دوحہ پلان آ عملدرآمد کن سنبرینگوک اُن، شہباز شریف

جہانی کہول آ شونہالی کن شون ہلوک ملک آتا پرائیویٹ سیکٹر و سول سوسائٹی نا کم شون ہلوک ملک آتتون شریداری پیدوار ءِ،کم شون ہلوک ملک آتیکن وام تا شڑت آتے آسان کننگے، وزیر اعظم

0

Get real time updates directly on you device, subscribe now.

دوحہ : وزیراعظم محمد شہباز شریف پارینے کہ پاکستان کم شون ہلوک ملک آتا شونہالی نا گام دوحہ پلان آف ایکشن آ عملدرآمد کن سنبرینگوک ءِ، کم شون ہلوک ملک آتا الس نا شونداری کن اواری اٹ گام گیج کروئی مریک، کم شون ہلوک ملک آتیکن وام تا شڑت آتے آسان کننگے، الس ءِ راجی رکھ انا فراوانی و پوسکن آ ٹیکنالوجی اسکان آسان رسینگ ءِ پک کننگے۔ داخیال آتا درشانی ءِ او دوحہ ٹی اقوام متحدہ نا کنڈآن کم شون ہلوک ملک آتا کانفرنس آن تران کرسا کرے۔ وزیراعظم کانفرنس نا اڈتننگ ءِ ستاکڑزوک گوندسا قطر انا کنڈآن دا کانفرنس نا اڈتننگ نا ستا ءِ کرے۔ اوپارے کہ جہانی کہول آ شونہالی کن شون ہلوک ملک آتا پرائیویٹ سیکٹر و سول سوسائٹی نا کم شون ہلوک ملک آتتون شریداری پیدوار ءِ۔ ہراڑے جہانی کمک نا زیات گرج ءِ ہموڑے پائیدار شونداری ءِ پک کننگ نا وارخواہی پٹنگ نا گرج ءِ۔ اوپارے کہ کم شون ہلوک ملک آتیٹی جان جوڑی، تعلیم و راجی رکھ انا بشخ آتیٹی بھلو زرکاری و ایجنڈا 2030 آ عملدرآمد و پائیدار شونداری ہدف آتا دوئی کننگ کن گیشتر وسیلہ غاتا گرج ءِ۔ اوپارے کہ کیہی کم شون ہلوک ملک آتے وام تا سوب آن خطرہ غاتا مون تروک ءِ۔ وزیراعظم پارے کہ پاکستان و قطر انا نیام اٹ متکن آ خوشگوار تعلقداری ءِ۔ اوپارے کہ کم شون ہلوک ملک آتا پائیدار شونداری کن کانفرنس نا اڈتننگ وخت آٹی ءِ۔ اوپارے کہ چاگڑدی بدلی تا اثرآک کم شون ہلوک ملک آتے بھاز زیات زہمی کرینے، ننے اواری اٹ کم شون ہلوک ملک آتا الس نا شونداری کن گام گیج کروئی مریک، مچ آدنیا ٹی مخلوق نا بھلو کچ اسے نیزگاری و غذائی کاختی مون تروک ءِ۔ وزیراعظم پارے کہ پاکستان راجی و اقتصادی شونداری دا فورم نا پبی مخ تفی ءِ کیک، پاکستان دا فورم تون اوار غٹ اہم فورم تیا کم شون ہلوک ملک آتا توار ءِ تالان کرسا کیک۔ اوکم شون ہلوک ملک آتیکن ویکسین نا فراوانی ءِ چرجوئی اتون پک کننگ آ زور شاغا و پارے کہ 6 کم شون ہلوک ملک آتے بھاز زیات بھاریم تون مون تروئی تمنگ ءِ ہراکہ بھاز گڑتی اسے۔ اوسلاہ تس کہ کم شون ہلوک ملک آتیکن وام تا شڑت ءِ آسان کننگے و الس ءِ راجی رکھ انا فراوانی ءِ پک کننگے۔ اوکم شون ہلوک ملک آتا پوسکن آٹیکنالوجی اسکان رسینگ ءِ آسان جوڑ کننگ آ زور شاغسا پارے کہ ٹیکنالوجی و علم شونداری ٹی اہم ءُ کڑد اس ادا کننگ کیرہ۔ وزیراعظم دوحہ پلان آف ایکشن 2031 نا ستاءِ کرسا پارے کہ پاکستان دوحہ پروگرام آف ایکشن نا نفاذ نا پبی مخ تفی ءِ کیک و دا چرجوئی ٹی متحرک کڑد ادا کیک۔ وزیراعظم پارے کہ دا پروگرام نا ہدف آتا دوئی کننگ کن پبی گام گیج کروئی مریک۔ او فیفا مقابلہ غاتا اڈتننگ آن پد کانفرنس نا شاندار بست وبند آتیا امیر قطر ءِمبارکبادی تس۔

(اے پی پی)

Get real time updates directly on you device, subscribe now.

Leave A Reply

Your email address will not be published.