فیڈل کاسترو       Fidel Castro         2 

1895ء اٹی 30 سال نا مُرغن انگا دتر چر آ جہد و کوشست آن پد امریکی فوج باغی تا کمکی کِن رسینگا۔ و کیوبا ٹی ہسپانیہ نا اقتدار ایسر مس۔ ولے اوڑتون اوار اوار دا ہم مس کہ پنی آ متل آنبار کیوبا نا امریکی ایڑھکو پوغ اس ہلنگ کن بس، و اُرا نا گودی مس۔ اصل اٹ امریکی حکمران اوڑان کم و وَد نیم کرن مہالو کیوبا غا تینا تسلط نا پڑو ءِ کریسُس۔ دا 1848ء انا ہیت اسے، ہرا وخت آ امریکہ دہ کروڑ ڈالر نا ایوَز اٹ دا جزیرہ ءِ ہسپانیہ غان ہلنگ نا کوشست ءِ کرے۔ و ہسپانیہ نا نمن مننگ آ امریکہ نا واکدار آک اسہ بیان اس تالان کریر۔ او بیان اٹی دا پاننگا کہ جغرافیائی وڑ اٹ کیوبا امریکہ ہائے متحدہ نا بشخ اسے۔ اگہ ’ریاست ہائے متحدہ‘ ءِ اونا ہلنگ آن توننگا تو دینی و دنیاوی کانود آتا رد اٹ ننے حق رسینگک کہ نن اودے تیر و تلوار نا زور اٹ ہلین۔

ہندا ”دینی و دنیاوی کانود“ نا رد اٹ 1899ء اٹی امریکی دیری آ فوج کیوبا ٹی پُترینگا و کیوبا نا راہبند اٹی زوراکی اٹ اسہ ٹِک اسے نا گیشتری ءِ کرفیر۔ دا ٹِک انا مفہوم دا ئس کہ امن ایمنی یا امریکی فائدہ غاا رکھ اکِن امریکی حکومت ہرا وخت آ خواہے کیوبا ٹی تینا فوج آتے دڑفنگ کیک۔ دا واکداری ءِ آسراتی اٹ دوئی کننگ کن امریکہ کیوبا ٹی اسہ آخبتی فوجی اڈہ اس جوڑ کننگ کن اجارہ سے نا موکل ہِم دوئی کریسُس و گوانتا ناموبے نا 45 مربع میل انا ٹکر اس امریکہ کیدا۔ زوراور داسکان کیوبا نا دا بشخ آ کوزہ ءِ برجا تخانے۔

آجوئی آن گُڈ کیوبا ءِ وار وار آ فوجی مداخلت تون مون تروئی تما۔ 1899ء اٹی اولیکو وار امریکہ فوج کشی کرے، ولدا 1909ء و 1920ء اٹی ہرا وخت آ اونا اُست خواہس کیوبا والاتے تینا کاٹم ءِ شیف کروئی تما و ہمو ظلم انا داغک بندغ آتا اُست آتیا داسہ ہم چشخ ءُ۔

داڑے سرمایہ داری نظام ئس، ملک انا تہٹی و پیشن امیر و ہزگار آ بندغ آتے آسراتیک فراوان ئسر۔ لَس بندغ نا بنداوی حق آتے ہم پُلنگاسُس۔ دولت مند، زردار آتے لنگڑی، جہالت، بے روزگاری، ڈغار تا ویل آک، تعلیم و جان جوڑی نا بارو اٹ ہِچ وڑ انا ہچ ءُ فریشانی اس الوکہ۔

ہفتئی تلار

22-28 August 2020

تاک: 33

پنہ : 7