رائز پروگرام، پنجگور ڈسٹرکٹ فٹبال ٹورنامنٹ نا فائنل مس
Get real time updates directly on you device, subscribe now.
حکومت بلوچستان نا فنڈڈ رائز پروگرام نا رِد اٹ بی آر ایس پی نا چاروکی ٹی اڈ ہلوک ڈسٹرکٹ فٹبال ٹورنامنٹ نا فائنل میر انور جان کلب تسپ گراؤنڈ اٹی آزاد کلب گرمکان و میر انور جان کلب تسپ انا نیام اٹی گوازی کننگا۔ فائنل میچ انا خاص انگا مہمان جامعہ مکران نا ڈین پروفیسر ڈاکٹر محمد یونس بلوچ ئسکہ، وخت اس کہ ڈسٹرکٹ فٹبال ایسوسی ایشن نا نمائندہ، ہندی شخصیت و فٹبال ہُروک آتا بھلو کچ اس ہم ساڑی ئس۔ سخت مقابلہ ٹی میر انور جان کلب تسپ آزاد کلب گرمکان ءِ 0-2 اٹ کٹسا ٹورنامنٹ نا ٹائٹل ءِ تینا پن آ کرے۔ میچ انا اخیر اٹ ونر و رنر اپ ٹیم تے ٹی ٹرافی، شیلڈز و انعام بشخ و پانٹ کننگا۔ دا وخت آ ترانکار آک حکومت بلوچستان و رائز پروگرام نا رِد اٹ ورنا تیکن گوازی نا شون نا گام گیج آتا ستاءِ کرسا پاریر کہ دا وڑ انا ٹورنامنٹ آک ورنا ٹیلنٹ ءِ مونی اتنگ‘ مثبت سرجز آتے مونی دننگ و اوفتے منشیات و ایلو منفی کسر تیان مُر تخنگ اٹی اہم ءُ کڑد اس ادا کیرہ۔ او پاریر کہ حکومت بلوچستان نا رائز پروگرام تعلیم، ہنرمندی و گوازی نا بشخ آتیٹی ورناتے واکدار کننگ کن بھرمی گام گیج کننگ اٹی ءِ۔ و دا وڑ انا گوک ورناتے تینا لائخی تا درشانی تون اوار مونی ہننگ نا جوان وارخواہی فراوان کیرہ۔ پنجگور (نامہ نگار)