اصطلاحات نثر 30
غفور جان ساسولی
اسہ کڑدہ اس ہندن ہم ئسکہ ہرا صوفی ءِ ”اصحاب صفہ“ پاریرہ۔ ہندا سوب آن صفہ لوز اسم اس ارے، ہرا کہ ”صفا“ آن ہلنگانے۔
علامہ ابن حوزی نا خیال نا رد اٹ کہ لوز صوفی ”صوفہ“ آن ہلنگانے، و صوفہ اسہ قبیلہ اس ئسکہ، ہرا اسلام آن مست بیت اللہ نا خیالداری ءِ کریکہ۔“
شاہ سید محمد ذوقی نا نوشتہ مروک کتاب ”سیر دلیران“ اٹی تصوف و صوفی نا رد اٹ حضرت جنید بغدادی نا پاننگ نا حوالہ ءِ ترسا پاہک کہ:
”تصوف ’اصطیفا“ ارے۔ (یعنی بزرگ، گچین، گچین کروک) ہرا گچین کروک ءِ یا بزرگ و ولی اللہ ءِ ہمو صوفی ءِ۔“
حضرت بشر حافی فرمائفے کہ ہرا بندغ اللہ جل جلالہٗ تون است ءِ سفا تخے، ہمودے صوفی پارہ۔ دن کہ اونا پاننگ ءِ:
”صاف شوبا حق نہان و آشکار
صوفیانِ صاف را این سست کار“
مستشرق آک ہم تصوف نازی آ بھاز پٹ و پول کرینو، ہرافتیٹی نولڈیکی، پروفیسر نکلسن، لوئیس ماینسیون، ڈبلیو ایچ براؤن لی، و ایلوفک اریر۔
نولڈیکی تینا عقیدہ نا رد اٹ تصوف نا وڑ و ڈَول نا سفت ءِ کرینے:
”صوفی لوز ”صوف“ آن ہلوک ءِ، و دا پن ہمو عیسائی راہبہ غاتے تننگا، ہرا صوف یعنی پشم بینارہ، و اوفک تینے دا دنیا غان اسہ کنڈ کریرہ۔“
صوفی نا بابت ذوالنوین مصری دن پاہک:
”الصوفی اذا نطق بان نطقہ من حقائق“ یعنی صوفی نا ہیت و گپ راستکی تا پاشی ءِ۔“
تصوف زند انا اسہ برجا ءُ عمل اس مریک، ہرا انسانی رویہ غاتیا زہم شاغک۔ تصوف نا علم حقی مریک، ہرا صوفی ءِ وجدانی ڈول اٹ دوئی مریک۔
صوفی بصیرتِ عقلی استدلال ءِ اولیت ایتک۔ و دن انگا کشف و الہام ءِ تینا مہاڑو جوڑ کیک۔ اونا خڑک آ راستکی اسہ سرحالی و تہہ انا اسہ راستکی اس ارے۔ ہرا اودے تصوفی عبادت آن دو بریک۔
تصوف نا اِرا پالو اریر، اسٹ پاش و ایلو اودیم۔ اودیم اٹی سخت، توکل و شکر بریرہ۔ و ہندن پاش پالو ٹی ہمو عمل آتا علم بریک ہرا انسان نا پاش انگا دروشم ءِ مون آ اتیک۔ دن کہ نماز، روچہ، حج، و دااے۔ مطلب کہ تصوف ہمو بے مٹ آ عبادت نا بشخ ءِ ہرا بندغ ءِ دا غرز نا دنیا یا دنیا داری آن اسہ کنڈ کرسا اودے خدا غان خڑک کیک۔
تصوف ہمو چیدہ ءِ یا ہمو عمل ءِ ہرا دنیا نا مال و مڈی تخنگ آن پد ہم تینے پخیر جوڑ کیک، و ہندن عزت و شرف مند مننگ آن پد ہم او تینے تینا ذات اٹی کم تکک، و او تینا زند انا غٹ است خواہی تے چٹفک۔
theosophy یونانی لوز اسے، ہرا theosophia غان پیش تمانے۔ Theos نا معنہ ”خدا“ و Sohos نا معنہ عقل و حکمت و دانائی ءِ۔
یعنی یونانی تھوسوفیا غان صوفی نا ڈول مطالعہ نا کمک اٹ دوئی کروک گڑا تیان خدا نا بارو اٹ عقل و حکمت و دانائی آن پہہ مننگ نا عمل ءِ تصوف پارہ۔
جتا جتا مذہب آتیٹی تصوف نا اصطلاح جتا جتا پن تیٹی کاریم اٹ بریک، دن کہ اسلام اٹی صوفی یا صوفی ازم، عیسائیت اٹی Gnisticism بدھ مت اٹی Shingon یا Vajrayam ہندومت اٹی گیان یا Shaivsim و یہودیت اٹی Hasidism یا Gershoom۔
ہفتئی تلار
22-28 August 2020
تاک: 33
پنہ : 5