداری تخوک تنظیم آک ئسر۔ سندھ اٹی سندھ نیشنل اسٹوڈنٹس فیڈریشن و ایلو تنظیم آک ہم تینا پورو وس و واک اٹ برانز کننگ ئسر۔
بلوچستان اٹی طلب علم آتا دا سیوتی محاذ اٹی بلوچ اسٹوڈنٹس آرگنائزیشن، پشتون اسٹوڈنٹس فیڈریشن و اسلامی جمعیت طلباء اوار ئسر۔ دا دے تیٹی بلوچ اسٹوڈنٹس آرگنائزیشن نا راہشون تیٹی خیر جان بلوچ، عبدالحکیم لہڑی، علی احمد کرد، صوفی عبدالخالق بلوچ طالب علم آتا، و بسم اللہ کاکڑ، ماما عزیز اللہ کاکڑ پشتون طالب علم آتا راہشونک ئسر۔
خیر جان بلوچ ہرا او وخت آ بلوچ طالب علم آتا سربر ءُ راہشون اس ئسکہ۔ ننا اُرا نا رہی آ شالدرہ ٹی سردار محمد زمان محمد شہی نا خالی ءُ اُرا سے ٹی رہینگاکہ۔ ہراڑے نیشنل عوامی پارٹی نا علاقائی ورکر و بلوچ طالب علم آک بسرہ۔ ننا خاہوت نا ہیرو ورناک ہم ہمو دے تیٹی دا ملک گیر السی تحریک اٹی مونی ئسر۔ ننا اسہ تینائی اس، محمد موسیٰ کرد کنا بھلا ایلم اسلم کرد، کنا اِلہ محمد مراد کرد، علاقہ نا نیپ انا ورنا ورکر ہرافتیٹی یار محمد زہری (یارِخرین) حسن بلوچ (شاد چپل والا) و ایلو ورناک خیر جان بلوچ آ بسرہ۔
ہند دے تیٹی 26 فروری 1973ء نا دے پیشیم نا وخت آ محمد موسیٰ کرد تینا اُرا غان پیش تما، و ای تینا ہمسائے سردار محمد زمان محمد شہی نا اُرا غان خیر جان نا پیش تمنگ تون ای اونا ہور اٹ ہلکٹ، و برانز نا کنڈ آ راہی مسن۔ نن پند اٹ بلوچی اسٹریٹ آن مرسا پرنس روڈ و ولدا لیاقت روڈ آ سر مسن۔ اوڑے لیاقت بازار نا باٹی اسلامی جمعیت طلباء نا دفتر ئس۔ داڑے الس و طالب علم آتا بھلو مچی اس ئس۔ نعرہ غاتا توار آسمان ءِ کاٹم آ ہرفیسس۔ علی احمد کرد اسہ مسہ ٹیر والو دُوریڑھی سے آ مائیکرو فون دُوٹی ”ون یونٹ توڑ دو، صوبوں کو بحال کرو“ نا نعرہ خلسا برانز کروک آتا جوزہ غاتے باسفنگ ئس۔
دا برانزی ریلی ٹی کنا بھلا ایلم اسلم کرد، کنا بھلا اِلہ عبدالحمید کرد تینا ایلم محمد مراد کرد و ایلو تینائی تتون اوار ہرافتیٹی نادر عزیز کرد، حامد عزیز کرد و ایلو کیہیک اوار ئسر۔
ہفتئی تلار
22-28 August 2020
تاک: 33
پنہ : 3