بلوچستان کل آن مست کورونا نا توننگ نا گام گیج آتا بناءِ کرے، جام کمال

کوئٹہ (خ ن) وزیراعلیٰ بلوچستان جام کمال خان پارینے کہ بلوچستان ہمووخت کورونا وائرس نا توننگ کن گام گیج آتا بناءِ کرے، ہراتم ایلو صوبہ غاتے دا بابت پورو معلومداری ہم اَلو۔ صوبہ ٹی ہیلتھ ایمرجنسی خلنگا، تفتان آن بروک زائر آتے آسراتی تسن، کورنٹائن و آئیسولیشن ہند جوڑ کرین، حکومت بلوچستان کورونا نا توننگ نا بابت تینا زمواری تا پوروی ٹی تینا وس انا کچ آ ہر گام گیج ءِ کرے، 28 فروری 2020ءآن 26 مارچ اسکان کورونا وائرس نا بابت 8 دیوان اڈ ترسا جانجوڑی محکمہ و ایلو تعلقدار محکمہ غاتے گائیڈ لائن تننگا۔ دا ہیت آتا درشانی ءِ او کرونا وائرس نا بابت جانجوڑی محکمہ و پی ڈی ایم اے ءِ تروک زمواری و گام گیج آتیا عملدرآمد نا پیش رفت و کورونا وائرس نا بابت طبی گڑا تا ہلنگ نا بابت باندات آتا جاچ دیوان آن تران کرسا کرے۔ چیف سیکرٹری بلوچستان فضیل اصغر، چیئرمین وزیراعلیٰ معائنہ ٹیم سجاد احمد بھٹہ، جانجوڑی سیکرٹری، سیکرٹری خوراک، سیکرٹری بلدیات، سیکرٹری خزانہ، ڈی جی پی ڈی ایم اے، سیکرٹری گوازی و کورونا وائرس ایڈوائزری کونسل نا باسک ڈاکٹر شیرین خان ہم دیوان اٹی ساڑی ئس۔ دیوان ءِ سیکرٹری جانجوڑی کورونا وائرس نا بابت کروک گام گیج و وزیراعلیٰ نا کنڈ آن چندی دیوان اٹی تننگوک پارت آتا رد اٹ محکمہ جانجوڑی نا جم کارکڑد، ہسپتال آتے مشینری نا فراوانی و گرج انا کچ آ ماڑی تفنگ و جوڑجاڑی آن بیدس انتظامی باندات آتتون اوار ہسپتال آتیٹی انسانی وسیلہ غاتا فراوانی نا بابت بریفنگ تِس۔ وخت اس کہ دیوان ءِ ڈی جی پی ڈی ایم اے نا کنڈ آن پی پی ای کٹ، ماسک و ایول طبی ازباب آتا ہلنگ نا بابت آگہی فراوان کننگا۔ دیوان ءِ پاننگا کہ ڈاکٹر و پیرامیڈیکس آتے داتم اسکان رکھی بیرشت، ماسک و گلو نا فراوانی ٹی ہچ ءُ کمتی اس بننگ کن اِلنگتو۔ و ازباب ہلنگ نا برجا عمل نا پوروی آن پد گرج انا رد اٹ غٹ طبی ازباب آک دوئی مریرہ۔ دیوان ءِ معلومدار کننگا کہ کورونا وائرس نا زہمی بندغ آتا درمان کروک ڈاکٹر و نرس آتا رہینگ کن خصوصی ہوسٹل نا بست و بند کننگانے۔ وزیراعلیٰ پارے کہ ساڑی حالیت نا گرج ءِ کہ ہیلتھ کیئر نظام ءِ پوسکن آ وڑ و ڈَول آتیا بیرفسا کورونا وائرس تون اوار ایلو دین والا ناجوڑی تا درمان نا آسراتی تا فراوانی ءِ پک کننگے و نزوری تے اینک کننگے۔ وزیراعلیٰ پارے کہ کورونا وائرس نا چیلنج آتا مون ءِ توننگ تون اوار اوار دا بابت ننے الس ءِ ہم است جم کروئی ءِ۔ او پارے کہ اگہ ایمرجنسی نا حالیت نا دے تیٹی وخت آ فیصلہ و گام گیج متو تو اوفتا جوان ءُ بھرم اس دوئی مفک۔ او صوبائی کہول آ طبی ازباب آتا ہلنگ نا عمل ءِ زُوت آن زُوت پورو کننگ نا گرج آ زور شاغسا پارے کہ دا بابت پین تَل وَل نا گنجائشت اف۔ وزیراعلیٰ پارے کہ مست ہسپتال آتا بے گرج جوڑ جاڑ آ بھلو فنڈ خڑچ کننگا، ہراڑان وسیلہ غاتا زیان مس۔ و ہسپتال آتا بد انگا حالیت گچین مننگ کتو۔ وزیراعلیٰ جانجوڑی محکمہ نا کارکڑد انا گچینی کن کروک فیصلہ غاتیا عملدرآمد ءِ پک کننگ نا پارت کرے۔ دیوان اٹی کورونا وائرس نا تالانی نا ودکی نا پد اٹ دانا توننگ نا سلاہ ئی گام گیج آتا جاچ ءِ ہم ہلنگا، وخت اس کہ لاک ڈائون آ پین گچین عملدرآمد و الس اٹی کورونا وائرس آن رکھوک سلنگ کن آگہی مہم ءِ پین گچین و ترند کننگ نا فیصلہ کننگا۔