مسجد اقصیٰ غا اسرائیلی سیکورٹی فورس آتا جلہو، او آئی سی نا ہلہلہ ئی دیوان پگہ مریک

جدہ: فلسطین مسجد اقصیٰ غا اسرائیلی جلہو ناردعمل اٹی پارینے کہ اسرائیل نا بیرہ مذمت ءِ کننگ گنج ا س اف بلکن اوڑا پابندی خلنگے۔ ایلو کنڈا مسجد اقصیٰ غا اسرائیلی جلہوآتیا گپ وتران کن اسلامی کمکار تنظیم (اوآئی سی) نا ڈل آتا کہول آ ایگزیکٹیو کمیٹی نا ہلہلہ ئی و کھلا دیوان ہفتہ (8 اپریل) آ مریک۔ سعودی خبررساں ادارہ نا رداٹ فلسطینی وزارت خارجہ پارے کہ ہروار آنبار دا وار ہم بھاز انگا ملک آتا کنڈآن سلامتی کونسل اٹی اسرائیل نا مذمت ءِ کننگ گنج اس مفک۔ وزارت خارجہ ٹویٹ اٹی پارے کہ داوار اسہ دہشت گرد، سرکش کوزہ گیر و ظالم ریاست نا وڑآ اسرائیل آ پابندی خلنگے۔ فلسطینی وزارت خارجہ نا دا خواست اتون اوار اوار اسلامی کمکار تنظیم مسجد اقصیٰ غا اسرائیلی جلہو آتیا گپ وتران کن ہفتہ 8 اپریل آ ڈل آتا کہول آ ایگزیکٹیو کمیٹی نا ہلہلہ ئی و کھلا دیوان اس بٹنگ نا پڑو کرینے۔ دا ہلہلہ ئی دیوان ریاست فلسطین و اردن نا کنڈآن بٹنگ انگانے۔ اوآئی سی پارے کہ اومیت ءِ کہ تنظیم نا سیکرٹری جنرل حسین ابراہیم طحہٰ دیوان آن تران کیک و مسجد اقصیٰ و فلسطینی تا بابت مروک آ خطرناک پیش رفت ءِ مون آتخک۔

(اے پی پی)